សេចក្ដីព្រាងច្បាប់ចំនួន៤ ពាក់ព័ន្ធវិស័យអាកាសចរណ៍ ទទួលបានអនុម័តទាំងស្រុងពីព្រឹទ្ធសភា

ក្នុងសម័យប្រជុំពេញអង្គ នាព្រឹកថ្ងៃទី៥ ខែមករា ឆ្នាំ២០២៦នេះ ព្រឹទ្ធសភាបានឯកភាពទាំងស្រុងលើសេចក្តីព្រាងច្បាប់ចំនួន៤ ពាក់ព័ន្ធនឹងវិស័យអាកាសចរណ៍។ សម័យប្រជុំលើកទី៤ ព្រឹទ្ធសភា នាព្រឹកមិញ បានប្រព្រឹត្តទៅក្រោមអធិបតីភាពលោក អ៊ុច បូររិទ្ធ អនុប្រធានទី១ព្រឹទ្ធសភា ដែលមានវត្តមានសមាជិកព្រឹទ្ធសភាចូលរួមចំនួន៥៦រូប។

សេចក្តីព្រាងច្បាប់ទាំង៤ ដែលទទួលបានការឯកភាពពីព្រឹទ្ធសភា គឺ៖ ១. សេចក្តីព្រាងច្បាប់ស្តីពីអាកាសចរណ៍ស៊ីវិលកម្ពុជា។ ២.​ សេចក្តីព្រាងច្បាប់ស្តីពីការអនុម័តយល់ព្រមលើកិច្ចព្រមព្រៀងគ្រប់ជ្រុងជ្រោយ ស្តីពីការដឹកជញ្ជូនតាមផ្លូវអាកាសរវាងរដ្ឋសមាជិកអាស៊ាន និងសហភាពអឺរ៉ុប និងរដ្ឋសមាជិករបស់ខ្លួន។ ៣. សេចក្តីព្រាងច្បាប់ស្តីពីការអនុម័តយល់ព្រមលើពិធីសារទី៣ស្តីពីការពង្រីកសិទ្ធិហោះហើរទី៥ រវាងភាគីចុះកិច្ចព្រមព្រៀងក្រោមកិច្ចព្រមព្រៀងដឹកជញ្ជូនតាមផ្លូវអាកាសរវាងរដ្ឋាភិបាលនៃរដ្ឋសមាជិកអាស៊ាន និងចិន។ ៤.សេចក្តីព្រាងច្បាប់ស្តីពីការអនុម័តយល់ព្រមទៅលើពិធីសារអនុវត្តកញ្ចប់កិច្ចសន្យាទី១១ និងទី១២ នៃសេវាកម្មដឹកជញ្ជូនតាមផ្លូវអាកាស ក្រោមកិច្ចព្រមព្រៀងក្របខ័ណ្ឌអាស៊ានស្តីពីសេវាកម្ម។

បើតាមសេចក្ដីប្រកាសព័ត៌មានរបស់អគ្គលេខាធិការដ្ឋានព្រឹទ្ធសភា បន្ទាប់ពីសមាជិកព្រឹទ្ធសភាជាច្រើនរូបបានឡើងមានយោបល់រួចមក ដោយមានការឆ្លើយបំភ្លឺពីលោក ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល អង្គប្រជុំព្រឹទ្ធសភា បានពិនិត្យ ហើយឱ្យយោបល់ឯកភាពទាំងស្រុងលើសេចក្តីព្រាងច្បាប់ខាងលើ ដោយឥតកែប្រែក្នុងចំនួន ៥៦សំឡេងនៃចំនួនសមាជិកព្រឹទ្ធសភាទាំងមូល។

គួរឱ្យដឹងថា សេចក្ដីព្រាងច្បាប់ខាងលើ ត្រូវបានរដ្ឋសភាអនុម័តកាលពីថ្ងៃទី២៥ ខែធ្នូ ឆ្នាំ២០២៥ ក្នុងសម័យប្រជុំពេញអង្គរដ្ឋសភា ហើយត្រូវបានបញ្ជូនបន្តមកកាន់ព្រឹទ្ធសភា ដើម្បីសុំការពិនិត្យហើយឱ្យយោបល់៕

អត្ថបទ៖ ធឿន វ៉ាន់សុង