Connect with us

ព័ត៌មានអន្ដរជាតិ

លោក Araghchi៖ «ចាំសម្តីខ្ញុំទុក! អាមេរិកនឹងស្តាយក្រោយដែលហ៊ានបាញ់ពន្លិចនាវាចម្បាំងអ៊ីរ៉ង់»

បានផុស

នៅ

ភ្លើងសង្គ្រាមនៅមជ្ឈិមបូព៌ា កាន់តែឆាបឆេះសន្ធោសន្ធៅទៅៗហើយ ដោយពេលនេះ អ៊ីរ៉ង់បានព្រមានថា សហរដ្ឋអាមេរិក នឹង «ស្តាយក្រោយ» ដែលហ៊ានបាញ់ពន្លិចនាវាចម្បាំងរបស់ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត
នាវាចម្បាំង Dena (រូប៖ កងទ័ពជើងទឹកអ៊ីរ៉ង់)

ក្នុងសារបង្ហោះលើបណ្តាញសង្គម X នៅថ្ងៃព្រហស្បតិ៍ទី៥ខែមីនាឆ្នាំ២០២៦ រដ្ឋមន្ត្រីការបរទេសអ៊ីរ៉ង់ Abas Araghchi ចោទប្រកាន់ចំៗទៅអាមេរិកថា បានប្រព្រឹត្ត «អំពើឃោរឃៅ» តាមរយៈការបាញ់ពន្លិចនាវាចម្បាំងរបស់កងទ័ពជើងទឹកអ៊ីរ៉ង់នៅក្បែរឆ្នេរសមុទ្រស្រីលង្កា ហើយព្រមានខ្លាំងៗថា ទីក្រុងវ៉ាស៊ីនតោន នឹង «ស្តាយក្រោយបំផុត» ចំពោះការបង្កើតឲ្យមានបុទម្លាប់វាយប្រហារបែបនេះ។

រដ្ឋមន្ត្រីការបរទេសអ៊ីរ៉ង់ Abas Araghchi (រូប៖ Reuters)

លោកសរសេរថា៖ «សហរដ្ឋអាមេរិកបានប្រព្រឹត្តអំពើឃោរឃៅនៅលើលំហសមុទ្រ ដែលមានចម្ងាយរហូតដល់ទៅ ២ ០០០ ម៉ាយល៍ ពីឆ្នេររបស់ប្រទេសអ៊ីរ៉ង់។ នាវាចម្បាំង Dena ដែលជាភ្ញៀវរបស់កងទ័ពជើងទឹកឥណ្ឌា និងមានផ្ទុកនាវិកជិត ១៣០ នាក់ ត្រូវរងការវាយប្រហារនៅក្នុងដែនទឹកអន្តរជាតិទាំងគ្មានការព្រមានជាមុន។ ចាំសម្ដីខ្ញុំទុកចុះ! សហរដ្ឋអាមេរិកនឹងស្តាយក្រោយ ចំពោះរឿងដែលខ្លួនធ្វើនេះ»។

មុននេះ បញ្ជាការដ្ឋានកណ្តាលអាមេរិក (CENTCOM) បានបញ្ជាក់ពីការបាញ់ពន្លិចនាវាអ៊ីរ៉ង់ជាង២០គ្រឿង ក្នុងនោះរួមមានដូចជានាវាចម្បាំងខ្នាតធំ នាវាល្បាតល្បឿនលឿន និងនាវាដឹកជញ្ជូនភស្តុភារ។

រូបបញ្ចេញដោយអាមេរិក បង្ហាញពីការបាញ់ពន្លិចនាវាចម្បាំងអ៊ីរ៉ង់ (រូប៖ Reuters)

ក្នុងនោះដែរ នាវា Iris Dena គឺជាការបាត់បង់ដ៏ធំបំផុតមួយ ដែលត្រូវបាននាវាមុជទឹកអាមេរិកបាញ់ពន្លិចដោយមីស៊ីល Torpedo ក្នុងមហាសមុទ្រឥណ្ឌា បណ្តាលឲ្យនាវិកយ៉ាង ៨៧ នាក់បាត់បង់ជីវិត។

នាវានេះត្រូវបាញ់ពន្លិចក្បែរឆ្នេរសមុទ្រស្រីលង្កា ដែលនេះបង្ហាញថា អាមេរិកកំពុងប្រើប្រាស់ប្រព័ន្ធស៊ើបការណ៍កម្រិតខ្ពស់ ដើម្បីតាមដាននិងកម្ទេចរាល់ទ្រព្យសម្បត្តិយោធាអ៊ីរ៉ង់ដែលព្យាយាមចាកចេញពីមូលដ្ឋាន ឬព្យាយាមបង្កើតសមរភូមិថ្មីនៅឆ្ងាយពីដែនទឹកខ្លួនឯង៕

អត្ថបទ៖ សុខ សុវណ្ណ

Helistar Cambodia - Helicopter Charter Services
Sokimex Investment Group
Sokha Hotels

ព័ត៌មានពេញនិយម