ព័ត៌មានអន្ដរជាតិ

ចិនចង់ដឹងពីជំហរបើកចំហរបស់ជប៉ុន ក្រោយលោកស្រី Takaichi ថ្លែងបញ្ឆិតបញ្ឆៀង

បានផុស

៣ ខែ មុន

នៅ

ថ្ងៃពុធ ១១ កុម្ភៈ ២០២៦

ដោយ

អ្នកនាំពាក្យក្រសួងការបរទេសចិន បានទទូចឱ្យទីក្រុងតូក្យូបង្ហាញជំហរស្មោះត្រង់ដោយបើកចំហចំពោះកិច្ចសន្ទនាផ្លូវការជាមួយទីក្រុងប៉េកាំង បន្ទាប់ពីនាយករដ្ឋមន្ត្រីជប៉ុន លោក ស្រី សាណាអេ តាកាអ៊ិឈិ (Sanae Takaichi) លើកឡើងអំឡុងពេលជាប់ឆ្នោតថ្មីៗនេះ។

**លោក Lin Jian** ។ រូបភាព៖ ក្រសួងការបរទេសចិន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចុះផ្សាយភ្នាក់ងារ AFP នៅថ្ងៃទី១០ ខែកុម្ភៈ ឱ្យដឹងថា សកម្មភាពដែលចិនចង់បានទាំងនោះរួមទាំងការលើកឡើង កាលពីខែវិច្ឆិការបស់លោកស្រី តាកាអ៊ិឈិ ថាទីក្រុងតូក្យូអាចធ្វើអន្តរាគមន៍ផ្នែកយោធា បើចិនធ្វើការវាយប្រហារណាមួយលើកោះតៃវ៉ាន់។ ការណ៍នេះនាំឱ្យមានជម្លោះការទូតអស់រយៈពេលជាច្រើនខែជាមួយទីក្រុងប៉េកាំង។

មួយថ្ងៃបន្ទាប់ពីឈ្នះការបោះឆ្នោតភ្លូកទឹកភ្លូកដី លោកស្រី តាកាអ៊ិឈិ បានប្រាប់អ្នកយកព័ត៌មានថា៖ «ប្រទេសជប៉ុនបើកចំហការសន្ទនាជាមួយចិន»។

យ៉ាងណាអ្នកនាំពាក្យក្រសួងការបរទេសចិន លោក Lin Jian បានស្តាប់ការលើកឡើងរបស់លោកស្រី កាលពីថ្ងៃអង្គារ និងឆ្លើយតបថា៖ «ការសន្ទនាដ៏ពិតប្រាកដមួយ គួរតែត្រូវបានធ្វើឡើងដោយការគោរពគ្នាទៅវិញទៅមក»។

លោកបានប្រាប់សន្និសីទសារព័ត៌មួយថា៖«ការប្រកាសការសន្ទនាតែមាត់ទទេរបស់នរណាម្នាក់ ពេលកំពុងប្រឈមមុខដាក់គ្នា គ្មាននរណាម្នាក់នឹងទទួលយកការសន្ទនាប្រភេទនេះទេ»។

មិនតែប៉ុណ្ណោះ ជម្លោះកាទូតរវាងប្រទេសទាំងពីរ ប្រទេសចិនបានហាមឃាត់ពលរដ្ឋខ្លួនធ្វើដំណើរទៅប្រទេសជប៉ុន ជាពិសេសបិទការនាំចេញផលិតផលកម្រមួយចំនួនផងដែរ។

លោក Lin បាននិយាយកាលពីថ្ងៃអង្គារថា៖ «ទីក្រុងតូក្យូត្រូវតែបង្ហាញពីបំណងស្មោះត្រង់សម្រាប់ការសន្ទនា តាមរយៈសកម្មភាពជាក់ស្តែង»។

លោកបានសង្កត់ធ្ងន់ថា៖ « ប្រសិនបើប្រទេសជប៉ុនពិតជាចង់ស្តារទំនាក់ទំនងជាយុទ្ធសាស្ត្រ និងផ្តល់ផលប្រយោជន៍ទៅវិញទៅមកជាមួយប្រទេសចិន វាងាយស្រួល និងច្បាស់លាស់ណាស់ថាដកការលើកឡើងទាំងខុសរបស់ លោកស្រីតាកាអ៊ិឈិ អំពីកោះតៃវ៉ាន់»។

គួរបញ្ជាក់ថា លោកស្រី តាកាអ៊ិឈិ ទទួលសំឡេងគាំទ្រជាប្រវត្តិសាស្ត្រ បន្ទាប់ពីគណបក្ស LDP និងគណបក្ស Ishin ឈ្នះឆ្នោតដ៏ច្រើនលើសលប់រហូតដល់ ៣៥២អាសនៈ ក្នុងការបោះឆ្នោតកាលពីថ្ងៃអាទិត្យទី៨ខែកុម្ភៈ។ ជ័យជម្នះនេះនឹងផ្ដល់ឱ្យលោកស្រីនូវអំណាចកំពូលៗ ដែលផ្លាស់ប្តូររបៀបដឹកនាំប្រទេសជប៉ុនទាំងស្រុង៕

ប្រែសម្រួល៖ ណឺ មិនា