កម្ពុជា–ចិន វាយតម្លៃលទ្ធផលជាក់ស្តែង នៃការបង្ក្រាបឧក្រិដ្ឋកម្មឆបោកអនឡាញ

លោក ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានមានប្រសាសន៍ថា កិច្ចសហប្រតិបត្តិការរវាងកម្លាំងអនុវត្តច្បាប់នៃប្រទេសកម្ពុជា-ចិន បាននិងកំពុងនាំមកនូវលទ្ធផលជាក់ស្តែង ប្រកបដោយទំនុកចិត្តខ្ពស់ និងការពេញចិត្តពីមួយឆ្នាំទៅមួយឆ្នាំ។ ផ្លែផ្កានៃកិច្ចសហប្រតិបត្តិការនេះ បានរួមចំណែកយ៉ាងសំខាន់ដល់ការសម្រេចបាននូវបុព្វហេតុរួម ក្នុងការថែរក្សាសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម សម្រាប់ប្រជាជននៃប្រទេសទាំងពីរ ព្រមទាំងមនុស្សជាតិក្នុងតំបន់ និងពិភពលោក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងនាមក្រសួងសន្តិសុខសាធារណៈចិន លោក LIU ZHONGYI បានកោតសរសើរ ចំពោះការដឹកនាំដ៏មុះមុត ប៉ិនប្រសប់ និងប្រកបដោយការទទួលខុសត្រូវខ្ពស់របស់លោក ស សុខា ជាពិសេសក្នុងការងារដោះស្រាយ និងបង្ក្រាបបទល្មើសឆបោកតាមប្រព័ន្ធបច្ចេកវិទ្យា។ ទន្ទឹមនឹងនេះ លោកឧបការី ក៏បានវាយតម្លៃខ្ពស់ចំពោះលទ្ធផលនៃកិច្ចសហប្រតិបត្តិការថ្មីៗ ព្រមទាំងការដាក់ចេញ និងពង្រឹងយន្តការថ្មីៗជាបន្តបន្ទាប់ ដើម្បីរួមចំណែកដោះស្រាយបញ្ហាឧក្រិដ្ឋកម្មឆបោកអនឡាញ ដែលជាបញ្ហាប្រឈមជាសាកល។

លោក LIU ZHONGYI បានបន្ថែមថា វិធានការ និងសកម្មភាពដែលរាជរដ្ឋាភិបាលកម្ពុជា បាននិងកំពុងអនុវត្ត ដោយមានក្រសួងមហាផ្ទៃជាសេនាធិការស្នូល បានបង្ហាញឲ្យសហគមន៍អន្តរជាតិមើលឃើញយ៉ាងច្បាស់ពីជំហរមិនរាថយរបស់កម្ពុជា ក្នុងការពង្រឹងការអនុវត្តច្បាប់ ដើម្បីបង្ក្រាបបទល្មើសគ្រប់ប្រភេទ សំដៅលើការលើកកម្ពស់សុវត្ថិភាព និងសន្តិសុខ សម្រាប់ប្រជាពលរដ្ឋកម្ពុជា ប្រជាជនក្នុងតំបន់ ពិភពលោក ព្រមទាំងជនជាតិចិន។ បច្ច័យនេះ ក៏នឹងរួមចំណែកលើកស្ទួយមុខមាត់កម្ពុជាលើឆាកអន្តរជាតិ និងជំរុញដល់ការអភិវឌ្ឍសេដ្ឋកិច្ចផងដែរ។

ក្នុងជំនួបដដែលនេះ លោក ស សុខា បានគូសបញ្ជាក់ពីការប្តេជ្ញាចិត្តដ៏មុតមាំរបស់រាជរដ្ឋាភិបាលកម្ពុជា ក្រោមការដឹកនាំប្រកបដោយប្រតិភាណឈ្លាសវៃ និងចក្ខុវិស័យវែងឆ្ងាយរបស់សម្តេចធិបតី ហ៊ុន ម៉ាណែត នាយករដ្ឋមន្ត្រី ក្នុងការប្រយុទ្ធប្រឆាំងបទល្មើសអនឡាញ។ ជាក់ស្តែង រាជរដ្ឋាភិបាលបានដាក់ចេញវិធានការដ៏មុតស្រួច រួមមានការបង្កើតគណៈកម្មការទទួលបន្ទុកកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (Online Scam) ជាដើម។

បើតាមប្រមុខក្រសួងមហាផ្ទៃ ក្រសួងនឹងបន្តពង្រឹង និងពង្រីកកិច្ចសហប្រតិបត្តិការជាមួយភាគីចិន បណ្ដាប្រទេសពាក់ព័ន្ធ និងអង្គការជាដៃគូផ្សេងៗទៀត ឲ្យកាន់តែសកម្ម និងមានប្រសិទ្ធភាព ស្របគ្នានឹងការដាក់ចេញវិធានការ និងយន្តការចាំបាច់ទាំងអស់ ដើម្បីពង្រឹងការអនុវត្តច្បាប់ ឈានទៅសម្រេចឲ្យបានជាអតិបរមា នូវការលុបបំបាត់បញ្ហាឧក្រិដ្ឋកម្មឆបោកតាមប្រព័ន្ធបច្ចេកវិទ្យា៕