ព័ត៌មានអន្ដរជាតិ

ត្រាំប្រាប់អ្នកកាសែតថា ការវាយប្រហារលើអ៊ីរ៉ង់ពេលនេះ ប្រៀបដូចការវាយប្រហាររបស់ជប៉ុនលើអាមេរិកចុងឆ្នាំ១៩៤១

បានផុស

១ ខែ មុន

នៅ

ថ្ងៃសុក្រ ២០ មីនា ២០២៦

ដោយ

ប្រធានាធិបតីសហរដ្ឋអាមេរិក លោក ដូណាល់ ត្រាំ បានចួបជាមួយនាយករដ្ឋមន្ត្រីជប៉ុន លោកស្រី សាណាអេ តាកាអ៊ិឈិ (Sanae Takaichi) នៅថ្ងៃព្រហស្បតិ៍នៅសេតវិមាន ដែលពេលនោះលោកបានប្រាប់សម្ព័ន្ធមិត្តជប៉ុន ដោយការប្រៀបធៀបការវាយប្រហារលើកដំបូងរបស់សហរដ្ឋអាមេរិកប្រឆាំងនឹងអ៊ីរ៉ង់ទៅនឹងការវាយប្រហារដែលមិនបានគ្រោងទុករបស់ជប៉ុនលើមូលដ្ឋានទ័ពជើងទឹកនៅកំពង់ផែ Pearl Harbor នៃរដ្ឋហាវ៉ៃ អំឡុងសង្គ្រាមលោកលើកទីពីរ។

លោកស្រី តាកាអ៉ិឈិ និងលោក ត្រាំ ក្នុងសេតវិមាន។ រូបភាព៖ Getty Images

យោងតាម ABC ផ្សាយថ្ងៃទី២០ខែមីនា ឆ្នាំ២០២៦ អ្នកសារព័ត៌មានជប៉ុនម្នាក់បានសួរ លោក ត្រាំ « ហេតុអ្វីបានជាលោកមិនបានប្រាប់សម្ព័ន្ធមិត្តអាមេរិកនៅអឺរ៉ុបនិងអាស៊ីថាប្រតិបត្តិការយោធានឹងកើតឡើង» ។

លោកឆ្លើយថា៖ «មែនហើយ! មានរឿងខ្លះមិនចង់បង្ហាញសញ្ញាច្រើនពេកទេ។ អ្នកដឹងទេ! ពេលយើងធ្វើ យើងធ្វើវាឱ្យខ្លាំង ហើយយើងមិនបានប្រាប់អ្នកណាអំពីវាទេ ព្រោះយើងធ្វើឱ្យភ្ញាក់ផ្អើល»។

លោកត្រាំបន្តទាំងទឹកមុខញញឹមថា៖ «អ្នកណាដឹងច្បាស់ជាងជប៉ុនពីភាពការភ្ញាក់ផ្អើលនេះ? អូខេ! ហេតុអ្វីបានជាអ្នកមិនប្រាប់ខ្ញុំពី(ផែនការបាញ់ប្រហារលើ) Pearl Harbor?»។

លោកបន្ថែមថា៖ « ទេ! អ្នកជឿពីភាពភ្ញាក់ផ្អើល! ខ្ញុំគិតថាច្រើនជាងយើងទៅទៀត។ ហើយយើងត្រូវតែធ្វើឱ្យពួកគេភ្ញាក់ផ្អើល ដូច្នេះយើងបានធ្វើវា»។

គួរបញ្ជាក់ថា ការវាយប្រហាររបស់ជប៉ុនលើមូលដ្ឋានកងទ័ពជើងទឹកអាមេរិកនៅកំពង់ផែ Pearl Harbor បានកើតឡើងកាលព្រឹកថ្ងៃទី០៧ ខែធ្នូ ឆ្នាំ១៩៤១ បានសម្លាប់ជនជាតិអាមេរិកជាង ២៤០០នាក់ និងធ្វើឱ្យសហរដ្ឋអាមេរិកធ្លាក់ចូលទៅក្នុងសង្គ្រាមលោកលើកទី២។

លោកស្រី តាកាអ៊ិឈិ ជាមេដឹកនាំសម្ព័ន្ធមិត្តដ៏សំខាន់ដំបូងគេទៅទស្សនកិច្ចទីក្រុងវ៉ាស៊ីនតោនចាប់តាំងពីសង្គ្រាមនៅអ៊ីរ៉ង់បានចាប់ផ្តើម។

លោក ត្រាំ ហៅនាយករដ្ឋមន្រ្តីជប៉ុនថា «មិត្តភ័ក្តិ» ពេលដែលអ្នកទាំងពីរជួបគ្នានៅឯសេតវិមាន ហើយលោកថា៖ « ប្រទេសជប៉ុនពិតជាកំពុងបោះជំហានទៅមុខក្នុងការគាំទ្រដល់ប្រតិបត្តិការរបស់អាមេរិកក្នុងប្រទេសអ៊ីរ៉ង់»។

ចំណែក លោកស្រី តាកាអ៊ិឈិ ថាជម្លោះនៅមជ្ឈិមបូព៌ាមានផលប៉ះពាល់យ៉ាងធំដល់សេដ្ឋកិច្ចពិភពលោក និងបានសម្តែងការមិនពេញចិត្ត ចំពោះវិបត្តិដែលកំពុងកើនឡើងនៅច្រកសមុទ្រ Hormuz ។

លោកស្រីថា៖ « ប៉ុន្តែទោះបីជាបញ្ហាបានកើតឡើងហើយក៏ដោយ ខ្ញុំជឿជាក់យ៉ាងមុតមាំថាមានតែអ្នកទេ លោក ដូណាល់ ដែលអាចសម្រេចបាននូវសន្តិភាពទូទាំងពិភពលោកឡើងវិញ»៕

ប្រែសម្រួល៖ ណឺ មិនា