Messi វ៉ា Pele ឡើងឈរលេខ ២ ខណៈត្រៀមវ៉ាអ្នកលេខ ១ ទៀត ជាកីឡាករស៊ុតហ្វ្រីឃីគចូលច្រើនបំផុត

ខ្សែប្រយុទ្ធ Lionel Messi បានវ៉ាវីរបុស Pele ឡើងមកឈរចំណាត់ថ្នាក់លេខ ២ និងកំពុងខិតជិតឡើងមកចំណាត់ថ្នាក់លេខ ១ ជាកីឡាកររកបានគ្រាប់បាល់ដោយហ្វ្រីឃីគច្រើនបំផុតក្នុងប្រវត្តិសាស្ត្របាល់ទាត់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

Lionel Messi បច្ចុប្បន្នរកគ្រាប់បាល់ហ្វ្រីឃីគបានចំនួន ៧១ គ្រាប់ហើយ បន្ទាប់ពីស៊ុតចូលមួយគ្រាប់យប់មិញ ត្រូវនឹងយប់រំលងអាធ្រាត្រឈានចូលថ្ងៃ ចន្ទ ទី ២៣ ខែ មីនា ឆ្នាំ ២០២៦ ជួយឱ្យក្រុម Inter Miami ឈ្នះក្រុម New York City ៣-២ ក្នុងការប្រកួតសប្តាហ៍ទី ៥ នៃលីគកំពូល អាមេរិក (MLS)។

ស្ថិតិរកបានគ្រាប់បាល់ហ្វ្រីឃីគចំនួន ៧១ គ្រាប់របស់ Messi បានធ្វើឱ្យគាត់វ៉ាដាច់ Pele ដែលពីមុនឈរលេខ ២ មានចំនួន ៧០ គ្រាប់។ យ៉ាងណា ខ្សែប្រយុទ្ធសញ្ជាតិ អាហ្សង់ទីន វ័យ ៣៨ ឆ្នាំ ក៏កំពុងកៀកនឹងវ៉ាលោក Juninho ដើម្បីឡើងមកឈរលេខ ១ ដែរ ដោយបច្ចុប្បន្នអតីតខ្សែបម្រើប្រយុទ្ធជម្រើសជាតិ ប្រេស៊ីល រូបនេះមានចំនួន ៧៧ គ្រាប់ លើស Messi ចំនួន ៦ គ្រាប់។

គួរបញ្ជាក់ផងដែរ ថា Messi រកបានគ្រាប់បាល់លើស ៩០០ គ្រាប់ហើយ ដោយមាន ៩០១ គ្រាប់ បន្ទាប់ពីស៊ុត ១ គ្រាប់យប់មិញនេះ។ បច្ចុប្បន្ន នៅក្នុងប្រវត្តិសាស្ត្របាល់ទាត់ មានតែ Ronaldo និង Messi ប៉ុណ្ណោះ ដែលមានគ្រាប់បាល់លើស ៩០០ គ្រាប់៕

ប្រែសម្រួល៖ សេម កុសល
ប្រភព៖ Givemesport