ហ្សេលេនស្គី កំពុងពិចារណាដកតំណែងអគ្គមេបញ្ជាការកងទ័ពកំពូល លោក Syrskyi​ ក្រោយ​ផ្ទុះ​ជម្លោះ​ផ្ទៃក្នុង​

សារព័ត៌មានល្បីឈ្មោះមួយរបស់អង់គ្លេស Financial Times បានចុះផ្សាយថា ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី កំពុងពិចារណាដកតំណែងអគ្គមេបញ្ជាការនៃកងកម្លាំងប្រដាប់អាវុធអ៊ុយក្រែន លោក Oleksandr Syrskyi ចេញពីតំណែង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សារព័ត៌មានអង់គ្លេសបានរាយការណ៍ជុំវិញរឿងរ៉ាវនេះ ចុះផ្សាយបន្តដោយទីភ្នាក់ងារ NHK កាលពីថ្ងៃ ទី១៩ ខែកក្កដា ផ្អែកលើការដកស្រង់សម្តីរបស់មន្ត្រីជាន់ខ្ពស់ម្នាក់នៅក្នុងរដ្ឋបាលអ៊ុយក្រែន ។ ប្រភពដដែលបានគូសបញ្ជាក់ថា លោក ហ្សេលេនស្គី បើកចិត្តក្នុងការដកលោក Syrskyi ចេញ លុះត្រាតែប្រធានាធិបតីរូបនេះ អាចស្វែងរកមេបញ្ជាការថ្មីម្នាក់ ដែលអាចធានាបាននូវការផ្ទេរអំណាចដោយរលូន ព្រមទាំងអាចបន្តរក្សាប្រព័ន្ធការពារដ៏រឹងមាំនៅតាមបណ្តោយខ្សែត្រៀមជួរមុខដែលមានប្រវែងរហូតដល់ ១,២០០ គីឡូម៉ែត្រ។

យ៉ាងណាមិញ ដំណឹងនៃការដកតំណែងដែលអាចកើតមាននេះ បានលេចឡើងចំពេលមានការផ្ទុះការតវ៉ាជាសាធារណៈនៅក្នុងប្រទេសអ៊ុយក្រែន ប្រឆាំងនឹងការដកតំណែងរដ្ឋមន្ត្រីការពារជាតិ លោក Mykhailo Fedorov កាលពីសប្តាហ៍មុន ។ នៅក្រោមការដឹកនាំរបស់លោក Fedorov យោធាអ៊ុយក្រែនបានបង្កើនការបញ្ជាទិញដ្រូនយ៉ាងច្រើន ដែលអនុញ្ញាតឲ្យពួកគេអាចបើកការវាយប្រហាររយៈចម្ងាយឆ្ងាយចូលទៅក្នុងទឹកដីរុស្ស៊ី។

លោក Fedorov និងលោក Syrskyi មានទស្សនវិស័យខុសគ្នាយ៉ាងខ្លាំង លើការកែទម្រង់រចនាសម្ព័ន្ធកងទ័ព ។ ជាក់ស្ដែង លោក Fedorov ចង់ធ្វើទំនើបកម្មយោធា និងផ្ដល់អាទិភាពលើបច្ចេកវិទ្យា ចំណែកឯថ្នាក់ដឹកនាំកងទ័ព ហាក់មានទំនោរទៅរកយុទ្ធសាស្ត្របែបប្រពៃណីទៅវិញ។

ភាពរកាំរកូសបានផ្ទុះឡើងជាសាធារណៈកាន់តែខ្លាំងឡើង នៅពេលដែលលោក Fedorov រិះគន់លោក Syrskyi ធ្ងន់ៗ ថា ជំនួសឲ្យការស្វែងរកវិធីសាស្រ្តដើម្បីវាយបំបាក់រុស្ស៊ី មេបញ្ជាការរូបនេះបែរជារកវិធីបំបែកបំបាក់ប្រទេសជាតិខ្លួនឯងទៅវិញ។ ការលើកឡើងនេះបានធ្វើឲ្យក្រុមបាតុករមួយចំនួនដែលមិនពេញចិត្តនឹងការដកតំណែងលោក Fedorov បាននាំគ្នាស្រែកទាមទារឲ្យដកលោក Syrskyi ចេញពីតំណែងអគ្គមេបញ្ជាការកងទ័ពផងដែរ។

ទោះជាយ៉ាងណាក៏ដោយ ការដកតំណែងលោក Syrskyi ប្រសិនបើកើតឡើងពិតមែននោះ វានឹងក្លាយជាចំណុចរបត់ដ៏កម្រ និងគួរឲ្យភ្ញាក់ផ្អើលបំផុតមួយនៅក្នុងប្រទេសអ៊ុយក្រែន ដោយសារតែមន្ត្រីកំពូលៗទាំងនៅក្នុងក្រសួងការពារជាតិ និងនៅក្នុងជួរកងទ័ព ត្រូវផ្លាស់ប្តូរតំណែងបន្តបន្ទាប់គ្នាយ៉ាងលឿនបែបនេះ៕

អត្ថបទ ៖ សាង ស្រីល័ក្ខ

​​លោក ហ្សេលេនស្គី តែងតាំង​រដ្ឋមន្ត្រីការពារជាតិស្តីទី ជំនួសលោក Fedorov ដែល​មានបាតុកម្ម​​​គាំទ្រ​​ដ៏ខ្លាំង​