អាវុធហត្ថរាជធានីភ្នំពេញ ឆ្មក់ចុះបង្រ្កាបទីតាំង ម៉ាស្សាចំនួន ៦ទីតាំង ដែលមានបង្កប់សេវាកម្មផ្លូវភេទ

ទីតាំងម៉ាស្សាចំនួន៦ទីតាំង នៅម្តុំលូ៥ ត្រូវបានកម្លាំងអាវុធហត្ថរាជធានីភ្នំពេញ ចុះធ្វើការឡោមព័ទ្ធសង្ស័យជាប់ពាក់ព័ន្ធការបង្កប់សេវា រកស៊ីជួញដូរផ្លូវភេទ។

ប្រតិបត្តិការចុះឡោមព័ទ្ធនេះ បានធ្វើឡើងកាលពីវេលាម៉ោង១២រំលងអធ្រាត្រ ឈានចូលថ្ងៃទី២២ ខែមករា ឆ្នាំ២០២៦ ទីតាំងម៉ាស្សាខាងលើ ស្ថិតនៅម្តុំលូ៥ ស្ថិតក្នុងសង្កាត់ស្ទឹងមានជ័យ៣ ខណ្ឌមានជ័យ រាជធានីភ្នំពេញ​។

តាមប្រភពព័ត៌មានបឋមពីកម្លាំងអាវុធហត្ថបានឲ្យដឹងថា មុនចុះធ្វើការឡោមព័ទ្ធទីតាំងម៉ាស្សានេះ គឺកម្លាំងអាវុធហត្ថបានទទួលដំណឹងតាមរយៈ HOTLINE មានទីតាំងម៉ាស្សានៅម្តុំលូ៥ខាងលើ មានបង្កប់សេវាកម្មប​ម្រើផ្លូវភេទ និងមានអនីតិជនមិនទាន់គ្រប់អាយុកំពុងបម្រើការក្នុងទីតាំងទាំងនោះ។ លុះមកដល់វេលាម៉ោង១២រំលងអធ្រាត្រ កម្លាំងអាវុធហត្ថក៏បានចុះធ្វើការឡោមព័ទ្ធទីតាំងម៉ាស្សាទាំង៦ទីតាំង និងធ្វើការសាកសួរនាំទៅកាន់ម្ចាស់ទីតាំង រួមទាំងនារីៗដែលធ្វើការផ្នែកខាងក្នុង ដើម្បីប្រមូលភស្តុតាងបន្ថែម។

បច្ចុប្បន្នកម្លាំងអាវុធហត្ថបានធ្វើការនាំខ្លួនម្ចាស់ទីតាំងម៉ាស្សាខាងលើ រួមទាំងនារីៗដែលបម្រើការនៅក្នុងហាងខាងលើនោះ ទៅកាន់ការិយាល័យអាវុធហត្ថរាជធានីភ្នំពេញ ដើម្បីធ្វើការសាកសួរនាំ និងអនុវត្តបន្តតាមនីតិវិធីច្បាប់៕ អត្ថបទ៖ រដ្ឋា