កម្លាំងសមត្ថកិច្ចស្រាវជ្រាវបង្ក្រាប និងឃាត់ខ្លួនជនជាតិថៃ៣នាក់ ពាក់ព័ន្ធករណីគ្រឿងញៀន

ជនសង្ស័យជាជនជាតិថៃ ចំនួន០៣នាក់ ត្រូវបានកម្លាំងរបស់ការិយាល័យប្រឆាំងគ្រឿងញៀនឃាត់ខ្លួន ពាក់ព័ន្ធករណីប្រើប្រាស់គ្រឿងញៀនខុសច្បាប់

‎ អនុវត្ត​តាម​បទ​បញ្ជា​យ៉ាង​មុឺងម៉ាត់​របស់​ លោកនាយ​ឧត្ដមសេនីយ៍​ ស​ ថេត​ អគ្គស្នងការ​នគរបាល​ជាតិ​និង​ អនុវត្តតាមបទបញ្ជារបស់លោកឧត្ដមសេនីយ៍ត្រី សឿម សារិទ្ធ ស្នងការ នៃស្នងការដ្ឋាននគរបាលខេត្តបន្ទាយមានជ័យ នៅថ្ងៃទី២០ ខែកក្កដា ឆ្នាំ២០២៦ លោកឧត្ដមសេនីយ៍ត្រី ធិន ស៊ិនដេត ស្នងការរងផែនការងារប្រឆាំងគ្រឿងញៀន បានដឹកនាំកម្លាំងការិយាល័យជំនាញនិងកម្លាំងប៉ុស្តិ៍នគរបាលរដ្ឋបាលអូរជ្រៅ នៃ​អធិការ​ដ្ឋាន​នគរបាល​ក្រុង​ប៉ោយប៉ែត​ដោយទទួលព័ត៌មានពីប្រជាពលរដ្ឋល្អបានរាយការណ៍ថា មានអ្នកកំពុងប្រព្រឹត្តបទល្មើសគ្រឿងញៀន ពេលទទួលបានព័ត៌មានភ្លាម កម្លាំងយើងកំណត់គោលដៅ ឃ្លាំមើលរហូតឈានដល់ការចុះប្រតិបត្តិការបង្ក្រាបជាក់ស្តែង ឃាត់ខ្លួនសង្ស័យជនជាតិថៃបានចំនួន០២នាក់ នៅចំណុចផ្លូវសាធារណៈ ស្ថិតនៅភូមិក្បាលស្ពាន១ សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ។

ក្នុងប្រតិបត្តិការនេះកម្លាំងសមត្ថកិច្ចឃាត់ខ្លួនជនសង្ស័យបានចំនួន២នាក់ ជាជនជាតិថែ ៖ ឈ្មោះ បរិវ៉េត ថងម៉ឺន ហៅម៉ុន ភេទប្រុស អាយុ២៦ឆ្នាំ , ‎ឈ្មោះ ជីរ៉ាក់សាក់ សារ៉ាក់រ៉ាត់ ហៅកេប ភេទប្រុសអាយុ៣១ឆ្នាំ ជនជាតិថៃ។សមត្ថកិច្ចវត្ថុតាងដកហូតរួមមាន ៖ ក្បាល POD K ចំនួន០១ថង់ , ‎បារីអេឡិចត្រូនិច (វ៉េប) ចំនួន០៣ដើម។

បន្ទាប់មកនៅថ្ងៃខែឆ្នាំដដែល កម្លាំងសមត្ថកិច្ចយើងបន្តឃាត់ខ្លួន ឈ្មោះ ការ៉ាន់ កិនបូកែវ ហៅអូក ភេទប្រុសអាយុ៤៧ឆ្នាំ ជនជាតិថៃ នៅបុរីដួងចាន់ ភូមិសាមគ្គីមានជ័យ សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ ដកវត្ថុតាងដកហូតរួមមាន ៖ ក្បាល POD K វេចខ្ចប់រួច ចំនួន១៦ថង់ , បារីអេឡិចត្រូនិច (វ៉េប) ចំនួន០១ដើម , ទូរស័ព្ទដៃ ចំនួន០២គ្រឿង។

‎បច្ចុប្បន្នជនសង្ស័យរួមទាំងវត្ថុតាងត្រូវបាននាំមកការិយាល័យប្រឆាំងគ្រឿងញៀនដើម្បីកសាងសំណុំរឿងបញ្ជូនតាមនីតិវិធីច្បាប់៕

‎