អាជ្ញាធរខណ្ឌ៧មករា ចុះត្រួតពិនិត្យទីតាំងសង្ស័យលួចលាក់លេងល្បែងស៊ីសងនៅតំបន់បុរីកីឡា

កម្លាំងនគរបាលប៉ុស្តិ៍រដ្ឋបាលវាលវង់ នៃអធិការដ្ឋាននគរបាលខណ្ឌ៧មករា បានចុះត្រួតពិនិត្យភ្លាមៗ នៅទីតាំងតំបន់អាគារបុរីកីឡា ក្រោយមានបណ្ដោញសង្គម ផ្សព្វផ្សាយថាមានលួចលាក់ បើកលេងល្បែងស៊ីសងជាប្រភេទបៀការ៉ាត់អនឡាញ និងមានមនុស្សក្មេងចាស់ប្រុសស្រីចេញចូលលេងយ៉ាងអនាធិបតេយ្យ។

ជាក់ស្ដែងនៅព្រឹកថ្ងៃទី២៦ ខែកុម្ភៈ ឆ្នាំ២០២៦នេះ កម្លាំងនគរបាលប៉ុស្តិ៍រដ្ឋបាលវាលវង់នៃអធិការដ្ឋាននគរបាលខណ្ឌ៧មករា បានចុះត្រួតពិនិត្យ ទីតាំងស្ថិតនៅបុរីកីឡា ក្រោមអាគារទី២ ជាន់ផ្ទាល់ដី ភូមិ១២ សង្កាត់វាលវង់ ខណ្ឌ៧មករា ពុំឃើញមានអ្វីពាក់ព័ន្ធ ល្បែងស៉ីសងដូចដែលបណ្ដាញសង្គម បានចុះផ្សព្វផ្សាយនោះឡើយ។

មន្រ្តីនគរបាលបានបញ្ជាក់បន្ថែមថា ទីតាំងរូបភាពដែលបណ្ដាញសង្គមបានផ្សព្វផ្សាយជារូបភាពចាស់ ដែលកន្លងទៅ អាជ្ញាធរប៉ុស្តិ៍និងខណ្ឌបានចុះបង្ក្រាប់។

សូមបញ្ជាក់ផងដែរ បច្ចុប្បន្នរដ្ឋបាលរាជធានីភ្នំពេញកំពុង មានវិធានការយ៉ាងមុតមាំក្នុងយុទ្ធនាការ បោសសម្អាតល្បែងស៉ីសងគ្រប់ប្រភេទ ក្នុងភូមិសាស្រ្តរាជធានីភ្នំពេញ ហើយឯកឧត្តម ឃួង ស្រេង អភិបាលរាជធានីភ្នំពេញក៏បានណែនាំឱ្យខណ្ឌទាំង១៤ ត្រូវម្ចាស់ការក្នុងការបោសសម្អាត និងប្រយុទ្ធប្រឆាំងបទល្មើសឆបោកតាមប្រព័ន្ធបច្ចេកវិទ្យា ល្បែងស៊ីសងគ្រប់ប្រភេទ និងគ្រឿងញៀនផងដែរ ពោលគឺត្រូវអនុវត្តគោលនយោបាយភូមិ សង្កាត់មានសុវត្ថិភាពឱ្យបានល្អ៕ អត្ថបទ៖ សុភា