ចម្រៀងរួមគ្នា នីសា-រ៉ូលីន បទ«កាឌិនហយ» កាន់តែអង្រួនបេះដូងអ្នកគាំទ្រ ក្រោយចេញ Full MV

បទចម្រៀង «កាឌិនហយ» កាន់តែទទួលបានការពេញចិត្តពីមហាជន បន្ទាប់ពីបានបញ្ចេញ Full MV ជាផ្លូវការ នៅរាត្រីថ្ងៃទី២៧ ខែមីនា ឆ្នាំ២០២៦ ដោយបាននាំយកបរិយាកាសសប្បាយរីករាយ សមស្របនឹងឱកាសបុណ្យចូលឆ្នាំប្រពៃណីជាតិខ្មែរ ដែលកំពុងខិតជិតមកដល់ ខណៈមានការចែករំលែក និងបញ្ចេញមតិសរសើរជាបន្តបន្ទាប់ចំពោះស្នាដៃចម្រៀងមួយនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីឆ្នាំមុន តារាទាំងពីរនេះក៏ធ្លាប់បង្កើតភាពកក្រើកម្តងរួចមកហើយ តាមរយៈបទ «ចាក់ក្រឡេកទយ» ដែលទទួលបានអ្នកទស្សនារហូតដល់ ១០លានដង បង្កើតជាកំណត់ត្រាដ៏គួរឱ្យចាប់អារម្មណ៍មួយផងដែរ។

យ៉ាងណា មិនចាញ់បទឆ្នាំមុនឡើយ ស្នាដៃថ្មី ដែលជាការចាប់ដៃគូជាថ្មីរវាងតារាចម្រៀងល្បី សុគន្ធ នីសា និងតារាពហុជំនាញ រ៉ូលីន បានបង្ហាញស្ទីលប្លែក ស្រស់ស្រាយ និងពោរពេញដោយអារម្មណ៍កំប្លុកកំប្លែង ធ្វើឱ្យទស្សនិកជនពេញចិត្ត និងបង្ហាញក្តីរីយរាយតាមចម្រៀងដែរ។ លើសពីនេះ អ្វីដែលគួរឱ្យចាប់អារម្មណ៍ ត្រឹមតែបង្ហើប Trailer បទ «កាឌិនហយ» ក៏ទទួលបានការទស្សនាជាង ២.៣លានដង ក្នុងរយៈពេលត្រឹម ២០ម៉ោងប៉ុណ្ណោះ បង្ហាញពីកម្លាំងគាំទ្រខ្លាំងពីទស្សនិកជន។

ក្នុងឱកាសនេះផងដែរ សោម ដូរ៉េ អ្នកនិពន្ធទំនុកច្រៀង និង លាង ស៊ាងលីន បានផ្ញើសារទៅកាន់ទស្សនិកជន ដោយសុំអភ័យទោសជាមុន ប្រសិនបើមានចំណុចណាមួយមិនគាប់ចិត្ត។ លោក សោម ដូរ៉េ បានបញ្ជាក់ថា នេះជាសហការលើកទី២របស់លោកជាមួយតារាទាំងពីរ ហើយលោកក៏សង្ឃឹមថា បទនេះនឹងនាំមកនូវសំណើច ស្នាមញញឹម និងអារម្មណ៍រីករាយដល់អ្នកស្តាប់ទាំងអស់។

ជាមួយគ្នានេះ លោកក៏បានបង្ហាញចិត្តទូលាយក្នុងការទទួលយកមតិយោបល់ និងការរិះគន់គ្រប់ទិស ដើម្បីអភិវឌ្ឍស្នាដៃឱ្យកាន់តែល្អប្រសើរឡើងបន្តទៀត។

ជារួម បទ «កាឌិនហយ» មិនត្រឹមតែជាបទចម្រៀងសម្រាប់កម្សាន្តទេ ប៉ុន្តែថែមទាំងជាការបញ្ចូលពណ៌សប្បាយរីករាយ និងស្មារតីបុណ្យចូលឆ្នាំ ដែលធ្វើឱ្យទស្សនិកជនមានអារម្មណ៍រីករាយ និងស្រលាញ់កាន់តែខ្លាំងឡើង៕