កីឡា

ត្រឹមពេលនេះ Kwame ស៊ុតចូល ភ្នំពេញក្រោន ៩ គ្រាប់ ធ្វើឲ្យគ្រូ Oleg សរសើរជាកីឡាករដ៏អស្ចារ្យ

បានផុស

២ ខែ មុន

នៅ

ថ្ងៃសុក្រ ៦ មីនា ២០២៦

ដោយ

លោក Oleg Starynskyi គ្រូបង្វឹកភ្នំពេញក្រោន បានសរសើរខ្សែប្រយុទ្ធសញ្ញាតិហ្គាណា Kwame Peprah ជាកីឡាករដ៏អស្ចារ្យម្នាក់នៅក្នុងរដូវកាលនេះ។

ការសរសើរនេះ បន្ទាប់ពីកីឡាករ Kwame Peprah បានស៊ុតចូល ភ្នំពេញក្រោន ចំនួន ៣ គ្រាប់ក្នុងការប្រកួតដែល ព្រះខ័នរាជស្វាយរៀង បានយកឈ្នះដោយលទ្ធផល ៤-១ សម្រាប់ការប្រកួតជើងទី១ វគ្គ ៨ ក្រុមចុងក្រោយ ពានរង្វាន់ AFC Challenge League កាលពីយប់ថ្ងៃទី៥ ខែមីនា ឆ្នាំ ២០២៦ នៅពហុកីឡដ្ឋានជាតិអូឡាំពិក។

គ្រូបង្វឹកភ្នំពេញក្រោនបាននិយាយក្នុងសន្និសីទសារព័ត៌មានក្រោយការប្រកួតថា ៖«Peprah Kwame របស់ព្រះខ័នរាជស្វាយរៀងបង្ហាញខ្លួនអស្ចារ្យមែនទែននៅរដូវកាលនេះ។ ខ្ញុំសូមសរសើរពីសមត្ថភាពរបស់គាត់ជាពិសេស ការបញ្ចប់ទីដ៏មានប្រសិទ្ធភាព»។

គិតត្រឹមថ្ងៃទី៥ ខែមីនា ឆ្នាំ ២០២៦ Kwam Peprah បានស៊ុតចូល ភ្នំពេញក្រោន ចំនួន ៩ គ្រាប់ហើយ។ ការជួបគ្នាលើកទី១ នៅរដូវកាលនេះក្នុងពានរង្វាន់បើករដូវកាល Cambodian Super Cup កីឡាករសញ្ជាតិហ្គាណាបានស៊ុតចូល ២ គ្រាប់ គឺនៅពេលស្មើគ្នា ២-២ សម្រាប់ ៩០ នាទីពេញ និង ១ គ្រាប់ទៀតដោយប៉េណាល់ទីកាត់សេចក្តី។

សម្រាប់ការជួបគ្នា ២ លើកក្នុងលីគ Kwam Peprah ស៊ុតចូល ៤ គ្រាប់ គឺ ១ គ្រាប់នៅជើងទី១ នៅពេល ភ្នំពេញក្រោន ឈ្នះ ព្រះខ័នរាជស្វាយរៀង ដោយលទ្ធផល ៣-២ និងជើងទី២ រកបាន ៣ គ្រាប់ នៅពេល ព្រះខ័នរាជស្វាយរៀង ឈ្នះភ្នំពេញក្រោន ដោយលទ្ធផល ៣-២ វិញ។

ចុងក្រោយបំផុតក្នុងពានរង្វាន់អន្តរជាតិ Kwam Peprah ស៊ុតបាន ៣ គ្រាប់ទៀតនៅពេល ព្រះខ័នរាជស្វាយរៀង ឈ្នះ ភ្នំពេញក្រោន ដោយលទ្ធផល ៤-១។ គិតទៅរាល់ការជួបគ្នា ៤ លើកនៅក្នុងរដូវកាលនេះ រូបគេតែងតែស៊ុតចូលភ្នំពេញក្រោន រហូត។

នៅរដូវកាលនេះ ព្រះខ័នរាជស្វាយរៀង និង ភ្នំពេញក្រោន ត្រូវជួបគ្នា ៣ ប្រកួតទៀត គឺ ការប្រកួតជើងទី២ ក្នុងពានរង្វាន់ AFC Challenge League និង ២ ប្រកួតទៀត ក្នុងលីគកំពូលកម្ពុជា។ ក្រុមទាំងពីរអាចនឹងជួបគ្នាក្នុងពានរង្វាន់សម្តេចតេជោ ហ៊ុន សែន ទៀត ដូច្នេះសូមរង់ចាំមើលថាតើ Kwame Peprah នៅតែបន្តស៊ុតចូល ភ្នំពេញក្រោន ទៀតទេ៕