ប្រមុខរដ្ឋឡាវនឹងធ្វើទស្សនកិច្ចជាថ្មីនៅកម្ពុជា ដើម្បីពង្រឹងចំណងមិត្តភាពជាអ្នកជិតខាងល្អ

តបតាមការអញ្ជើញរបស់ព្រះករុណាព្រះមហាក្សត្រនៃកម្ពុជា លោក ថងលុន ស៊ីសុលីត ប្រធានរដ្ឋនៃប្រទេសឡាវ នឹងអញ្ជើញមកបំពេញទស្សនកិច្ចជាថ្មីនៅកម្ពុជា ចាប់ពីថ្ងៃទី៦ ដល់ថ្ងៃទី៧ ខែកុម្ភៈ ឆ្នាំ២០២៦ ដើម្បីពង្រឹងពង្រីកនូវចំណងមិត្តភាពរវាងកម្ពុជា និងឡាវ ដែលជាអ្នកជិតខាងល្អ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លើកឡើងក្នុងសេចក្ដីប្រកាសព័ត៌មាន នៅថ្ងៃទី៣ ខែកុម្ភៈ ឆ្នាំ២០២៦នេះ ក្រសួងការបរទេសកម្ពុជា បញ្ជាក់ថា ទស្សនកិច្ចរបស់លោក ថងលុន ស៊ីសុលីត លើកនេះជាទស្សនកិច្ចផ្លូវរដ្ឋ ដែលនឹងពង្រឹងបន្ថែមនូវចំណងមិត្តភាពដ៏កក់ក្តៅរវាងប្រទេសទាំងពីរ និងឆ្លុះបញ្ចាំងអំពីការប្តេជ្ញារួមក្នុងការពង្រឹង និងធ្វើឱ្យកាន់តែស៊ីជម្រៅបន្ថែម ទៀតនូវកិច្ចសហប្រតិបត្តិការដែលផ្តល់ផលប្រយោជន៍ទៅវិញទៅមក ស្របតាមស្មារតី “ភាពជាដៃគូ យុទ្ធសាស្ត្រគ្រប់ជ្រុងជ្រោយ និងយូរអង្វែង រវាងកម្ពុជានិងឡាវ” ដើម្បីការអភិវឌ្ឍ និងវិបុលភាពនៃប្រជាជាតិ និងប្រជាជនទាំងពីរ។

បើតាមក្រសួងការបរទេស ក្នុងដំណើរទស្សនកិច្ចផ្លូវរដ្ឋនេះ លោក ថងលុន ស៊ីសុលីត នឹងមានជំនួបសវនការជាមួយព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រកម្ពុជា នៅព្រះបរមរាជវាំង ជាមួយនឹងការអញ្ជើញដាក់កម្រងផ្កាគោរពវិញ្ញាណក្ខន្ធនៅវិមានឯករាជ្យ និងនៅមណ្ឌបព្រះបរមរូបព្រះករុណាព្រះបាទនរោត្តម សីហនុ ព្រះបរម រតនកោដ្ឋ អតីតព្រះមហាក្សត្រនៃកម្ពុជា។ បន្ថែមពីនេះ លោកប្រមុខរដ្ឋឡាវ នឹងមានជំនួបកំពូលជាមួយសម្តេចតេជោ ហ៊ុន សែន ប្រធានព្រឹទ្ធសភា។

ដំណាលនឹងទស្សនកិច្ចផ្លូវរដ្ឋ នៅភ្នំពេញនេះដែរ លោក ថងលុន ស៊ីសុលីត ដែលជាអគ្គលេខាធិការនៃគណៈកម្មាធិការមជ្ឈិមបក្សប្រជាជនបដិវត្តន៍ឡាវផងនោះ ក៏នឹងចូលរួមកិច្ចប្រជុំនយោបាយកំពូលត្រីភាគីជាមួយនឹងថ្នាក់ដឹកនាំគណបក្សកុម្មុយនីស្តវៀតណាម និងគណបក្សប្រជាជនកម្ពុជា។

តាមសេចក្ដីជូនដំណឹងរបស់គណបក្សប្រជាជនកម្ពុជា កិច្ចប្រជុំកំពូលត្រីភាគីរវាងថ្នាក់ដឹកនាំគណបក្សទាំងបីប្រទេសនេះ នឹងមានវត្តមានសម្ដេចតេជោ ហ៊ុន សែន ប្រធានគណបក្សប្រជាជនកម្ពុជា និងលោក តូ ឡឹម អគ្គលេខាធិការគណបក្សកុម្មុយនីស្តវៀតណាម និងមានការចូលរួមពីនាយករដ្ឋមន្ត្រី ថ្នាក់ដឹកនាំសភានៃប្រទេសទាំងបីផងដែរ៕

អត្ថបទ៖ធឿន វ៉ាន់សុង