តម្លៃប្រេងអន្តរជាតិ​​បន្តហក់ឡើង ​ឆ្ពោះទៅរក​កំណត់ត្រាកំណើនតម្លៃប្រចាំខែខ្ពស់បំផុតក្នុងប្រវត្តិសាស្រ្ត

តម្លៃប្រេងអន្តរជាតិ​បាន​បន្តហក់ឡើងសម្រាប់ការជួញដូរលើទីផ្សារអាស៊ីនាព្រឹកថ្ងៃចន្ទ (៣០ មីនា) នេះ ដោយ​កំពុងឆ្ពោះទៅរកការបំបែកកំណត់ត្រា «កំណើនតម្លៃប្រេងប្រចាំខែ​ដ៏ខ្ពស់បំផុតក្នុងប្រវត្តិសាស្រ្ត» ចំពេលជម្លោះរវាងអ៊ីស្រាអែល សហរដ្ឋអាមេរិក និងអ៊ីរ៉ង់​ កាន់តែ​រីករាលដាល។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ

តម្លៃប្រេង​ឆៅម៉ាក Brent ​បានកើនឡើង ៣,០៩ ដុល្លារ ឬ ២,៧៤% ដល់ ១១៥,៦៦ ដុល្លារ/បារ៉ែល គិតត្រឹមម៉ោងជិត ៨ ព្រឹក នៅទីក្រុងហុងកុង ​បន្ទាប់ពីបាន​ហក់ឡើង ៤,២% ពេលបិទការជួញដូរកាលពីថ្ងៃសុក្រ។ ​

ដោយឡែកប្រេងឆៅអាមេរិក ម៉ាក WTI ឯណោះវិញ បាន​កើនឡើង ២,៩២ ដុល្លារ ឬ ២,៩៣% ​ដល់​១០២,៥៦ ដុល្លារ/បារ៉ែល ​ក្រោយកើនឡើង ៥,៥% ​ពេលបិទការជួញដូរថ្ងៃសុក្រ។

គិតតែក្នុងខែមីនានេះ តម្លៃប្រេងម៉ាក Brent បាន​កើនឡើងប្រមាណ ៥៩% រួចទៅហើយ ដែលនេះជាការហក់ឡើងនៃតម្លៃប្រចាំខែដ៏ខ្ពស់បំផុតក្នុងប្រវត្តិសាស្រ្ត ពោលគឺលើសអត្រាកំណើនអំឡុងសង្រ្គាមឈូងសមុទ្រពែរ្សនៅទសវត្សរ៍ឆ្នាំ ១៩៩០ ទៅទៀត។ ការហក់ឡើងនេះ មាន​ទំនាក់ទំនងដោយផ្ទាល់ទៅនឹង​ជម្លោះបច្ចុប្បន្ន ដែលធ្វើឱ្យអ៊ីរ៉ង់បិទច្រកសមុទ្រហ័រមូហ្ស ដែលជាផ្លូវទឹកសំខាន់ដឹកជញ្ជូនប្រេង ១/៥ នៃតម្រូវការប្រចាំថ្ងៃរបស់ពិភព​លោក​។ ​

ជម្លោះដដែលចូលដល់គម្រប់ខួប១ខែ កាលពីថ្ងៃសៅរ៍ ប៉ុន្តែឥឡូវនេះ​វា​នៅតែតានតឹង និងបន្តរីករាលដាល ខណៈមានការរំពឹងតិចតួចថា វាអាច​នឹង​បញ្ចប់នាពេលឆាប់ៗ ដែលនោះហើយជាមូលហេតុធ្វើឱ្យ​តម្លៃប្រេងហក់ឡើងជាបន្តបន្ទាប់។

កាលពីថ្ងៃសៅរ៍ ក្រុមឧទ្ទាមហ៊ូធីដែលមានសម្ព័ន្ធភាពជាមួយអ៊ីរ៉ង់​ក្នុងប្រទេសយេម៉ែន​ បានចាប់ផ្តើមការវាយប្រហារលើកដំបូងរបស់​ខ្លួនទៅលើអ៊ីស្រាអែលចាប់តាំង​ជម្លោះផ្ទុះឡើង​ ដែលបង្កើនការព្រួយបារម្ភអំពីផ្លូវដឹកជញ្ជូនជុំវិញឧបទ្វីបអារ៉ាប់ និងសមុទ្រក្រហម ដែលជាផ្លូវទឹកយុទ្ធសាស្រ្តដ៏សំខាន់ខ្លាំងមួយទៀត។

អ្នកវិភាគរបស់ធនាគារ JP Morgan បាន​និយាយថា ជម្លោះ​ឥឡូវនេះលែងនៅតែក្នុងតំបន់ឈូងសមុទ្រពែរ្ស និងច្រកសមុទ្រហ័រមូហ្សទៀតហើយ ​ដោយ​វាបានរីករាលដាលដល់សមុទ្រក្រហម និងច្រកសមុទ្រ បាបអែលម៉ាន់ដេប (Bab el-Mandeb) ដែលជាផ្លូវសំខាន់សម្រាប់ការដឹកជញ្ជូនប្រេងឆៅ និងប្រេងចម្រាញ់​ទូទាំងពិភពលោក​។

ការវាយប្រហារណាមួយលើសមុទ្រក្រហម នឹង​គំរាមកំហែងដល់​សុវត្ថិភាព​នាំចេញប្រេងរបស់អារ៉ាប៊ីសាអូឌីត ដែលពឹងផ្អែកខ្លាំងលើផ្លូវទឹកមួយនេះ ជំនួសឱ្យច្រកសមុទ្រហ័រមូហ្ស ដែលត្រូវបានបិទខ្ទប់។

គេមើលឃើញថា ការវាយប្រហារក្នុងតំបន់បាន​កើនឡើងកាន់តែខ្លាំងកាលពីចុងសប្ដាហ៍ និងបាន​បំផ្លាញ​កំពង់ផែ​ Salalah របស់ប្រទេសអូម៉ង់ ទោះបីជាមានកិច្ចខិតខំប្រឹងប្រែងដើម្បីចាប់ផ្តើមការចរចាបទឈប់បាញ់ក៏ដោយ។

អ៊ីរ៉ង់បាននិយាយថា ខ្លួនបានត្រៀមខ្លួនរួចជាស្រេចដើម្បីឆ្លើយតបទៅនឹង​ការឈ្លានពាន​​ដោយថ្មើរជើង​​របស់សហរដ្ឋអាមេរិក ដោយចោទប្រកាន់​មហាអំណាចមួយនេះ​កាលពីថ្ងៃអាទិត្យថា កំពុងរៀបចំការវាយប្រហារ​​យ៉ាងដូច្នោះ​ ​ខណៈអះអាងថាស្វែងរក​ការចរចា​៕

​