លោកហ្សេលេនស្គី ជំរុញឲ្យមានកិច្ចប្រជុំកំពូលកម្រិត​មេដឹកនាំនៅហ្សឺណែវ

ក្នុងជំហានដ៏ម៉ឺងម៉ាត់មួយដើម្បីបំបែកភាពទាល់ច្រកនៅទីក្រុងហ្សឺណែវ ប្រធានាធិបតី វ៉ូឡូឌីមៀរ ហ្សេលេនស្គី បានអំពាវនាវ​ឲ្យ​មានកិច្ចប្រជុំកំពូលកម្រិតខ្ពស់រវាងរូបលោកផ្ទាល់ ប្រធានាធិបតី​អាមេរិក ដូណាល់ ត្រាំ និង​មេ​ដឹកនាំ​រុស្ស៊ី​ វ្ល៉ាឌីមៀរ ពូទីន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងបទសម្ភាសន៍ជាមួយ Axios នា​ថ្ងៃទី​១៨​ខែ​កុម្ភៈ​ឆ្នាំ​២០២៦​នេះ លោកហ្សេលេនស្គី បានអះអាងថា ចំណុចរបត់លើបញ្ហាដែនដីអាចកើតឡើងបាន ទាល់​តែមានកិច្ច​ចរចាផ្ទាល់រវាងមេដឹកនាំ។ ភាពតានតឹងបានហក់ឡើងដល់កម្រិតខ្ពស់ថ្មី បន្ទាប់ពីមានសំណើពី​អាមេរិកក្នុងការប្រែក្លាយតំបន់ Donbas ឲ្យទៅជា «តំបន់សេដ្ឋកិច្ចសេរី» គ្មានយោធា។ ខណៈអាមេរិកមិនទាន់កំណត់ថាប្រទេសណាជាម្ចាស់ដី ផែនការនេះតម្រូវ​ឲ្យ​មានការដកទ័ពចេញពីភាគីទាំងសងខាង ដែលជាលក្ខខណ្ឌមួយដែលលោក​ហ្សេលេនស្គី​ព្រមទទួលយក លុះត្រាតែរុស្ស៊ីដកទ័ពក្នុងចម្ងាយស្មើគ្នា និងមិនទាមទារអធិបតេយ្យភាពលើតំបន់នោះ។

លោក​ហ្សេលេនស្គី​នៅតែរក្សាជំហររឹងមាំ ដោយបញ្ជាក់ថា លោកនឹងមិនទទួលយកកិច្ចព្រមព្រៀងណាដែលបង្ខំ​ឲ្យ​អ៊ុយក្រែនដកទ័ពតែម្ខាងឡើយ។ នៅពេលដែលមន្ត្រីរុស្ស៊ីត្រៀមបង្ហាញ «ជំហរលម្អិត» លើវិវាទដែនដីនៅថ្ងៃពុធ​នេះ លោក​ហ្សេលេនស្គី ថែមទាំងបានលើកឡើងពីគំនិតនៃការធ្វើប្រជាមតិថ្នាក់ជាតិ ដើម្បីធានាថា កិច្ចព្រមព្រៀងសន្តិភាពចុងក្រោយណាមួយ ត្រូវតែមានការគាំទ្រផ្ទាល់ពីប្រជាជនអ៊ុយក្រែន៕

ប្រែសម្រួល៖ ឈាង