លោកស្រី Takaichi ប្រកាស​​រំលាយសភា​នា​ថ្ងៃ​ទី២៣​មករា​

នាយករដ្ឋមន្ត្រីជប៉ុន លោកស្រី Sanae Takaichi បានប្រកាសជាផ្លូវការ​នា​ថ្ងៃចន្ទ​ទី​១៩​ខែមករា​ឆ្នាំ​២០២៦​ អំពីផែនការរំលាយសភានៅថ្ងៃសុក្រ​សប្ដាហ៍​នេះ​ ដើម្បីឈានទៅរកការបោះឆ្នោត​មុនអាណត្តិ។ នេះ​បើយោង​តាម​ទីភ្នាក់ងារ​ព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី Takaichi ដែលជានាយករដ្ឋមន្ត្រីស្ត្រីដំបូងគេរបស់ជប៉ុន កំពុងស្វែងរកអាណត្តិថ្មីត្រឹមតែ​៣​ខែ​ប៉ុណ្ណោះ​បន្ទាប់ពីចូលកាន់តំណែង ដើម្បីជំរុញរបៀបវារៈនៃការចំណាយសារពើពន្ធ «សកម្ម» និងកំណែទម្រង់សន្តិសុខដ៏ម៉ឺងម៉ាត់។ ការបោះឆ្នោត​ត្រូវបានគេរំពឹងយ៉ាងទូលំទូលាយថានឹងប្រព្រឹត្តទៅនា​ថ្ងៃទី​៨​ខែកុម្ភៈ​ឆ្នាំ​២០២៦​ខាង​មុខ។

លោកស្រីនាយករដ្ឋមន្ត្រី កំពុងទាញយកផលចំណេញពីអត្រាគាំទ្រខ្ពស់របស់គណៈរដ្ឋមន្ត្រី ដើម្បីពង្រឹងជំហររបស់គណបក្សប្រជាធិបតេយ្យសេរី (LDP) ដែលកំពុងកាន់អំណាច ខណៈដែលសម្ព័ន្ធភាពបច្ចុប្បន្នមានសំឡេងភាគច្រើនតិចតួចបំផុតនៅក្នុងសភា។ គោលនយោបាយដែលលោកស្រីបានស្នើឡើង រួមមានការបែងចែកកញ្ចប់ថវិកាកម្រិតខ្ពស់បំផុតមិនធ្លាប់មាន ដើម្បីប្រយុទ្ធប្រឆាំងនឹងអតិផរណា និងការបង្កើនការចំណាយលើវិស័យការពារជាតិយ៉ាងខ្លាំងក្លា។ ទោះជាយ៉ាងណាក៏ដោយ មេដឹកនាំបក្សប្រឆាំងបានរិះគន់ចំណាត់ការនេះ ដោយលើកឡើងថា ការរៀបចំការបោះឆ្នោតនៅពេលនេះ នឹងពន្យារពេលការអនុម័តកញ្ចប់ថវិកាសារពើពន្ធឆ្នាំ​២០២៦ និងផ្តល់អាទិភាពលើល្បែងនយោបាយ ជាជាងតម្រូវការសេដ្ឋកិច្ចចំពោះមុខរបស់ប្រជាពលរដ្ឋ។

ប្រសិនបើទទួលបានជោគជ័យ ការបោះឆ្នោតនេះអាចផ្តល់​ឲ្យ​លោកស្រី Takaichi នូវអំណាចនយោបាយចាំបាច់ ដើម្បីអនុវត្តវិធានការដែលមានភាពចម្រូងចម្រាស ដូចជាការបញ្ចុះពន្ធលើការប្រើប្រាស់អាហារមកត្រឹមសូន្យភាគរយជាបណ្តោះអាសន្ន និងជំហរការទូតកាន់តែរឹងមាំទាក់ទងនឹងសន្តិសុខក្នុងតំបន់៕

ប្រែសម្រួល៖ ឈាង