ព័ត៌មានជាតិ

រដ្ឋបាលសង្កាត់ឫស្សីកែវ ចុះបាញ់ទឹកលាងសម្អាតផ្លូវ និងការ៉ូឡា ក្រោមស្ពានអាកាសឫស្សីកែវ ដើម្បីសោភ័ណភាព

បានផុស

២ ខែ មុន

នៅ

ថ្ងៃពុធ ៤ មីនា ២០២៦

ដោយ

កម្លាំងសណ្ដាប់ធ្នាប់ខណ្ឌ សហការជាមួយ រដ្ឋបាលសង្កាត់ឫស្សីកែវ បានចុះអនុវត្តសកម្មភាព បាញ់ទឹកលាងសម្អាតផ្លូវ និងការ៉ូឡា នៅតំបន់ខាងក្រោមស្ពានអាកាសឫស្សីកែវ ដើម្បីលើកកម្ពស់សោភ័ណភាព និងអនាម័យក្នុងមូលដ្ឋាន។

សកម្មភាពចុះបាញ់ទឹកលាងសម្អាតផ្លូវនេះ កាលពីព្រឹកថ្ងៃទី ៣ ខែមីនា ឆ្នាំ ២០២៦ ម្សិលមិញ ស្ថិតនៅតាមផ្លូវជាតិលេខ ៥ សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ។

លោក មូល វីរៈ ចៅសង្កាត់ឫស្សីកែវ បានឲ្យដឹងថា ដោយអនុវត្តតាមការណែនាំពី លោក ជិន ប៊ុនធឿន អភិបាលខណ្ឌឫស្សីកែវ បានដឹកនាំក្រុមការងារសង្កាត់ និងកម្លាំងសណ្ដាប់ធ្នាប់ បាញ់លាងសម្អាតផ្លូវ និងការ៉ូឡា នៅតំបន់ក្រោមស្ពានអាកាសឫស្សីកែវ ដើម្បីលើកសោភ័ណភាព ភាពស្អាត អនាម័យ បរិស្ថានល្អ ផ្ដល់ផាសុកភាពជូនប្រជាពលរដ្ឋរស់នៅជុំវិញ និងអ្នកធ្វើដំណើរ។

លោកចៅសង្កាត់ឫស្សីកែវ បានបន្តថា លោកតែងតែចុះសម្អាតដងផ្លូវ និងតាមចំណុចសំខាន់ៗ ដែលមានប្រជាពលរដ្ឋរស់នៅច្រើន ដើម្បីជួយលុបបំបាត់រាល់ក្លិនមិនល្អ ឬទីតាំងសម្បូរកម្ទេចកំទីកាកសំណល់បោះចោលពាសវាលពាសកាល។

លោកចៅសង្កាត់ឫស្សីកែវ ក៏បានអំពាវនាវដល់ប្រជាពលរដ្ឋទាំងអស់ដែលមកអង្គុយលេង ឬប្រកបអាជីវកម្មក្បែរក្រោមស្ពានអាកាសឫស្សីកែវ ត្រូវនាំគ្នាចូលរួមថែរក្សាអនាម័យ ដើម្បីបរិស្ថានល្អ ទាំងអស់គ្នា៕

អត្ថបទ ៖ រដ្ឋា