សន្តិសុខសង្គម

ទុស្សេខ្សែភ្លើង ឆេះផ្ទះលក់ពូក ១ កន្លែង ខូចខាតសម្ភារៈមួយចំនួនធំ នៅក្រុងសៀមរាប

បានផុស

២ ខែ មុន

នៅ

ថ្ងៃសុក្រ ១៣ មីនា ២០២៦

ដោយ

អ៊ិន ពិសី

ទុស្សេខ្សែភ្លើង បង្កជាអគ្គិភ័យឆាបឆេះផ្ទះលក់ពូក និងលក់បាយ ១ កន្លែង នៅក្រុងសៀមរាប។

ហេតុការណ៍នេះបានកើតឡើងកាលពីព្រឹកថ្ងៃទី ១៣ ខែមីនា ឆ្នាំ ២០២៦ ស្ថិតនៅភូមិខ្នារ សង្កាត់ជ្រាវ ក្រុងសៀមរាប ខេត្តសៀមរាប។

សមត្ថកិច្ចបានឲ្យដឹងថា ផ្ទះខាងលើមានទំហំទទឹង ១៣ ម៉ែត្រ បណ្ដោយ ២៥ ម៉ែត្រ ដំបូលប្រក់ស័ង្កសី ម្ចាស់ផ្ទះ ឈ្មោះ ឈិន ឈាង ភេទប្រុស អាយុ ៥៦ ឆ្នាំ មុខរបរប៉ូលិសព្រំដែនបានជួលទៅឲ្យឈ្មោះ នាក់ គារ៉ា ភេទប្រុស អាយុ ៤០ ឆ្នាំ បើកកន្លែងលក់ពូក និងលក់បាយ។

សមត្ថកិច្ចបានបន្តថា អគ្គិភ័យនេះបានបង្កការខូចខាតរួមមាន ៖ ម៉ូតូ ១ គ្រឿង ម៉ាកឌ្រីមសង់ ស៊េរីឆ្នាំ ២០១៨ , ពូកចំនួន ៩០០ ពូក និង កម្រាលពូក ៧០ កម្រាល , ម៉ាស៊ីនត្រជាក់ចំនួន ២ គ្រឿង , ប្រាក់រៀលចំនួន ៥០ ០០០ ០០០ លានរៀល (ហាសិបលានរៀល) , ចង្ក្រានហ្កាស ចំនួន ១០ ឈុត , អង្កចំនួន ១០ បេ និងសម្ភារៈប្រើប្រាស់មួយចំនួនទៀត។ ដោយឡែកចំពោះមូលហេតុដែលបណ្ដាលឲ្យកើតមានអគ្គិភ័យនេះមកពីទុស្សេខ្សែភ្លើងធ្លាក់មកលើពូកក៏ឆាបឆេះតែម្ដង៕

អត្ថបទ ៖ ជុន កុសល