កម្ពុជាបណ្ដេញចេញជនបរទេសចម្រុះជាតិសាសន៍២៨៩នាក់ ដោយសារលួចឆ្លងដែនខុសច្បាប់

សមត្ថកិច្ចបានបន្តបណ្ដេញនូវជន​បរទេសចម្រុះជាតិសាសន៍ចំនួន២៨៩នាក់ ​ចេញ​ពីប្រទេសកម្ពុជា ក្រោយរកឃើញថា ពួកគេបានលួចឆ្លងដែន និងធ្វើការស្នាក់នៅដោយខុសច្បាប់នៅក្នុងប្រទេសកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការឱ្យដឹងដោយអគ្គនាយកដ្ឋានអន្តោប្រវេសន៍ ក្នុងចំណោមជនបរទេសទាំងនោះ គឺភាគច្រើនជាជនជាតិវៀតណាម ដែលមានចំនួន១៧៦នាក់ ហើយក្រៅពីនេះមានជនជាតិបង់ក្លាដេស ចិន នីហ្សេរីយ៉ា ចិនតៃវ៉ាន់ ឥណ្ឌា និងឥណ្ឌូនេស៊ី។

ការបណ្ដេញចេញនេះ បានធ្វើឡើងកាលពីថ្ងៃទី៤ ខែកុម្ភៈ ឆ្នាំ២០២៦ ដោយកម្លាំងនាយកដ្ឋានស៊ើបអង្កេត និង​អនុវត្ត​នីតិវិធី ធ្វើការបញ្ជូនចេញមួយក្រុម តាមរយៈច្រកទ្វារព្រំដែនអន្តរជាតិបាវិត ខេត្តស្វាយរៀង និងមួយក្រុមទៀត តាមច្រកទ្វារអាកាស គឺអាកាសយានដ្ឋានអន្តរជាតិតេជោ។

គួរបញ្ជាក់ឱ្យដឹងថា នៅដើមខែកុម្ភៈឆ្នាំ២០២៦នេះ អគ្គនាយកដ្ឋានអន្តោប្រវេសន៍ នៃក្រសួងមហាផ្ទៃ បានអនុវត្តនីតិវិធីបណ្តេញជនបរទេសចម្រុះជាតិសាសន៍ចេញពីប្រទេសកម្ពុជាជាបន្តបន្ទាប់ ដោយជាក់ស្ដែងមានប្រមាណខ្ទង់ជាង១ពាន់នាក់ហើយ។ ជនបរទេសដែលត្រូវបានបណ្ដេញចេញ គឺត្រូវបានសមត្ថកិច្ចបញ្ជាក់ថាបានពាក់ព័ន្ធនឹងការល្មើសច្បាប់នៅកម្ពុជា ដូចជាករណីលួចឆ្លងដែនខុសច្បាប់ ស្នាក់នៅ និងធ្វើការដោយខុសច្បាប់ រួមទាំងពាក់ព័ន្ធទៅនឹងអំពើឆបោកតាមប្រព័ន្ធបច្ចេកវិទ្យា ជាដើម៕