កម្ពុជាស្វាគមន៍នាយទាហានម៉ាឡេស៊ី២រូបចូលរួមក្នុងក្រុមអ្នកសង្កេតការណ៍អាស៊ាន (AOT) ដើម្បីពង្រឹងសន្តិភាពតាមព្រំដែនកម្ពុជា-ថៃ

សៀមរាប ៖ លោកជំទាវ ឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិ ​បានប្រកាសឱ្យ​ដឹងថា​ វេលាម៉ោង ១៣:៥០នាទីរសៀលថ្ងៃនេះ​ នៅអាកាសយានដ្ឋានអន្តរជាតិសៀមរាបអង្គរ ខេត្តសៀមរាប ក្រុមអ្នកសម្របសម្រួល (CLG) នៃកម្ពុជា បានទទួលស្វាគមន៍យ៉ាងកក់ក្តៅចំពោះភាគីម៉ាឡេស៊ី ដែលបានបញ្ជូននាយទាហានបន្តវេនចំនួន ២រូប រួមមាន វរសេនីយ៍ទោ MOHD AMIN BIN BAHAROM និង វរសេនីយ៍ទោ MOHD ERRY BIN DUL TLDM ចូលរួមជាមួយក្រុមអ្នកសង្កេតការណ៍អាស៊ាន (AOT) ប្រចាំកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមអ្នកសង្កេតការណ៍អាស៊ាន (AOT) ដឹកនាំដោយប្រទេសហ្វីលីពីន ក្នុងនាមជាប្រធានអាស៊ាន នឹងបន្តបេសកកម្មក្នុងការចុះសង្កេតការណ៍ ផ្ទៀងផ្ទាត់ និងធានាការអនុវត្តប្រកបដោយប្រសិទ្ធភាពនូវវិធានការទាំងឡាយ ដែលមានចែងក្នុងសេចក្តីប្រកាសរួមពាក់ព័ន្ធ។

ក្រសួងការពារជាតិកម្ពុជា បានបញ្ជាក់ថា កម្ពុជាតែងតែគាំទ្រយ៉ាងពេញទំហឹងចំពោះបេសកកម្មរបស់ AOT និងសង្កត់ធ្ងន់ពីសារៈសំខាន់នៃការពង្រឹងតួនាទី និងអាណត្តិរបស់ក្រុមអ្នកសង្កេតការណ៍នេះ ដើម្បីធានាការអនុវត្តបទឈប់បាញ់ និងកិច្ចព្រមព្រៀងដែលភាគីពាក់ព័ន្ធបានឯកភាពគ្នា ឱ្យបានពេញលេញ និងមានប្រសិទ្ធភាព សំដៅលើកកម្ពស់តម្លាភាព គណនេយ្យភាព និងទំនុកចិត្តរវាងភាគី។

ជាមួយគ្នានេះ កម្ពុជាក៏បានបញ្ជាក់ពីការបើកចំហ និងស្វាគមន៍ចំពោះបណ្តាប្រទេសជាមិត្ត ដែលមានបំណងចូលរួមគាំទ្របេសកកម្មនេះបន្ថែមទៀតផងដែរ។

ក្រសួងការពារជាតិ និងរាជរដ្ឋាភិបាលកម្ពុជា បានអះអាងពីការប្តេជ្ញាចិត្តយ៉ាងម៉ឺងម៉ាត់ ក្នុងការគោរព និងអនុវត្តយ៉ាងពេញលេញនូវសេចក្តីប្រកាសរួមនៃកិច្ចប្រជុំពិសេសលើកទី៣ នៃគណៈកម្មាធិការព្រំដែនទូទៅកម្ពុជា–ថៃ (GBC) ថ្ងៃទី២៧ ខែធ្នូ ឆ្នាំ២០២៥, សេចក្តីថ្លែងការណ៍រួមស្តីពីកិច្ចព្រមព្រៀងសន្តិភាពកម្ពុជា–ថៃ ថ្ងៃទី២៦ ខែតុលា ឆ្នាំ២០២៥ និងកិច្ចព្រមព្រៀងពាក់ព័ន្ធផ្សេងៗ ដើម្បីឆ្ពោះទៅរកសន្តិភាព ស្ថិរភាព និងប្រក្រតីភាពយូរអង្វែង៕