នៅ ខនកែន! ភូមិចៃថៃ បានសំឡេង ៩ ៨៩០ លុះបក្សប្រជាជនតវ៉ា ទើបមន្ត្រីរាប់សន្លឹកឆ្នោត ព្រមដកលេខ ០ ចោលវិញ

ការបោះឆ្នោតនៅប្រទេសថៃ ពោរពេញដោយភាពមិនប្រក្រតីនិងចម្រូងចម្រាស តាំងពីការចាប់ផ្តើមបើកការិយាល័យបោះឆ្នោតរហូតដល់ពេលរាប់សន្លឹកឆ្នោត។ ជាពិសេសករណីមិននឹកស្មានដល់មួយនៅខេត្ត ខនកែន ដែលមានការដាក់លទ្ធផលខុសសម្រាប់គណបក្សភូមិចៃថៃ លុះដល់មានការតវ៉ា ទើបកែប្រែវិញ។ នេះបើតាមការផ្សាយរបស់ Thaiger នៅថ្ងៃចន្ទទី៩ខែកុម្ភៈឆ្នាំ២០២៦។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Chatchawan Apirakmanmong បេក្ខជនសមាជិកសភាប្រចាំមណ្ឌល ៣ ខេត្ត ខនកែន មកពីគណបក្សប្រជាជន បានបង្ហោះរូបភាពនៃលទ្ធផលបោះឆ្នោតក្នុងមណ្ឌលនោះ ដែលក្នុងរូបភាព បង្ហាញពីការប្រៀបធៀបលទ្ធផលនៅវេលាម៉ោង ២ រំលងអធ្រាត្រ និងម៉ោង ៧ ព្រឹក។

គេឃើញថា នៅម៉ោង ២ រំលងអធ្រាត្រ បេក្ខជនខាងគណបក្សភូមិចៃថៃ ទទួលបានសម្លេងឆ្នោតច្រើនហួសដល់ ៩ ៨៩០ សំឡេងទាំងដែលតួលេខអ្នកចេញទៅបោះឆ្នោតមិនទាន់រាប់ច្បាស់។

យ៉ាងណា បន្ទាប់ពីមានការតវ៉ា នៅម៉ោង៧ព្រឹក មន្ត្រីរាប់សន្លឹកឆ្នោតក៏បានកែតួលេខវិញ ដោយលុបលេខ 0 ចោល នៅសល់ត្រឹម ៩៨៩ សំឡេង។

ពាក់ព័ន្ធរឿងនេះ Chatchawan បានបង្ហាញក្តីបារម្ភថា អាចមានកំហុសជាច្រើនទៀតនៅមណ្ឌលផ្សេងៗ ហើយលោកក៏ត្រៀមដាក់ពាក្យបណ្តឹងរួចហើយផងដែរ។

ចំណែកនៅ ខេត្ត មហាសារ៉ាខាម ក្រុមនិស្សិតបានចេញមកតវ៉ាតាំងពីយប់រហូតដល់ភ្លឺ ទាមទារឲ្យរាប់សន្លឹកឆ្នោតឡើងវិញ ដោយសារតែភាពមិនប្រក្រតីក្នុងដំណើរការរាប់សន្លឹកឆ្នោត។

ក្រុមនិស្សិតបានទាមទារឲ្យមានការរាប់សន្លឹកឆ្នោតឡើងវិញនៅក្នុងមណ្ឌលបោះឆ្នោតទី១ ខណៈមកដល់ម៉ោង៣ភ្លឺទៅហើយនោះ ពួកគេនៅតែជួបជុំ មិនព្រមបំបែកគ្នាឡើយ។

ចំណែកនៅ ឈុនបុរី, ក្រុមអ្នកបោះឆ្នោត និងតំណាងគណបក្សនយោបាយក្នុងខេត្តនេះ បានលើកគ្នាមកឡោមព័ទ្ធទីតាំងរក្សាទុកហិបឆ្នោត ដើម្បីពិនិត្យមើលថា តើសន្លឹកឆ្នោតរបស់ពួកគេនៅរក្សាសុវត្ថិភាព និងមិនមានការកែឬក្លែងបន្លំដែរឬទេ ខណៈមានហេតុការណ៍ដាច់ចរន្តអគ្គិសនីក្នុងអំឡុងពេលរាប់ឆ្នោតនៅតាមមណ្ឌលមួយចំនួន ដូចជានៅតំបន់ Bang Saen ដែលភ្លើងបានដាច់អស់រយៈពេលជាង ៤០ នាទី៕

អត្ថបទ៖ សុខ សុវណ្ណ