ក្រៅពីបាល់ទាត់ Messi មានអាជីវកម្ម ៥ ផ្សេងទៀតនៅក្នុងដៃ

ខ្សែប្រយុទ្ធរបស់ Inter Miami កីឡាករ Lionel Messi ត្រូវបានគេទទួលស្គាល់ ជាកំពូលកីឡាករបាល់ទាត់មួយរូបក្នុងពិភពលោក ប៉ុន្តែក្រៅអំពីការប្រកបអាជីពជាកីឡាករបាល់ទាត់ គាត់នៅមានជំនួញធំៗជា​ច្រើន​ទៀតក្នុងដៃ។

ខាងក្រោមនេះ ជាជំនួញធំៗចំនួន ៥ របស់ Lionel Messi ដែលកំពុងកាន់កាប់ក្នុងដៃបច្ចុប្បន្ន៖

១. បដិសណ្ឋារកិច្ច៖ Messi មានសណ្ឋាគារ ដែលខ្លួនកំពុងគ្រប់គ្រងនៅទីតាំងធំៗជាច្រើនក្នុងប្រទេស អេស្ប៉ាញ ដូចជា កោះ Ibiza, Mallorca, Sitges, Baqueira និង Andorra។

២. ហ្វេសហ្ស៊ិនសម្លៀកបំពាក់៖ Messi មានហាងលក់សម្លៀកបំពាក់មួយ ដែលមានឈ្មោះ ថា ‘The Messi Store”។ ហាងរបស់គាត់មាននៅទីក្រុង Barcelona ប្រទេស អេស្ប៉ាញ និងលក់តាមអនឡាញនៅទូទាំងពិភពលោក។

៣. ភេសជ្ជៈ និង ស្រា៖ ខ្សែប្រយុទ្ធសញ្ជាតិ អាហ្សង់ទីន បច្ចុប្បន្នកំពុងជាម្ចាស់ភេស្ជៈបំពេញជាតិទឹកម៉ាក Más+ by Messi។ ជាមួយគ្នានេះ គាត់ក៏មានក្រុមហ៊ុនស្រាមួយទៀតផងដែរ ឈ្មោះ ថា 10 GOAT។

៤. ប្រព័ន្ធផ្សព្វផ្សាយ និងការកម្សាន្ត៖ 525 Rosario Media ជាក្រុមហ៊ុនប្រព័ន្ធផ្សព្វផ្សាយ ដែលស្ថិតក្រោមការគ្រប់គ្រងរបស់ Messi។ ក្រុមហ៊ុនប្រព័ន្ធផ្សព្វផ្សាយនេះ ផ្តោតសំខាន់លើរឿងជីវិតគ្រួសារ និង កីឡា។

៥. អចលនទ្រព្យ៖ ក្រៅពីជំនួញខាងលើ Messi ក៏មានក្រុមហ៊ុនវិនិយោគលើអចលទ្រព្យផងដែរ ដោយមានទីតាំងនៅទី​ក្រុង Miami, ទី​ក្រុង​ Barcelona និងទី​ក្រុង Rosario។ ក្រុមហ៊ុនវិនិយោគអចលទ្រព្យរបស់ Messi មានតម្លៃសរុប ៤០ លានដុល្លារអាមេរិក។

គួរឱ្យដឹងថា Messi បច្ចុប្បន្នស្ថិតនៅចំណាត់ថ្នាក់ទី ៣ បន្ទាប់ពី Neymar និង Cristiano Ronaldo ជាកីឡាករ​បាល់ទាត់ មានទ្រព្យសម្បត្តិច្រើនជាងចំនួន ១.០១ ពាន់លានដុល្លារអាមេរិក៕

អត្ថបទ៖ សេម កុសល