ព័ត៌មានអន្ដរជាតិ

ជុំវិញបញ្ហាវ៉េណេស៊ុយអេឡា-អាមេរិក ថៃជំរុញឱ្យគ្រប់ភាគីអត់ធ្មត់ និងគោរពច្បាប់អន្តរជាតិ

បានផុស

៦ ខែ មុន

នៅ

ថ្ងៃអាទិត្យ ៤ មករា ២០២៦

ដោយ

ពាក់ព័ន្ធនឹងការវិវត្តចុងក្រោយនៃភាពតានតឹងវ៉េណេស៊ុយអេឡា-សហរដ្ឋអាមេរិក ក្រសួងការបរទេសថៃនៅថ្ងៃអាទិត្យនេះ បានជំរុញឱ្យគ្រប់ភាគីទាំងអស់មានការអត់ធ្មត់ និងគោរពតាមច្បាប់អន្តរជាតិដើម្បីដោះស្រាយបញ្ហា។ នេះបើតាមការចុះផ្សាយរបស់កាសែត Khaosod។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងការបរទេសថៃ បាននិយាយក្នុងសេចក្ដីថ្លែងការណ៍ថា ខ្លួនបានតាមដានស្ថានការណ៍នៅប្រទេសវេណេស៊ុយអេឡាយ៉ាងដិតដល់ ហើយជំរុញឱ្យគ្រប់ភាគីពាក់ព័ន្ធទាំងអស់ «ដោះស្រាយជម្លោះដោយសន្តិវិធី ដោយគោរពយ៉ាងពេញលេញចំពោះធម្មនុញ្ញអង្គការសហប្រជាជាតិ និងច្បាប់អន្តរជាតិ»។

ក្រសួងបានជំរុញឱ្យគ្រប់ភាគីអនុវត្តការអត់ធ្មត់ឱ្យខ្លាំងបំផុត ដើម្បីបញ្ចៀសភាពតានតឹងបន្ថែមទៀត និងផ្តល់អាទិភាពដល់ការការពារជនស៊ីវិល និងគោរពឆន្ទៈរបស់ប្រជាជនវេណេស៊ុយអេឡា។

ការអំពាវនាវយ៉ាងដូច្នេះរបស់ប្រទេសថៃ ធ្វើឡើងក្រោយប្រធានាធិបតីអាមេរិក លោក ដូណាល់ ត្រាំ បានប្រកាសថ្ងៃសៅរ៍ថា កងកម្លាំងអាមេរិកបានចាប់ខ្លួនឃុំខ្លួនប្រធានាធិបតីវេណេស៊ុយអេឡា លោក នីកូឡាស ម៉ាឌូរ៉ូ និងភរិយារបស់លោក ប៉ុន្មានម៉ោងបន្ទាប់ពីបើកវាយប្រហាររដ្ឋធានីការ៉ាកាស និងខេត្តមួយចំនួនរបស់វ៉េណេស៊ុយអេឡា។ មុនពេលប្រកាសចាប់ខ្លួនលោក ម៉ាឌូរ៉ូ បានប្រកាសដាក់ប្រទេសក្នុងគ្រាអាសន្នទូទាំងប្រទេស។

ក្នុងសន្និសីទសារព័ត៌មានមួយ ប្រធានាធិបតី ត្រាំ បានថ្លែងថា អាមេរិកនឹងគ្រប់គ្រងប្រទេសវ៉េណេស៊ុយអេឡារហូតដល់ «ការផ្ទេរអំណាចប្រកបដោយសុវត្ថិភាព សមស្រប និងប្រុងប្រយ័ត្ន អាចកើតឡើង»។ លោកបន្តថា អាមេរិកនឹងកំណត់ថាពេលណាត្រូវប្រគល់ការគ្រប់គ្រងទៅឱ្យប្រទេសវេណេស៊ុយអេឡាវិញ៕