សេដ្ឋកិច្ច

កម្ពុជារកចំណូលបាន $១៧៨ លាន ពីការនាំចេញផ្លែចេកស្រស់ កើនជិត ១៧%

បានផុស

៥ ខែ មុន

នៅ

ថ្ងៃអង្គារ ២៧ មករា ២០២៦

ដោយ

កម្ពុជារកចំណូលបានចំនួនជាង ១៧៨ លានដុល្លារ ពីការនាំចេញផ្លែចេកស្រស់ នៅក្នុងឆ្នាំ ២០២៥ កើនឡើង ១៦,៨៣% ធៀបនឹងរយៈពេលដូចគ្នាកាលពីឆ្នាំមុនដែលមានចំនួន ១៥២ លានដុល្លារ។ នេះបើយោងតាមរបាយការណ៍របស់ក្រសួងពាណិជ្ជកម្ម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទមានប្រសាសន៍ថា ការនាំចេញចេកស្រស់របស់កម្ពុជាទៅកាន់ទីផ្សារបរទេសមានការកើនឡើងដោយសារតែមានតម្រូវការខ្ពស់។ បរិមាណទំហំនៃការនាំចេញចំនួន ៣៤៣ ៥៧៧ តោន កើនប្រមាណ ៣០% នៅក្នុងឆ្នាំ ២០២៥។

អ្នកស្រី ហេង ដាវី ប្រធានគ្រប់គ្រងក្រុមហ៊ុន ឡុង ស្រេង បានឱ្យដឹងថា ក្នុងមួយថ្ងៃក្រុមហ៊ុនត្រូវកាប់ចេកចេញពីចម្ការពី ៦ ទៅ ៧ ពាន់ស្និតដើម្បីវេចខ្ចប់នាំចេញ ដែលមួយថ្ងៃយ៉ាងហោចណាស់មានពី ៣ កុងតឺន័រ និងអាចឈានដល់ ១០ កុងតឺន័រ នៅពេលមានតម្រូវការខ្ពស់ ដែលភាគច្រើននាំទៅទីផ្សារប្រទេសចិន និងជប៉ុន ខណៈទីផ្សារក្នុងស្រុកមានចំនួនតិចតួច។

កម្ពុជាមានផ្ទៃដីដាំដុះចេកប្រមាណជាង ១៦ ពាន់ហិកតា និងផ្ទៃដីកំពុងប្រមូលផលជាង១១ពាន់ហិកតា ដោយក្នុងនោះខេត្តដែលមានដាំដុះចេកច្រើនជាងគេ រួមមានខេត្តរតនគិរី ក្រចេះ ស្ទឹងត្រែង កំពត កំពង់ចាម និងខេត្តកំពង់ស្ពឺ។

យោងតាមក្រសួងកសិកម្ម រុក្ខាប្រមាញ់ និងនេសាទ កម្ពុជារកចំណូលបានប្រមាណ ៥ ពាន់លានដុល្លារ ពីការនាំចេញផលិតផលកសិផលប្រមាណ ១៥ លានតោន នៅក្នុងឆ្នាំ ២០២៥ កើនឡើង ២៧,៨៣% ធៀបនឹងឆ្នាំ ២០២៤ ខណៈផលិតកម្មកសិកម្មកម្ពុជា មានលទ្ធភាពគ្រប់គ្រាន់សម្រាប់ផ្គត់ផ្គង់តម្រូវការក្នុងស្រុក៕