កីឡា

ឧក រដ្ឋា សម្រេចបំណងឈ្នះពានជូនក្លឹបជាការតបស្នង ខណៈការប្រកួតនេះខ្លួនកើនឡើងសមត្ថភាពជាងមុន

បានផុស

២ ខែ មុន

នៅ

ថ្ងៃអង្គារ ៣ មីនា ២០២៦

ដោយ

កីឡាករជំនាញដេញបាល់លឿនរបស់ក្រុមស្នងការ ន.ប រាជធានីភ្នំពេញ ឧក រដ្ឋា ថារូបគេសម្រេចបំណងដែលចង់ឈ្នះពានជូនក្លឹបជាការតបស្នងសងគុណនាពេលកន្លងមក ស្របអំឡុងពេលប្រកួតពានរង្វាន់សម្ដេច ក្រឡាហោម លើកទី៤ នេះរូបគេកើនឡើងសមត្ថភាពជាងឆ្នាំមុន។

កីឡាករ ឧក រដ្ឋា

ឧក រដ្ឋា បានឲ្យដឹងថា ការដណ្ដើមបានពានរង្វាន់សម្ដេច ក្រឡាហោម ជូនក្លឹបស្នងការ ន.ប រាជធានីភ្នំពេញ គឺជាការសម្រេចក្ដីបំណងមួយរបស់ខ្លួនរួមទាំងក្រុមទាំងមូលផងដែរដែលធ្លាប់ស្រមៃពេលណាមួយចង់ឈ្នះពានធំជូនក្លឹបវិញ។ នេះជាការតបស្នងសងគុណចំពោះការផ្ដល់ឱកាសឲ្យរូបគេចូលហ្វឹកហាត់ និងការយកចិត្តទុកដាក់អំពីថ្នាក់ដឹកនាំក្លឹបមកលើកីឡាករនាពេលកន្លងមក។

កីឡាករ ឧក រដ្ឋា

កីឡាករដើមកំណើតពីខេត្តកំពង់ឆ្នាំងរូបនេះបន្ថែមទៀតថា អំឡុងការប្រកួតពានរង្វាន់សម្ដេច ក្រឡាហោម នេះខ្លួនមានសមត្ថភាពរីកចម្រើនជាងមុនទៅទៀត។ ភាពរីកចម្រើននោះគឺការលេងនៅឆ្នាំនេះរូបគេយល់ពីការលេងច្រើនទាំងការលោតធ្វើរនាំង ការដេញបាល់ និងការវាយសេវាច្បាស់លាស់ជាងមុនឆ្ងាយ។ តាមរយៈការឈ្នះពានជូនក្លឹប និងការឈ្នះពានឯកត្តជនថ្មីៗនេះបានធ្វើឲ្យរូបគេរឹតតែមានកម្លាំងចិត្តតស៊ូឆ្ពោះទៅមុខបន្ថែមទៀតលើវិថីកីឡាបាល់ទះអាជីពនេះ។

កីឡាករ ឧក រដ្ឋា

បញ្ជាក់ដែរថា ឧក រដ្ឋា ជាកីឡាករជំនាញដេញបាល់លឿនរបស់ក្រុមបាល់ទះស្នងការ ន.ប រាជធានីភ្នំពេញ។ រូបគេបានជួយក្រុមឲ្យឈ្នះពានរង្វាន់សម្ដេច ក្រឡាហោម លើកទី៤ កាលពីថ្ងៃទី១ ខែមីនា ឆ្នាំ២០២៦។ កម្លាំងស្នូលរបស់ក្រុមស្នងការម្នាក់នេះក៏បានឈ្នះពានឯកត្តជនជាកីឡាករធ្វើរនាំងល្អជាងគេក្នុងព្រឹត្តិការណ៍ផងដែរ៕