ផ្លូវជាច្រើនក្នុងក្រុងបាត់ដំបង កំពុងពង្រីកទៅតាមលក្ខណៈស្តង់ដារ

ចាប់តាំងពីចុងខែមករា ឆ្នាំ២០២៦ រហូតមកទល់ពេលនេះ គេសង្កេតឃើញថា លោក លាង វាសនា អភិបាលក្រុងបាត់ដំបង បានដឹកនាំកម្លាំងចម្រុក ចុះវាស់វែង និងកំណត់គោលដៅតាមលំនៅដ្ឋានរបស់ប្រជាពលរដ្ឋ ស្ទើរគ្រប់ច្រកល្ហកដើម្បីបាញ់គំនូសក្រហមដោយតម្រូវឲ្យប្រជាពលរដ្ឋដកថយពីលើចិញ្ចើមផ្លូវ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បច្ចុប្បន្ន ក្រុមការងារចុះរបស់វែងបានដើរបាញ់គំនូសក្រហមស្ទើរគ្រប់ផ្លូវក្នុងក្រុងបាត់ដំបង ដើម្បីឲ្យប្រជាពលរដ្ឋរំកិលថយក្រោយដោយធ្វើការកាត់សំយាប រុះរើរបង ដែលស្ថិតនៅលើចិញ្ចើមផ្លូវ ត្រូវធ្វើការកាត់ចោលទាំងអស់ ដែលក្នុងនោះគេក៏ឃើញមានគ្រឿងចក្រ សម្រាប់ជួយកាយរបងថ្មណាដែលរឹងមាំ ដើម្បីងាយស្រួលដល់ម្ចាស់ដោយមិនចាំបាច់​ជួលគេឲ្យមកវាយកម្ទេចឡើយ។

ដោយយោងទៅលើការណែនាំរបស់លោក សុខ លូ អភិបាលនៃគណៈអភិបាលខេត្តបាត់ដំបង ទើបមួយរយៈនេះគេសង្កេតឃើញលោកអភិបាលក្រុង លាង វាសនា បានដឹកនាំកម្លាំងយ៉ាងសកម្មបំផុតពិសេសទៅលើកំណាត់ផ្លូវលេខ ១២១ ដែលផ្លូវមួយខ្សែនេះសំខាន់បំផុតនឹងត្រូវពង្រីកទទឹង ៣០ម៉ែត្រ ដូច្នេះហើយទើបកម្លាំងសម្រុកចុះទៅលើផ្លូវនេះដើម្បីពង្រីកមុនគេ ដោយចាប់ពីផ្លូវលេខ ៣ ទៅទល់នឹងផ្លូវលេខ ៤ ត្រង់ចំណុចខាងមុខវត្តទួលតាឯក។

ដោយឡែកផ្លូវផ្សេងៗទៀតជាច្រើនខ្សែក៏ត្រូវបានកំណត់គោលដៅឲ្យពង្រីកដូចគ្នា ដែលគេសង្កេតឃើញថា ប្រជាពលរដ្ឋកំពុងដាក់ជាងឲ្យកាត់សំយាប និងរុះរើរបងផ្ទះដែលប៉ះពាល់ ដល់ចិញ្ចើមផ្លូវសាធារណៈយ៉ាងសស្រាក់សស្រាំជាទីបំផុត ដើម្បីបង្កភាពងាយស្រួល ដល់រដ្ឋបាលខេត្តនិងមន្ទាយជំនាញក្នុងការស្ថាបនាផ្លូវជាច្រើនខ្សែទាំងនេះ ៕

អត្ថបទ៖ សោ និយមរ័ត្ន