Kwame ក្លាយជាកីឡាករលីគ កម្ពុជា តែម្នាក់គត់ ស៊ុតចូល ៥ ពានរង្វាន់ផ្សេងគ្នារដូវកាលនេះ

ខ្សែប្រយុទ្ធរបស់ក្រុម ព្រះខ័នរាជស្វាយរៀង កីឡាករ Kwame Peprah កំពុងបង្ហាញភាពលេចធ្លោខ្លាំង ដោយក្លាយជាកីឡាករក្នុងលីគ កម្ពុជា តែម្នាក់គត់ អាចស៊ុតបញ្ចូលទីគ្រប់កម្មវិធី ដែលរូបគេបានលេង។

ថ្វីដ្បិតទើបមកចូលរួមជាមួយក្រុម ព្រះខ័នរាជស្វាយរៀង ក្នុងរដូវកាលដំបូងក៏ពិតមែន ប៉ុន្តែ Kwame ពិតជាបង្ហាញគុណផលនៃការស៊ុតបញ្ចូលទីសឹងមិនគួរឱ្យជឿ។ គិតត្រឹមពេលនេះ កីឡាកររកបានគ្រាប់បាល់បានចំនួន ៥ កម្មវិធីផ្សេងគ្នា ដូចជាពានបើករដូវកាល Cambodian Super Cup, ពានលីគកំពូលកម្ពុជា Cambodian Premier League, ពាន ASEAN Club Championship Shopee Cup, ពាន AFC Challenge League និងចុងក្រោយពានសម្តេចតេជោហ៊ុនសែន។

បើកឆាកប្រកួតដំបូងជាមួយ ព្រះខ័នរាជស្វាយរៀង ក្នុងពានរង្វាន់បើករដូវកាល Cambodian Super Cup កីឡាករ Kwame រកបាន ២ គ្រាប់ទល់នឹង ភ្នំពេញក្រោន។ ការប្រកួតនោះ ក្រុម ព្រះខ័នរាជស្វាយរៀង បានយកឈ្នះលើក្រុម ភ្នំពេញក្រោន នៅវគ្គបាល់កាត់សេចក្តី ១១ ម៉ែត្រ ៧-៥ បន្ទាប់ពីបញ្ចប់ ៩០ នាទីស្មើគ្នា ២-២។

ងាកមកកាន់ក្របខណ្ឌលីគកំពូល កម្ពុជា Cambodian Premier League វិញ Kwame ក៏រកគ្រាប់បាល់បានផងដែរ ហើយថែមទាំងកំពុងឈរនៅតំណែងជាកីឡាកររកបានគ្រាប់បាល់ច្រើនជាងគេថែមទៀត ពោលគឺចំនួន ២០ គ្រាប់ គិត​ត្រឹម​សប្តាហ៍​ទី​ ២៣។

ពានរង្វាន់ក្នុងស្រុកមួយទៀត គឺពានសម្តេចតេជោហ៊ុន សែន ក៏ Kwame ទើបរកបានគ្រាប់បាល់ផងដែរ ដោយកីឡាកររកបាន ១ គ្រាប់ជួយឱ្យ ព្រះខ័នរាជស្វាយរៀង ឈ្នះ គិរីវង្សសុខសែនជ័យ នៅជើងទី ២ វគ្គ ៨ ក្រុមចុងក្រោយក្នុងលទ្ធផល ៤-១។ សរុបលទ្ធផលទាំង ២ ជើង គឺ ព្រះខ័នរាជស្វាយរៀង ឈ្នះ ៥-៣ ដូច្នេះពួកគេទទួលបានកៅអីឡើងវគ្គពាក់កណ្តាលផ្តាច់ព្រ័ត្រ ដោយជួបជាមួយក្រុម បឹងកេត។

ក្រៅអំពីពានរង្វាន់ក្នុងស្រុក ខ្សែប្រយុទ្ធវ័យ ២៤ ឆ្នាំ ក៏រកបានគ្រាប់បាល់ផងដែរ នៅពានរង្វាន់អន្តរជាតិ ២ ទៀត ដែល ព្រះខ័នរាជស្វាយរៀង មានឈ្មោះលេង។ នៅពានរង្វាន់ក្លិបអាស៊ាន ASEAN Club Championship Shopee Cup កីឡាករ Kwame រកបាន ១ គ្រាប់ និងពានរង្វាន់ AFC Challenge League រកបានចំនួន ៦ គ្រាប់។

នៅរដូវកាលនេះ ក្រៅតែអំពី Kwame គឺពុំមានកីឡាករក្នុងលីគ កម្ពុជា ណាផ្សេង អាចស៊ុតបញ្ចូលទីបាន ៥ កម្មវិធីផ្សេងគ្នាដូចនេះឡើយ។ គិតត្រឹមពេលនេះ ខ្សែប្រយុទ្ធសញ្ជាតិ ហ្គាណា វ័យ ២៤ ឆ្នាំ រកគ្រាប់បាល់សរុបបានចំនួន ៣០ គ្រាប់ហើយ ក្នុងចំណោមការលេង ៣៤ ប្រកួត៕

អត្ថបទ៖ សេម កុសល