ព័ត៌មានអន្ដរជាតិ

រដ្ឋមន្រ្តីថាមពលអាមេរិក នឹងទៅវ៉េណេស៊ុយអេឡា ដើម្បីធ្វើកំណែទម្រង់លើវិស័យប្រេង

បានផុស

៥ ខែ មុន

នៅ

ថ្ងៃអង្គារ ១០ កុម្ភៈ ២០២៦

ដោយ

រដ្ឋមន្ត្រីថាមពលសហរដ្ឋអាមេរិក លោក Chris Wright គ្រោងធ្វើទស្សនកិច្ចទៅកាន់ប្រទេសវ៉េណេស៊ុយអេឡា ក្នុងពេលឆាប់ៗនេះ ជួបជាមួយថ្នាក់ដឹកនាំរដ្ឋាភិបាល និងពិភាក្សាពីអនាគតរបស់ក្រុមហ៊ុនប្រេង គ្រប់គ្រងដោយរដ្ឋក្នុងប្រទេសនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចុះផ្សាយ Latin Times នៅថ្ងៃទី៩ ខែកុម្ភៈ, លោក Wright លើកហេតុផលថា ធនធានប្រេងមិនមែនជាកត្តាសំខាន់ នៅពីក្រោយចំណាត់ការរបស់រដ្ឋបាល លោក ដូណាល់ ត្រាំ ប្រឆាំងនឹងមេដឹកនាំត្រូវគេទម្លាក់ពីតំណែងគឺ លោក នីកូឡាស ម៉ាឌូរ៉ូ នោះទេ។

នៅក្នុងបទសម្ភាសន៍ជាមួយកម្មវិធី Energy របស់សារព័ត៌មាន POLITICO លោក Wright បាននិយាយថា៖ «ការដកអតីតមេដឹកនាំ លោក ម៉ាឌូរ៉ូ មិនមែនជាការផ្លាស់ប្តូរ ដែលអាចផ្គត់ផ្គង់ប្រេងបន្ថែមបាននោះទេ។ ចំណែកទុនបម្រុងប្រេងឆៅរបស់វ៉េណេស៊ុយអេឡាក៏មិនមែនជាការសម្រេចចិត្តរបស់នរណាម្នាក់នោះដែរ»។

លោកបានពណ៌នាពីស្ថានភាពបច្ចុប្បន្នជំនួសឱ្យបញ្ហាភូមិសាស្ត្រនយោបាយ ដោយបានហៅប្រទេសវ៉េណេស៊ុយអេឡា ក្រោមការដឹកនាំរបស់លោកម៉ាឌូរ៉ូថា ជាការគំរាមកំហែងដល់អ្នកជិតខាងទាំងអស់ ពិសេសដល់អឌ្ឍគោលលោកខាងលិចផងដែរ។

លោក បានបន្តថា៖ « វាអាចជារឿងចៃដន្យមួយ ប៉ុន្តែវាជារឿងចៃដន្យដែលផលិតផលសំខាន់ និងធនធានយក្សរបស់វ៉េណេស៊ុយអេឡា គឺប្រេង»។

លោក Wright បានបន្តទៀតថា ដំណើរទស្សនកិច្ចរបស់ខ្លួននឹងបញ្ចូលទាំងកិច្ចប្រជុំជាមួយមេដឹកនាំបណ្តោះអាសន្ន លោកស្រី Delcy Rodríguez និងមន្ត្រីផ្នែកថាមពល ផ្តោតលើកំណែទម្រង់ការគ្រប់គ្រងរបស់ក្រុមហ៊ុនប្រេងជាតិ Petróleos de Venezuela របស់ប្រទេសនេះ។

ប្រធានាធិបតី លោក ដូណាល់ ត្រាំ បាននិយាយថា សហរដ្ឋអាមេរិកមានគោលបំណងជួយស្តារឡើងវិញ នូវវិស័យប្រេងរបស់ប្រទេសវ៉េណេស៊ុយអេឡា និងអាចរួមចំណែកដល់តម្លៃថាមពលទាប។

យ៉ាងណា លោក Wright បានលើកឡើងកាលពីចុងខែមករាថា សហរដ្ឋអាមេរិកនឹងមិនផ្តល់ការធានាសុវត្ថិភាព ដល់ក្រុមហ៊ុនដែលកំពុងប្រតិបត្តិការនៅប្រទេសនេះទេ។

លោកប្រាប់កាសែត Bloomberg ថា៖ « យើងមិនចូលរួម ធានាផ្នែកសន្តិសុខមូលដ្ឋាន សម្រាប់ប្រជាជននៅវ៉េណេស៊ុយអេឡាទេ ពិសេសក្រុមហ៊ុនប្រេង និងឧស្ម័នមានទម្លាប់ធ្វើការក្នុងបរិយាកាសស្មុគស្មាញ»៕

ប្រែសម្រួល៖ ណឺ មិនា