ព័ត៌មានជាតិ

ត្រឹមឆ្នាំ ២០២៥ សហគ្រាសនៅកម្ពុជាកើន ៤,៦ ម៉ឺន ដែលផ្ដល់ការងារដល់កម្មករ-និយោជិត ជាង ២,១៤ លាននាក់

បានផុស

៦ ខែ មុន

នៅ

ថ្ងៃសៅរ៍ ១៧ មករា ២០២៦

ដោយ

គិតត្រឹមខែធ្នូ ឆ្នាំ ២០២៥ នេះ កម្ពុជា មានរោងចក្រ សហគ្រាស សរុបចំនួន ៤,៦ ម៉ឺនសហគ្រាស ដែលផ្ដល់ការងារដល់កម្មករ-និយោជិត សរុបប្រមាណ ២,១៤ លាននាក់។ នេះបើយោងតាម លោក ស៊ុន មេសា អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានបន្តឱ្យដឹងថា រោងចក្រ និងសហគ្រាស ទាំងនោះ ត្រូវបានបែងចែកទៅតាមវិស័យសំខាន់ៗ រួមមាន វិស័យកសិកម្មចំនួន ៣៨៦ , វិស័យឧស្សាហកម្មចំនួន ៧ ៥៦៥ , វិស័យកម្មន្តសាលមាន ៤ ៩៦៤ និងវិស័យកាត់ដេរចំនួន ១ ៨៦៧ សហគ្រាស។

លោកបានគូសបញ្ជាក់ថា ការកើនឡើងចំនួន សហគ្រាស ក្រុមហ៊ុន រោងចក្រ ជាបន្តបន្ទាប់នេះ គឺជាសញ្ញាវិជ្ជមាន ដែលឆ្លុះបញ្ចាំងពីជំនឿចិត្តរបស់អ្នកវិនិយោគមកលើរាជរដ្ឋាភិបាលកម្ពុជាក្នុងការបណ្ដុះបណ្ដាលកម្លាំងពលកម្មជំនាញ។

បើតាមអ្នកនាំពាក្យដដែល បច្ចុប្បន្ន កម្ពុជា នៅមានឱកាសការងារជាង ៨ ម៉ឺនកន្លែងទៀត សម្រាប់ប្រជាពលរដ្ឋដែលកំពុងស្វែងរកការងារធ្វើ។ ជាមួយគ្នានេះ អ្នកនាំពាក្យក្រសួងការងារ ក៏បានអំពាវនាវដល់ អ្នកស្វែងរកការងារ ជាពិសេសអតីតពលករ អាចទំនាក់ទំនងមកកាន់លេខ ១២៩៧ របស់ក្រសួងការងារ និងបណ្តុះបណ្តាលវិជ្ជាជីវៈ ដែលបម្រើការ ៧ ថ្ងៃ ក្នុងមួយសប្ដាហ៍៕