ចិនប្រកាសប​ង្កើនចំណាយយោធា ៧% ក្នុងកាលៈទេសៈដែលពិភពលោកកំពុងឡើងកម្ដៅ

យោង​តាម​សារព័ត៌មាន CNA ក្នុងកិច្ចប្រជុំសភាប្រចាំឆ្នាំដ៏មានសារៈសំខាន់នៅទីក្រុងប៉េកាំង នា​ថ្ងៃព្រហស្បតិ៍ ទី៥ ខែមីនា ឆ្នាំ២០២៦នេះ ប្រទេសចិនបានប្រកាសបង្កើនកញ្ចប់ថវិកាការពារជាតិរបស់ខ្លួនចំនួន ៧% បន្ថែមទៀត ដែលធ្វើ​ឲ្យ​កញ្ចប់ថវិកាយោធាសរុបហក់ឡើងដល់ទៅ ១,៩១ទ្រីលានយន់ (ប្រហែល ២៧៦,៩​ពាន់លានដុល្លារអាមេរិក)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះបីជាតួលេខនេះហាក់ដូចជាថយចុះបន្តិច បើធៀបនឹងការកើនឡើង ៧,២% ក្នុងរយៈពេល៣​ឆ្នាំមុន ប៉ុន្តែវាគឺជាការកើនឡើងក្នុងកម្រិតខ្ពស់ជាលើកទី​១១​ឆ្នាំជាប់ៗគ្នា ខណៈដែលចិនកំពុងចាប់ផ្តើមផែនការ៥​ឆ្នាំថ្មី ដើម្បីពង្រឹងយុទ្ធសាស្ត្រសេដ្ឋកិច្ច និងយោធារហូតដល់ឆ្នាំ២០៣០។

ការបង្កើនចំណាយយោធានេះ កើតឡើងចំពេលដែលចិនកំពុងមានការប្រកួតប្រជែងយ៉ាងស្រួចស្រាវជាមួយសហរដ្ឋអាមេរិក ជាពិសេសគឺភាពតានតឹងនៅច្រកសមុទ្រតៃវ៉ាន់ និងសមុទ្រចិនខាងត្បូង។ បន្ថែមពីលើនេះ វិបត្តិសង្រ្គាមដែលកំពុងឆេះសន្ធោសន្ធៅនៅមជ្ឈិមបូព៌ា ក៏កំពុងដាក់សម្ពាធលើសន្តិសុខថាមពលប្រេង និងទំនាក់ទំនងរបស់ចិនជាមួយបណ្តាប្រទេសនៅតំបន់ឈូងសមុទ្រផងដែរ។ ដ្បិត​ទីក្រុងប៉េកាំងតែងតែអះអាងថា ការចំណាយនេះគឺក្នុងគោលបំណងការពារខ្លួន និងនៅមានកម្រិតទាបជាងសហរដ្ឋអាមេរិកឆ្ងាយណាស់ក្តី ក៏​អ្នកវិភាគមើលឃើញថា នេះគឺជាសញ្ញាយ៉ាងច្បាស់នៃមហិច្ឆតារបស់កងទ័ពរំដោះប្រជាជនចិន (PLA) ក្នុងការក្លាយជា «កងទ័ពលំដាប់ពិភពលោក» នៅត្រឹមពាក់កណ្តាលសតវត្សរ៍នេះ។

ស្របពេលជាមួយនឹងការទំនើបកម្មអាវុធ ចិនក៏កំពុងបន្តយុទ្ធនាការបោសសម្អាតអំពើពុករលួយយ៉ាងខ្លាំងក្លានៅក្នុងជួរកងទ័ព ដែលបានធ្វើ​ឲ្យ​មេបញ្ជាការជាន់ខ្ពស់ជាច្រើនរូបត្រូវបានដកចេញពីតំណែង។ ទោះបីជាមានការរុះរើផ្ទៃក្នុងយ៉ាងណាក៏ដោយ ក៏រដ្ឋាភិបាលចិននៅតែបង្ហាញការប្តេជ្ញាចិត្តយ៉ាងមុតមាំក្នុងការសម្រេច​ឲ្យ​បាននូវការធ្វើទំនើបកម្មកងទ័ពទាំងស្រុងនៅត្រឹមឆ្នាំ២០៣៥​ខាង​មុខ៕

ប្រែសម្រួល៖ ឈាង