ព័ត៌មានអន្ដរជាតិ

រុស្ស៊ីចោទអ៊ុយក្រែនវាយប្រហារនាវាដឹកប្រេងរបស់ខ្លួន ក្នុងសមុទ្រមេឌីទែរ៉ាណេ

បានផុស

២ ខែ មុន

នៅ

ថ្ងៃព្រហស្បតិ៍ ៥ មីនា ២០២៦

ដោយ

រដ្ឋាភិបាលរុស្ស៊ី បានចោទប្រកាន់អ៊ុយក្រែនថា បានវាយប្រហារនាវាដឹកប្រេងរបស់រុស្ស៊ីមួយគ្រឿងដឹកឧស្ម័នធម្មជាតិរាវ (LNG) លិចនៅក្នុងសមុទ្រមេឌីទែរ៉ាណេ ចន្លោះប្រទេសលីប៊ី និងប្រទេសម៉ាល់តា(Malta)។ នេះបើយោងតាម Al Jazeera ចុះផ្សាយថ្ងៃទី០៤ ខែមីនា ឆ្នាំ២០២៦ ។

អាជ្ញាធរកំពង់ផែលីប៊ី បាននិយាយថា៖«នាវាដឹកប្រេងនេះត្រូវបានវាយប្រហារ និងផ្ទុះឆេះភ្លាមៗ បន្ទាប់មកមានអគ្គិភ័យដ៏ធំមួយ នាំឱ្យនាវាលិចទាំងស្រុងនៅយប់ថ្ងៃអង្គារ នាភាគខាងជើងនៃកំពង់ផែ Sirteនៃប្រទេសលីប៊ី»។

លោក វ្ល៉ាឌីមៀរ ពូទីន ប្រាប់សារព័ត៌មានរដ្ឋរុស្ស៊ីនៅថ្ងៃពុធថា៖ «នេះជាការវាយប្រហារភេរវកម្ម។ នេះមិនមែនជាលើកទីមួយទេដែលយើងបានឃើញរឿងបែបនេះកើតឡើង»។ លោកពូទីន ទាមទារឲ្យទីក្រុងកៀវទទួលខុសត្រូវ។

យ៉ាងណាមិនទាន់មានការអត្ថាធិប្បាយភ្លាមៗពីអ៊ុយក្រែននោះទេ។

ក្រសួងដឹកជញ្ជូនរុស្ស៊ី បានឲ្យដឹងថា កប៉ាល់ Arctic Metagaz ដែលបានដឹកឧស្ម័នធម្មជាតិរាវ (LNG) ពីកំពង់ផែ Murmansk នៃតំបន់អាកទិក ត្រូវបានវាយប្រហារដោយយន្តហោះគ្មានមនុស្សបើក(ដ្រូន) របស់កងទ័ពជើងទឹកអ៊ុយក្រែនបាញ់ចេញពីឆ្នេរសមុទ្រលីប៊ី»។

ក្រសួងបន្តថា សមាជិកនាវិកទាំង ៣០នាក់ ជាជនជាតិរុស្ស៊ីមានសុវត្ថិភាពទាំងអស់ ព្រោះការជួយសង្គ្រោះពីភ្នាក់ងារប្រទេសម៉ាល់តា។

រុស្ស៊ីបន្ថែមថា៖ «យើងចាត់ទុកអ្វីដែលបានកើតឡើងថាជាទង្វើភេរវកម្មអន្តរជាតិ និងចោរសមុទ្រ ដែលជាការរំលោភបំពានយ៉ាងធ្ងន់ធ្ងរលើបទដ្ឋានជាមូលដ្ឋាននៃច្បាប់សមុទ្រអន្តរជាតិ»។

យោងតាមការណែនាំពីទីភ្នាក់ងារជួយសង្គ្រោះសមុទ្រលីប៊ី កប៉ាល់ Arctic Metagaz បានលិចនៅក្នុងដែនទឹករវាងប្រទេសលីប៊ី និងប្រទេសម៉ាល់តា បន្ទាប់ពីឆេះនៅយប់ថ្ងៃអង្គារ។

អាជ្ញាធរកំពង់ផែលីប៊ីនិយាយថា កប៉ាល់នេះកំពុងដឹកឧស្ម័នធម្មជាតិរាវ (LNG) ប្រមាណ ៦២ ០០០តោន នៅតាមផ្លូវទឹកទៅកាន់ទីក្រុង Port Said ប្រទេសអេហ្ស៊ីប។

ក្រសួងវិស័យប្រេងប្រទេសអេហ្ស៊ីបបានបដិសេធទំនាក់ទំនងជាមួយ នាវាដឹកប្រេងដែលរុស្ស៊ីលើកឡើង។

ក្រសួងថា៖ « នាវាដឹកប្រេងនេះមិនបានចុះបញ្ជីក្រោមកិច្ចសន្យាណាមួយដើម្បីផ្គត់ផ្គង់ ឬទទួលទំនិញឧស្ម័នធម្មជាតិរាវ (LNG) ទៅកាន់ប្រទេសអេហ្ស៊ីបទេ»៕

ប្រែសម្រួល៖ ណឺ មិនា