ព័ត៌មានអន្ដរជាតិ

អាមេរិក ប្រាប់អ៊ីស្រាអែលពីគម្រោងវាយអ៊ីរ៉ង់បន្ថែមទៀត ប៉ុន្តែហាមអ៊ីស្រាអែល លូកដៃចូលរួម

បានផុស

២ នាទី មុន

នៅ

ថ្ងៃចន្ទ ២០ កក្កដា ២០២៦

ដោយ

សហរដ្ឋអាមេរិកបានជូនដំណឹងដល់អ៊ីស្រាអែលថា ខ្លួនមានគម្រោងបង្កើនយុទ្ធនាការយោធាប្រឆាំងនឹងអ៊ីរ៉ង់ក្នុងរយៈពេលប៉ុន្មានថ្ងៃខាងមុខ តែទីក្រុងវ៉ាស៊ីនតោនមិនឱ្យអ៊ីស្រាអែលលូកដៃជាមួយខ្លួន ដើម្បីវាយប្រហារក្នុងពេលនេះឡើយ។ នេះបើយោងតាមការចុះផ្សាយរបស់ប្រព័ន្ធផ្សព្វផ្សាយរដ្ឋអ៊ីស្រាអែល KAN កាលពីថ្ងៃអាទិត្យ។

លោក ណេតាន់យ៉ាហ៊ូ និង លោក ត្រាំ។ រូបភាព៖ AA

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដោយដកស្រង់ប្រភពសន្តិសុខអ៊ីស្រាអែល និងអាមេរិក សុំមិនបញ្ចេញឈ្មោះបានប្រាប់សារព័ត៌មាន KAN ថា ទីក្រុងវ៉ាស៊ីនតោនបានប្រាប់ទីក្រុង Tel Aviv ថា ខ្លួនចង់រក្សាអ៊ីស្រាអែលឱ្យនៅក្រៅក្នុងដំណាក់កាលបច្ចុប្បន្ននៃការកើនឡើងនេះ ទោះបីជាមានការពិភាក្សាពីសេណារីយ៉ូដែលអាចកើតមានពាក់ព័ន្ធនឹងការសងសឹករបស់អ៊ីរ៉ង់ប្រឆាំងនឹងអ៊ីស្រាអែលក៏ដោយ។

អំឡុងពេលពិគ្រោះយោបល់ជាយុទ្ធសាស្ត្ររវាងសម្ព័ន្ធមិត្តទាំងពីរបង្ហាញថា អ៊ីរ៉ង់អាចបើកការវាយប្រហារលើអ៊ីស្រាអែល បង្កឱ្យមានការសងសឹករបស់អ៊ីស្រាអែលទៅលើអ៊ីរ៉ង់វិញ ជាសេណារីយ៉ូដែលទីក្រុងវ៉ាស៊ីនតោន កំពុងស្វែងរកការជៀសវាងសម្រាប់ពេលនេះ។

សារព័ត៌មាន KAN បន្ថែមទៀតថា អាមេរិកបានពង្រឹងវត្តមានយោធារបស់ខ្លួនក្នុងតំបន់ ដោយបញ្ជូនឧបករណ៍យោធា និងគ្រាប់រំសេវបន្ថែមទៅកាន់អ៊ីស្រាអែលក្នុងរយៈពេល ២៤ម៉ោងកន្លងមកនេះ ដើម្បីគាំទ្រយន្តហោះចម្បាំងខ្លួន។

យន្តហោះចាក់ប្រេងតាមអាកាសរបស់អាមេរិកជាង ១០គ្រឿងបានទៅដល់អ៊ីស្រាអែលពីអឺរ៉ុប និងមូលដ្ឋានទ័ពអាកាស Al Udeid ក្នុងប្រទេសកាតា ជាផ្នែកមួយនៃការរៀបចំសម្រាប់ការវាយប្រហារដែលអាចកើតមានរបស់អ៊ីរ៉ង់លើមូលដ្ឋានយោធារបស់អាមេរិកក្នុងតំបន់។

ដោយឡែក គេហទំព័រព័ត៌មានអ៊ីស្រាអែល Walla ដកស្រង់ប្រភពពីកងទ័ពអាកាសអ៊ីស្រាអែល សុំមិនបញ្ចេញឈ្មោះម្នាក់ ថា យោធាអាមេរិកមានគម្រោងដាក់ពង្រាយយន្តហោះចាក់ប្រេងតាមអាកាសចំនួន ១០០គ្រឿងទៅកាន់មូលដ្ឋានទ័ពអ៊ីស្រាអែល និងអាកាសយានដ្ឋាន Ramon នៅភាគខាងត្បូងអ៊ីស្រាអែល។

ប្រភពដដែលនិយាយថា ការកើនឡើងបន្ថែមក្នុងការវាយប្រហាររបស់អាមេរិកលើអ៊ីរ៉ង់នឹងតម្រូវឱ្យមានយន្តហោះចាក់ប្រេងបន្ថែម ដើម្បីឈរជើងនៅអ៊ីស្រាអែល។

យន្តហោះមួយចំនួនក៏អាចដំណើរការពីអាកាសយានដ្ឋានអន្តរជាតិ Ben Gurion ជិតទីក្រុង Tel Aviv ដោយកត់សម្គាល់ថា យន្តហោះចាក់ប្រេងបន្ថែមចំនួន ១៤គ្រឿងរបស់អាមេរិកបានទៅដល់អ៊ីស្រាអែល កាលពីចុងសប្តាហ៍រួចហើយ។

គួរបញ្ជាក់ថា អាមេរិកបានបង្កើនការវាយប្រហារប្រឆាំងនឹងអ៊ីរ៉ង់ក្នុងរយៈពេលប៉ុន្មានថ្ងៃថ្មីៗនេះ ដោយអ៊ីរ៉ង់បានសងសឹកដោយការវាយប្រហារផ្តោតលើទីតាំង និងមូលដ្ឋានយោធាអាមេរិកនៅប្រទេសក្នុងតំបន់ជាច្រើន៕

សម្រួល៖ ណឺ មិនា