សេដ្ឋកិច្ច

អាមេរិកនៅតែជាទីផ្សារនាំចេញធំជាងគេរបស់កម្ពុជា ដែលសម្រេចបានជិត ១៣ ពាន់លានដុល្លារ នៅឆ្នាំ ២០២៥

បានផុស

៤ ខែ មុន

នៅ

ថ្ងៃព្រហស្បតិ៍ ៨ មករា ២០២៦

ដោយ

សហរដ្ឋអាមេរិកនៅតែជាទីផ្សារនាំចេញទំនិញធំជាងគេរបស់កម្ពុជាដែលសម្រេចបាននូវទំហំទឹកប្រាក់ ១២,៧៣ ពាន់លានដុល្លារ នៅឆ្នាំ ២០២៥ កើនឡើងពី ៩,៩ ពាន់លានដុល្លារ នៅឆ្នាំ ២០២៤ ស្មើនឹង ២៨,៤៨%។

ទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា (GDCE) បង្ហាញថា នៅក្នុងឆ្នាំ ២០២៥ ទំហំពាណិជ្ជកម្មទ្វេភាគីកម្ពុជា-អាមេរិក សម្រេចបាន ១៣,១៤ ពាន់លានដុល្លារ កើនឡើង ២៩,២៤% ក្នុងនោះ កម្ពុជានាំចេញទៅអាមេរិក មានតម្លៃ ១២,៧៣ ពាន់លានដុល្លារ កើនឡើង២៨,៤៨% ចំណែកអាមេរិកនាំចូលមកវិញ មានតម្លៃ ៤១៧ លានដុល្លារ កើនឡើង ៥៧,៨៣%។

ទំនិញដែលកម្ពុជានាំចេញទៅអាមេរិកមានដូចជា សម្លៀកបំពាក់ សម្ភារធ្វើដំណើរ កង់ និងសម្ភារប្រើប្រាស់មួយចំនួនទៀត។ ចំណែកឯអាមេរិកនាំចូលមកវិញ មានដូចជារថយន្ត គ្រឿងយន្ត គ្រឿងអលង្ការ គ្រឿងសំអាង សម្ភារអគ្គិសនី អេឡិចត្រូនិក និងសម្ភារប្រើប្រាស់មួយចំនួនទៀត។

លោក ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម មានប្រសាសន៍ថា កម្ពុជាបានចរចាយ៉ាងស្វិតស្វាញសម្រេចបានការបញ្ចុះអត្រាពន្ធពី ៤៩% មក ១៩%។

ការរក្សាបាននូវទីផ្សារអាមេរិក ដែលជាទីផ្សារធំមួយសម្រាប់ការនាំចេញសម្លៀកបំពាក់ វាយនភណ្ឌ ស្បែកជើង សម្ភារធ្វើដំណើរ របស់កម្ពុជា។ ការរក្សាបាននេះ ធ្វើបានតាមរយៈការចរចាពាណិជ្ជកម្មយ៉ាងស្វិតស្វាញប្រកបដោយជោគជ័យរបស់រាជរដ្ឋាភិបាលកម្ពុជា ឈានទៅដល់ការសម្រេចបានអត្រាពន្ធ ១៩%។

លោកបណ្ឌិត ជ័យ តិច អ្នកស្រាវជ្រាវការអភិវឌ្ឍសង្គម-សេដ្ឋកិច្ច បានបញ្ជាក់ឱ្យដឹងថា ការនាំចេញរបស់កម្ពុជា ទៅកាន់សហរដ្ឋអាមេរិកមានការកើនឡើងខ្លាំងដោយសារតែអត្រាពន្ធ ១៩% បើធៀបជាមួយសមាជិកអាស៊ាន និងប្រទេសដៃគូប្រកួតប្រជែង គឺកម្ពុជាមានប្រៀបជាង ពោលគឺស្មើតែប្រទេសឥណ្ឌូនេស៊ី លើវិស័យវាយនភណ្ឌ៕

អត្ថបទ៖ ឡេង ដេត