ព័ត៌មានអន្ដរជាតិ

កំណើនទុរេនវៀតណាម គំរាមកំហែងការឈរជើងរបស់ទុរេនថៃលើទីផ្សារចិន

បានផុស

៣ ខែ មុន

នៅ

ថ្ងៃសៅរ៍ ៣១ មករា ២០២៦

ដោយ

ការនាំចេញទុរេនរបស់វៀតណាមទៅចិន បានកើនឡើងប្រហែល ១៧% កាលពីឆ្នាំមុន បន្ទាប់ពីប្រទេសអាស៊ីអាគ្នេយ៍មួយនេះបានដោះស្រាយបញ្ហាពាក់ព័ន្ធកង្វល់សុវត្ថិភាពចំណីអាហារជាមួយអាជ្ញាធរចិន ដែលធ្វើឱ្យវៀតណាមពង្រីកចំណែកទីផ្សាររបស់ខ្លួនកាន់តែច្រើន និងគំរាមកំហែងដល់ទុរេនថៃ ដែលឈរជើងលេខ១លើទីផ្សារចិនជាច្រើនឆ្នាំមកហើយ។

ទិន្នន័យគយចិន ដែលដកស្រង់ដោយកាសែត South China Morning Post បានបង្ហាញថា វៀតណាមបាននាំចេញផ្លែទុរេនក្នុងតម្លៃ ៣,៤៤ ប៊ីលានដុល្លារទៅចិន ក្នុងឆ្នាំ ២០២៥ ដោយកើនឡើងពីត្រឹម ២,៩៤ ប៊ីលានដុល្លារ នៅឆ្នាំ ២០២៤។

ថៃ នៅតែជាអ្នកផ្គត់ផ្គង់ទុរេនកំពូលសម្រាប់ចិន ប៉ុន្តែចំណែកទីផ្សារកាន់តែធ្លាក់ចុះ ដោយការនាំចេញទៅចិននៅឆ្នាំ ២០២៤ និង ២០២៥ មានកម្រិតប្រហាក់ប្រហែលគ្នា ជាមួយទំហំសរុប ៤ ប៊ីលានដុល្លារ។

អ្នកវិភាគលើកឡើងថា កំណើននៃការនាំចេញរបស់វៀតណាម គឺដោយសារកិច្ចសហប្រតិបត្តិការជាមួយអាជ្ញាធរចិនដើម្បីដោះស្រាយកង្វល់អំពីភូតគាមអនាម័យ ក៏ដូចជាអត្ថប្រយោជន៍ផ្នែកភស្តុភារ ដែលកើតចេញពីព្រំដែនគោករួមគ្នាជាមួយចិន និងការតភ្ជាប់នៃហេដ្ឋារចនាសម្ព័ន្ធ។

រដ្ឋាភិបាលទាំងចិន និងវៀតណាម បានធ្វើការរួមគ្នាដើម្បីដោះស្រាយបញ្ហានានា ហើយអ្នកទិញជនជាតិចិន បានធ្វើដំណើរទៅវៀតណាម ដើម្បីផ្តល់ដំបូន្មានដល់អ្នកដាំដុះអំពីការកែលម្អគុណភាព នេះបើយោងតាមលោក Nguyen Thanh Trung ដែលជាអ្នកវិទ្យាសាស្ត្រនយោបាយនៅសាកលវិទ្យាល័យ Fulbright University Vietnam។

អ្នកជំនាញដដែលនិយាយយ៉ាងដូច្នេះថា៖ «ខ្ញុំគិតថា វៀតណាមអាចយកឈ្នះប្រទេសថៃទាក់ទងនឹងបរិមាណ ហើយប្រហែលជាគុណភាពផង»។

នៅដើមខែមករាកន្លងទៅ កាសែតថៃ The Nation បានរាយការណ៍ថា ចំណែកទីផ្សារផ្លែទុរេនរបស់វៀតណាមបានកើនឡើងពីគ្មានអ្វីសោះ ដល់ជាង ៤០% ក្នុងរយៈពេល ៣ ឆ្នាំនៃការចាប់ផ្តើមការនាំចេញជាផ្លូវការក្នុងឆ្នាំ ២០២០។ នេះជាកំណើនយ៉ាងឆាប់រហ័ស ដែលបង្កបញ្ហាប្រឈមដោយផ្ទាល់ចំពោះការឈរជើងយូរអង្វែងរបស់ថៃ ក្នុងនាមជាអ្នកផ្គត់ផ្គង់ផ្លែទុរេនសំខាន់របស់ចិន។

ចិនស្រូបយកជាង ៩០% នៃការនាំចេញផ្លែទុរេនទូទាំងពិភពលោក។ ផ្លែទុរេនមួយផ្លែដែលមានទម្ងន់ ៦ គីឡូក្រាម អាចលក់បានក្នុងតម្លៃរហូតដល់ ២០០ យន់ (២៨,៧៦ ដុល្លារ)។

វៀតណាមទទួលបានការអនុញ្ញាតឱ្យនាំចេញផ្លែទុរេនស្រស់ទៅចិនក្នុងឆ្នាំ ២០២២។ យ៉ាងណាមិញ នៅដើមឆ្នាំ ២០២៥ រដ្ឋបាលគយទូទៅចិនបានរកឃើញសារធាតុគីមីក្នុងទុរេនវៀតណាម និងថៃ ដែលជំរុញឱ្យមានការត្រួតពិនិត្យយ៉ាងតឹងរ៉ឹង។

អ្នកវិភាគបាននិយាយថា បើគ្មានការព្រួយបារម្ភអំពីសុវត្ថិភាពចំណីអាហារទេ វៀតណាមមានគុណសម្បត្តិជាងប្រទេសផ្គត់ផ្គង់ផ្សេងៗទៀត ដោយសារបណ្តាញអ្នកដាំដុះ អ្នកជួញដូរ ឃ្លាំង និងការពង្រីកផ្លូវតភ្ជាប់ ក៏ដូចជាព្រំដែនរួមជាប់ជិនប្រវែង ១ ២៨០ គីឡូម៉ែត្រ។ ថៃខ្វះខាតគុណសម្បត្តិទាំងនេះ៕