Connect with us

ព័ត៌មានអន្ដរជាតិ

សង្គ្រាម៦ថ្ងៃនៅអ៊ីរ៉ង់ ធ្វើឲ្យ​អាមេរិកចំណាយអស់ជាង ១១​ពាន់​លានដុល្លារ

បានផុស

នៅ

យោងតាមការប៉ាន់ស្មានដែលបានលេចធ្លាយចេញពីកិច្ចប្រជុំសម្ងាត់មួយនៅក្នុងសភាអាមេរិក ហើយ​ត្រូវ​បាន​ចុះ​ផ្សាយ​ដោយ​ទីភ្នាក់ងារ​ព័ត៌មាន​រ៉យទ័រ រយៈពេលត្រឹមតែ​៦​ថ្ងៃដំបូងនៃសង្គ្រាមរវាងសហរដ្ឋអាមេរិក និងអ៊ីរ៉ង់ បានធ្វើឲ្យ​រដ្ឋាភិបាលទីក្រុងវ៉ាស៊ីនតោន ចំណាយថវិកាអស់យ៉ាងហោចណាស់ ១១,៣​ពាន់​លានដុល្លារ​បាត់ទៅហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងចំណោមទឹកប្រាក់ដ៏ច្រើនសន្ធឹកសន្ធាប់នេះ គឺមានចំនួន ៥,៦​ពាន់​លានដុល្លារ ត្រូវបានប្រើប្រាស់ទៅលើតែគ្រាប់រំសេវ និងគ្រឿងយុទ្ធភណ្ឌ ក្នុងរយៈពេលត្រឹម៤៨​ម៉ោងដំបូងប៉ុណ្ណោះ។

សង្គ្រាមនេះបានចាប់ផ្តើមឡើងកាលពីថ្ងៃទី​២៨​កុម្ភៈ តាមរយៈការវាយប្រហារតាមដែន​អាកាសរួមគ្នារវាង​អាមេរិក និងអ៊ីស្រាអែល ដែលរហូតមកដល់ពេលនេះ បានឆក់យកជីវិតមនុស្សប្រហែល ២ ០០០​នាក់ និងបានបង្ក​ឲ្យ​មានភាពវឹកវរយ៉ាងខ្លាំងដល់ទីផ្សារថាមពល និងការដឹកជញ្ជូនទំនិញជាសកល។

រដ្ឋាភិបាលអាមេរិកមិនទាន់បានបង្ហាញរបាយការណ៍ជាសាធារណៈអំពីការចំណាយសរុប ឬកំណត់ពេលវេលាច្បាស់លាស់នៃសង្គ្រាមនេះនៅឡើយទេ។ ចំណែកឯជំនួយការសភាបានរំពឹងថា សេតវិមាននឹងស្នើសុំកញ្ចប់ថវិកាបន្ថែមក្នុងពេលឆាប់ៗនេះ ដែលមន្ត្រីខ្លះបង្ហើបថាអាចនឹងកើនឡើងដល់ ៥០​ពាន់​លានដុល្លារ ខណៈសមាជិកសភាមួយចំនួនបារម្ភថា ចំនួននេះនៅតែមិនទាន់គ្រប់គ្រាន់សម្រាប់ទប់ទល់នឹងសង្គ្រាមដែលកំពុងឆាបឆេះខ្លាំងនេះឡើយ។

ស្របពេលជាមួយគ្នានេះ សមាជិកសភាមកពីគណបក្សទាំងពីរបានសម្តែងការព្រួយបារម្ភយ៉ាងខ្លាំង ចំពោះការថយចុះយ៉ាងលឿននៃឃ្លាំងអាវុធរបស់សហរដ្ឋអាមេរិក ចំពេលដែលឧស្សាហកម្មការពារជាតិកំពុងជួបការលំបាកក្នុងការផ្គត់ផ្គង់​ឲ្យ​ទាន់តម្រូវការ។ កាលពីសប្តាហ៍មុន ប្រធានាធិបតី​អាមេរិក ដូណាល់ ត្រាំ បានជួបពិភាក្សាជាមួយនាយកប្រតិបត្តិនៃក្រុមហ៊ុនផលិតអាវុធធំៗចំនួន​៧ ដើម្បីរកវិធីបំពេញឃ្លាំង​យុទ្ធភណ្ឌឡើងវិញ។ ដោយឡែក សមាជិកសភាខាងគណបក្សប្រជាធិបតេយ្យ កំពុងទាមទារ​​ឲ្យ​មានការផ្តល់សក្ខីកម្មជាសាធារណៈពីមន្ត្រីរដ្ឋាភិបាល ដើម្បីបញ្ជាក់​ឲ្យ​ច្បាស់អំពីយុទ្ធសាស្ត្ររយៈពេលវែងក្នុងសង្គ្រាមនេះ ក៏ដូចជាផែនការសម្រាប់ប្រទេសអ៊ីរ៉ង់ ក្រោយពេលបញ្ចប់ជម្លោះ៕

ប្រែសម្រួល៖ ឈាង

Helistar Cambodia - Helicopter Charter Services
Sokimex Investment Group
Sokha Hotels

ព័ត៌មានពេញនិយម