ព័ត៌មានអន្ដរជាតិ

ត្រាំនឹងទៅចិន មុនលោកស៊ីមកអាមេរិក ក្នុងគោលបំណងស្តារចំណងមិត្តភាពឡើងវិញ

បានផុស

៤ ខែ មុន

នៅ

ថ្ងៃចន្ទ ៩ កុម្ភៈ ២០២៦

ដោយ

ប្រធានាធិបតីសហរដ្ឋអាមេរិក លោក ដូណាល់ ត្រាំ បានថ្លែងថា លោកនឹងធ្វើជាម្ចាស់ផ្ទះទទួលមេដឹកនាំចិន លោក ស៊ី ជីនពីង នៅឯសេតវិមាននៅចុងឆ្នាំនេះ ខណៈប្រទេសសេដ្ឋកិច្ចកំពូលទាំងពីររបស់ពិភពលោក កំពុងសម្លឹងមើលស្តារទំនាក់ទំនងមិត្តភាពឡើងវិញ ព្រោះតែវិបត្តិសង្គ្រាមពាណិជ្ជកម្មកើនឡើង។

លោក ត្រាំ និង លោក ស៊ី ក្នុងកិច្ចប្រជុំកំពូលមួយ។ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចុះផ្សាយរបស់ភ្នាក់ងារ AFP នៅថ្ងៃទី៩ខែកុម្ភៈ លោក ដូណាល់ ត្រាំ បានធ្វើបទសម្ភាសន៍ជាមួយសារព័ត៌មាន NBC News កាលពីថ្ងៃពុធ ទី ៤ខែកុម្ភៈ ក្នុងថ្ងៃតែមួយដែលខ្លួននិង លោក ស៊ី ធ្វើការសន្ទនាយ៉ាងច្រើនពីពាណិជ្ជកម្ម បញ្ហាតៃវ៉ាន់ សង្រ្គាមរុស្ស៊ីនិងអ៊ុយក្រែន ជាពិសេសស្ថានភាពនៅអ៊ីរ៉ង់។

លោក ត្រាំ រំពឹងថាខ្លួននឹងទៅទស្សនកិច្ចប្រទេសចិនក្នុងខែមេសា មុនពេលលោក ស៊ី ជីនពីង មកបំពេញទស្សនកិច្ចនៅសហរដ្ឋអាមេរិកចុងឆ្នាំនេះ។

លោក ដូណាល់ ត្រាំ បានបន្តក្នុងបទសម្ភាសន៍ ដែលផ្សាយកាលពីថ្ងៃអាទិត្យថា៖ « គាត់(លោក ស៊ី) នឹងមកសេតវិមាន! មែនហើយ! គឺនៅដំណាច់ឆ្នាំនេះ។ លើសពីនេះប្រទេសទាំងពីរគឺជាប្រទេសដែលមានឥទ្ធិពលបំផុត នៅក្នុងពិភពលោក ហើយពួកយើងមានទំនាក់ទំនងល្អណាស់»។

គួរបញ្ជាក់ថា លោក ស៊ី ជីនពីង ដែលបានទៅបំពេញទស្សនកិច្ចចុងក្រោយរបស់ខ្លួន នៅសហរដ្ឋអាមេរិកក្នុងឆ្នាំ ២០២៣ និងបានព្រមាន លោក ដូ ណាល់ ត្រាំ កាលពីថ្ងៃពុធថា៖ «ឱ្យបន្តការប្រុងប្រយ័ត្ន លើការលក់អាវុធទៅតៃវ៉ាន់»។

មិនតែប៉ុណ្ណោះ មេដឹកនាំចិនរូបនេះក៏បានសម្តែងក្តីសង្ឃឹមថា បញ្ហាទ្វេភាគី រួមទាំងពាណិជ្ជកម្មអាចត្រូវបានដោះស្រាយ ដោយសម្ព័ន្ធមិត្តរវាងទីក្រុងប៉េកាំង និងទីក្រុងវ៉ាស៊ីនតោន។

លោក ស៊ី ជីនពីង បានសង្កត់ធ្ងន់ថា៖ «តាមរយៈការដោះស្រាយបញ្ហាម្តងមួយៗ និងបន្តកសាងទំនុកចិត្តឱ្យគ្នាទៅវិញទៅមក យើងអាចបង្កើតផ្លូវត្រឹមត្រូវមួយសម្រាប់ប្រទេសទាំងពីរ និងភាពចុះសម្រុងរវាងគ្នា កាន់តែល្អប្រសើរ»។ នេះបើយោងតាមទូរទស្សន៍ជាតិ CCTV ។

ទន្ទឹមនឹងនេះ លោក ត្រាំ បាននិយាយថា៖ « ការសន្ទនាជាមួយ លោក ស៊ី គឺល្អណាស់ ហើយយើងទាំងពីរដឹងថាវាមានសារៈសំខាន់ប៉ុណ្ណា ក្នុងការរក្សាទំនាក់ទំនងនេះឱ្យនៅដដែល»៕

ប្រែសម្រួល៖ ណឺ មិនា