ព័ត៌មានជាតិ

ឧកញ៉ា គិត ម៉េង ណែនាំឲ្យសភាពាណិជ្ជកម្មក្រៅប្រទេសឲ្យធ្វើស្ថិតិពលរដ្ឋដើមកំណើតខ្មែរ ដើម្បីកៀរករធនធានចូលរួមអភិវឌ្ឍប្រទេសកំណើត

បានផុស

៥ ខែ មុន

នៅ

ថ្ងៃសុក្រ ៣០ មករា ២០២៦

ដោយ

ថ្លែងនៅក្នុងសន្និបាតបូកសរុបលទ្ធផលការងាររបស់សភាពាណិជ្ជកម្មកម្ពុជា អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជាបានជំរុញឱ្យមានកិច្ចសហការយ៉ាងជិតស្និទ្ធរវាងប្រធានសភាពាណិជ្ជកម្មខេត្ត និងប្រធានសភាពាណិជ្ជកម្មក្រៅប្រទេស ដើម្បីចាប់ដៃគ្នាជួយគ្នាទៅវិញទៅមក។

ក្នុងឱកាសនោះ លោកណែនាំឲ្យប្រធានសភាពាណិជ្ជកម្មក្រៅប្រទេសធ្វើស្ថិតិប្រជាពលរដ្ឋខ្មែរ ទាំងអ្នកដែលមានសញ្ជាតិដើម និងអ្នកដែលបានចូលសញ្ជាតិបរទេស ដើម្បីកៀរករធនធានជួយកសាងនិងអភិវឌ្ឍប្រទេសជាតិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកឧកញ៉ាបានបញ្ជាក់ថា ប្រជាពលរដ្ឋខ្មែរដែលបានចាកចេញទៅក្រៅប្រទេសតាំងពីឆ្នាំ ១៩៧៥ ឬ ១៩៨០ បានបន្តដល់ជំនាន់ទី ២ និងទី ៣ ដែលមានអាយុចន្លោះពី ២០ ទៅ ៣០ ឆ្នាំ។ ជំនាន់ទី ១ អាចនឹងមានវ័យចំណាស់ ហើយពួកគាត់បានផ្ទេរទ្រព្យសម្បត្តិនិងធនធានទៅឱ្យកូនចៅជំនាន់ក្រោយដែលមានសមត្ថភាពនិងធនធានច្រើន។

គោលដៅសំខាន់គឺស្វាគមន៍ពលរដ្ឋឱ្យត្រឡប់មកស្រុកខ្មែរវិញ ដើម្បីចូលរួមចំណែកជួយកសាងនិងអភិវឌ្ឍប្រទេសជាតិ ព្រោះពួកគេជាធនធានដ៏សំខាន់។

បើតាមអ្នកឧកញ៉ា កន្លងទៅការទាក់ទាញការវិនិយោគច្រើនផ្ដោតលើជនបរទេស ប៉ុន្តែយុទ្ធសាស្ត្រថ្មីនេះត្រូវយកចិត្តទុកដាក់លើពលរដ្ឋខ្មែរដែលរស់នៅក្រៅប្រទេស ដែលមានសញ្ជាតិបរទេសតែមានកំណើតជាខ្មែរ។ លោកលើកឡើងប្រទេសគោលដៅសំខាន់ៗរួមមាន បារាំង អូស្ត្រាលី នូវេហ្សេឡង់ កាណាដា និងសហរដ្ឋអាមេរិក។

គោលនយោបាយគាំទ្រពីរដ្ឋាភិបាលតាំងពីអាណត្តិរបស់សម្ដេចតេជោ បានផ្ដល់នូវទិដ្ឋាកាអចិន្ត្រៃយ៍មួយជីវិត ដែលអនុញ្ញាតឱ្យពលរដ្ឋខ្មែររស់នៅក្រៅស្រុក អាចចេញចូលស្រុកខ្មែរបានដោយមិនបាច់សុំទិដ្ឋាការឡើយ។

អ្នកឧកញ៉ាជំរុញឲ្យសភាពាណិជ្ជកម្មក្រៅប្រទេស ចាំបាច់ត្រូវផ្សព្វផ្សាយព័ត៌មាននេះឱ្យបានទូលំទូលាយ ដើម្បីឱ្យពលរដ្ឋខ្មែរនៅក្រៅស្រុកបានដឹងនិងសម្រួលដល់ការមកលេងឬវិនិយោគនៅកម្ពុជា។

បើតាមអ្នកឧកញ៉ា តំណាងសភាពាណិជ្ជកម្មកម្ពុជានៅក្រៅប្រទេសគឺជាតួអង្គយ៉ាងសំខាន់ក្នុងការអនុវត្តយុទ្ធសាស្ត្រទាក់ទាញធនធាន និងកម្លាំងសាមគ្គីពីខ្មែរនៅក្រៅស្រុកមកជួយប្រទេសជាតិវិញ៕