ព័ត៌មានអន្ដរជាតិ

អ៊ីរ៉ង់បានស្តារឡើងវិញយ៉ាងឆាប់រហ័សនូវហេដ្ឋារចនាសម្ព័នុ្ធយោធាដែលខូចខាត និង ពង្រឹងបន្ថែម

បានផុស

២ ខែ មុន

នៅ

ថ្ងៃអង្គារ ២៤ កុម្ភៈ ២០២៦

ដោយ

អ៊ីរ៉ង់បានធ្វើសកម្មភាពមួយចំនួនដើម្បីត្រៀមខ្លួនសម្រាប់ការវាយប្រហារដែលអាចកើតមានពីសំណាក់អាមេរិក សកម្មភាពទាំងនោះ រួមទាំងការពង្រឹងមូលដ្ឋាននុយក្លេអ៊ែរ កសាងរោងចក្រមីស៊ីលដែលខូចខាតឡើងវិញ ព្រមទាំងធ្វើសមយុទ្ធនៅលើសមុទ្រ។ ខណៈពេលនេះ អាមេរិកកំពុងបញ្ជូនកងកម្លាំងសំខាន់ៗទៅកាន់មជ្ឈិមបូព៌ា និងកិច្ចចរចានុយក្លេអ៊ែរនៅទីក្រុងហ្សឺណែវ ប្រទេសស្វីស កាលពីថ្ងៃទី១៧កុម្ភៈ ប៉ុន្តែភាគីទាំងពីរមិនទាន់ទទួលបានលទ្ធផលច្បាស់លាស់នៅឡើយទេ។

កាលពីខែមិថុនា ឆ្នាំ២០២៥ យោធា អ៊ីស្រាអែលបានចាប់ផ្តើមយុទ្ធនាការវាយប្រហារអ៊ីរ៉ង់ និងបំផ្លាញរោងចក្រនុយក្លេអ៊ែរមួយផ្នែក ដែលបណ្តាលឲ្យខូចខាតយ៉ាងធ្ងន់ធ្ងរដល់មូលដ្ឋានជាច្រើន ឃ្លាំងអាវុធ និងរោងចក្រមីស៊ីល និងបានសម្លាប់មេបញ្ជាការយោធាសំខាន់ៗជាច្រើនរូបក្នុងប្រទេសអ៊ីរ៉ង់។ ទោះបីជាមានការខាតបង់យ៉ាងធ្ងន់ធ្ងរនៅក្នុងជម្លោះក៏ដោយ អ៊ីរ៉ង់ទើបតែបានជួសជុលមូលដ្ឋានមីស៊ីលដែលខូចខាតឡើងវិញតែប៉ុណ្ណោះ។ នេះបើយោងតាម CNN។

រូបភាពផ្កាយរណបនៃមូលដ្ឋានមីស៊ីល Imam Ali នៅ Khorramabad នៅខែមករា បង្ហាញថា អគារចំនួនបីក្នុងចំណោមអគាររាប់សិបខ្នងដែលត្រូវបានបំផ្លាញដោយអ៊ីស្រាអែល សុទ្ធតែត្រូវបានសាងសង់ឡើងវិញ ក្នុងនោះដែរ មានមួយកំពុងត្រូវបានជួសជុល និងបីផ្សេងទៀតកំពុងសាងសង់។ ចំណែក មូលដ្ឋានយោធាអ៊ីរ៉ង់ពីរផ្សេងទៀតក៏កំពុងស្ថិតក្រោមការជួសជុលទ្រង់ទ្រាយធំ។

ដោយឡែក នៅមូលដ្ឋានមីស៊ីល Tabriz ភាគខាងជើងប្រទេសវិញ កម្មករបាននិងកំពុងសម្អាតឧបសគ្គនៅច្រកចូលទាំងអស់ បើកលេណដ្ឋានក្រោមដីមួយចំនួនឡើងវិញ និងសាងសង់រចនាសម្ព័ន្ធភាគច្រើនឡើងវិញ។ អ៊ីរ៉ង់បានរុះរើរណ្ដៅគ្រាប់បែកនៅភាគខាងលិចប្រទេស ព្រមទាំងរោងចក្រផលិតឥន្ធនៈដ៏ធំ និងទំនើបបំផុតនៅ Shahrud ដោយធានាបាននូវការផ្គត់ផ្គង់ឥន្ធនៈ ដែលអនុញ្ញាតឲ្យសាងសង់មីស៊ីលរយៈចម្ងាយឆ្ងាយអាចបាញ់បង្ហោះបានក្នុងរយៈពេលខ្លី។

យោងតាមវិទ្យាស្ថានវិទ្យាសាស្ត្រ និងសន្តិសុខអន្តរជាតិ (ISIS) បញ្ចាក់ថា រូបភាពផ្កាយរណបកាលពីថ្ងៃទី ១០ខែកុម្ភៈ បង្ហាញថា អ៊ីរ៉ង់កំពុងពង្រឹងច្រកចូលផ្លូវរូងក្រោមដីដ៏ស្មុគស្មាញមួយមួយក្បែរ Natanz។ បេតុងដែលចាក់ថ្មីៗបានលេចឡើងនៅច្រកចូលខាងកើត និងខាងលិចនៃរោងចក្រ ដែលបង្កើនភាពធន់ដើម្បីការពាររចនាសម្ព័ន្ធពីការវាយប្រហារតាមអាកាសដែលអាចកើតមាន។ នៅកន្លែងសាងសង់ មានឡានដឹកទំនិញ និងឧបករណ៍សំណង់ជាច្រើនទៀត។ ជាពិសេស នាពេលថ្មីៗនេះកងទ័ពជើងទឹក ក៏បានធ្វើសមយុទ្ធរួមគ្នាជាមួយរុស្ស៊ីនៅឈូងសមុទ្រអូម៉ង់ និងភាគខាងជើងនៃមហាសមុទ្រឥណ្ឌា រួមទាំងការសង្គ្រោះកប៉ាល់ដែលត្រូវបានប្លន់ផងដែរ។

ទោះជាយ៉ាងណាក៏ដោយ អ្នកជំនាញជាច្រើនសុទ្ធតែនិយាយថា ទីក្រុងតេហេរ៉ង់កំពុងផ្ញើសារទៅកាន់ទីក្រុងវ៉ាស៊ីនតោន ខណៈដែលអាមេរិកបញ្ជូនកងកម្លាំងទៅកាន់តំបន់នេះ ដើម្បីត្រៀមខ្លួនសម្រាប់ជម្លោះដែលអាចកើតមាន។ យោងតាមលោក Vali Nasr សាស្ត្រាចារ្យនៅសាកលវិទ្យាល័យ Johns Hopkins យុទ្ធសាស្ត្ររបស់អ៊ីរ៉ង់គឺបញ្ចុះបញ្ចូលអាមេរិកថា នេះមិនដូចជម្លោះក្នុងខែមិថុនា ឆ្នាំ ២០២៥ ឬយុទ្ធនាការចាប់ខ្លួនមេដឹកនាំវ៉េណេស៊ុយអេឡានោះទេ។ សហរដ្ឋអាមេរិកនឹងប្រឈមមុខការខាតបង់មួយចំនួន ហើយត្រូវតែពិចារណារឿងនេះដោយប្រុងប្រយ័ត្ន មុនពេលវាយប្រហារអ៊ីរ៉ង់៕

អត្ថបទ៖ សាង ស្រីល័ក្ខ