ម៉ាឌូរ៉ូ បដិសេធរាល់ការចោទ ខណៈត្រាំទាមទារ «សិទ្ធិទាំងស្រុង»លើប្រេងវ៉េណេស៊ុយអេឡា

អតីតមេដឹកនាំវ៉េណេស៊ុយអេឡា លោក នីកូឡាស ម៉ាឌូរ៉ូ បានបដិសេ​ដ​ការ​ចោទប្រកាន់ពីបទភេរវកម្មគ្រឿងញៀន និងបទល្មើសអាវុធ នៅក្នុងតុលាការសហព័ន្ធ Manhattan កាលពីថ្ងៃចន្ទ​ទី​៥​ខែ​មករា​ឆ្នាំ​២០២៦ បន្ទាប់ពីលោកត្រូវបានកងកម្លាំងអាមេរិកចាប់ខ្លួនក្នុងប្រតិបត្តិការឆ្មក់ចូលកាលពីចុងសប្តាហ៍​មុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោង​តាម​ BBC លោក​ម៉ាឌូរ៉ូ វ័យ៦៣ឆ្នាំ ដែលបានបង្ហាញខ្លួនក្នុងឯកសណ្ឋានអ្នកទោសពណ៌ខៀវ បានបញ្ជាក់តាមរយៈអ្នកបកប្រែថា «ខ្ញុំគ្មានទោសទេ… ខ្ញុំនៅតែជាប្រធានាធិបតីនៃប្រទេសរបស់ខ្ញុំ»។ ចំណែកភរិយារបស់លោក គឺលោកស្រី Cilia Flores ដែលមានរបួសត្រង់សៀតផ្កាក៏បានបដិសេធបទចោទប្រកាន់ផងដែរ។ អ្នកទាំងពីរនៅតែបន្តស្ថិតក្រោមការឃុំខ្លួនរបស់សហព័ន្ធ ខណៈកំពុងប្រឈមមុខនឹងការចោទប្រកាន់ពីបទដឹកនាំការសមគំនិតជួញដូរកូកាអ៊ីន​អស់រយៈពេលជាង២​ទសវត្សរ៍។

ដំណើរការផ្លូវច្បាប់នៅទីក្រុងញូវយ៉កនេះ បានកើតឡើងទន្ទឹមនឹងការផ្លាស់ប្តូរជំហរនៅទីក្រុងការ៉ាកាស ដែលប្រធានាធិបតីស្ដីទី លោកស្រី Delcy Rodríguez អតីតអនុប្រធានាធិបតីរបស់លោក​ម៉ាឌូរ៉ូ បានស្នើកិច្ចសហប្រតិបត្តិការជាមួយរដ្ឋបាលលោកត្រាំ។ ទោះបីជាធ្លាប់បានថ្កោលទោសប្រតិបត្តិការរបស់អាមេរិកថាជា «អំពើឃោរឃៅ» ក៏ដោយ ក៏លោកស្រី Rodríguez បានបង្ហាញឆន្ទៈក្នុងការអនុវត្ត «របៀបវារៈនៃកិច្ចសហប្រតិបត្តិការ» ដែលផ្តោតលើការអភិវឌ្ឍរួមគ្នា។

ប្រធានាធិបតីអាមេរិក លោក ដូណាល់ ត្រាំ បាន​ទាមទារ «សិទ្ធិចូលប្រើប្រាស់ទាំងស្រុង» លើទុនបម្រុង​ប្រេងដ៏​មហាសាល​របស់វ៉េណេស៊ុយអេឡា ដែលធំជាងគេបំផុតនៅលើពិភពលោក ដោយលោកបានលើកឡើងថា ក្រុមហ៊ុនថាមពលធំៗរបស់អាមេរិកនឹងត្រូវទទួលបន្ទុកស្ដារហេដ្ឋារចនាសម្ព័ន្ធដែលកំពុងទ្រុឌទ្រោមរបស់ប្រទេសនេះឡើងវិញ។

ប្រតិបត្តិការយោធា​របស់​អាមេរិក ដែលមន្ត្រីវ៉េណេស៊ុយអេឡាបាន​ឲ្យ​ដឹងថា បានបណ្ដាល​ឲ្យ​មនុស្សយ៉ាងហោចណាស់​៨០នាក់ស្លាប់ រួមទាំងជនស៊ីវិលផងនោះ បានបង្ក​ឲ្យ​មានវិបត្តិការទូតជាសកល។ នៅក្នុងសម័យប្រជុំបន្ទាន់របស់ក្រុមប្រឹក្សាសន្តិសុខអង្គការសហប្រជាជាតិ កាលពីថ្ងៃច​ន្ទ អគ្គលេខាធិការ លោក António Guterres បានព្រមានថា សកម្មភាពរបស់អាមេរិកបានបង្កើត «គំរូដ៏គ្រោះថ្នាក់» សម្រាប់ច្បាប់អន្តរជាតិ។ ខណៈដែលទីក្រុងវ៉ាស៊ីនតោនបានការពារការវាយឆ្មក់នេះថា ជាសកម្មភាពអនុវត្តច្បាប់ប្រឆាំងនឹង «ជនជាប់​ចោទដែលរត់​គេច​ខ្លួន» ប្រទេសចិន និងរុស្ស៊ីបានថ្កោលទោសរឿងនេះថាជា «ការប្រើប្រាស់កម្លាំងបាយយ៉ាងកំរោល» ប្រឆាំងនឹងរដ្ឋអធិបតេយ្យ៕

ប្រែសម្រួល៖ ឈាង