កីឡា

កីឡាករ ចាន់ សំអាត ក្រៅតែពីប្រដាល់រូបគេក៏ចេះធ្វើវីដេអូរកចំណូលពីហ្វេសបុកទៀតផង

បានផុស

៣ ខែ មុន

នៅ

ថ្ងៃចន្ទ ៣០ មីនា ២០២៦

ដោយ

អ្នកលេងគុនខ្មែរ ចាន់ សំអាត ក្រៅតែពីហ្វឹកហាត់ និងឡើងប្រកួតហើយនោះគេសង្កេតឃើញរូបគេធ្វើវីដេអូរកចំណូលបានមួយផ្នែកបន្ថែមពីហ្វេសបុកដើម្បីជួយបង្កើនជីវភាពក្រុមគ្រួសារបានធូរស្រាលមួយកម្រិតដែររយៈពេលប្រហែលមួយឆ្នាំនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាករ ចាន់ សំអាត

កីឡាករ ចាន់ សំអាត បានឲ្យដឹងមកថា រូបគេធ្វើវីដេអូលើហ្វេសបុកនេះយូរឆ្នាំមកដែរហើយ ដោយគ្រាន់តែពីមុនធ្វើខានៗមិនបានជាប់លាប់ជាប្រចាំ និងធ្វើចម្រុះវីដេអូតែម្ដង។ ទើបតែប៉ុន្មានឆ្នាំចុងក្រោយនេះបានជួបអេដមីនកាន់ផេកប្រដាល់មួយរូបជួយលើកទឹកចិត្តខ្លួន និងចាំជួយជាយោបល់ផ្សេងៗឲ្យចាំផ្ដើមធ្វើជាប្រចាំឡើងវិញរហូតមកដល់ពេលនេះតែម្ដងទៅ។

ហ្វេសបុកផេក ចាន់ សំអាត

អ្នកប្រដាល់ពីដើមកំណើតពីខេត្តឧត្តរមានជ័យរូបនេះបន្ថែមទៀតថា រយៈពេល ២ខែមកនេះរូបគេបាន Sponsor ការធ្វើវីដេអូលើហ្វេសបុកផេកនេះហើយ។ ដោយឡែកចំពោះ Views ពីអ្នកទស្សនាវិញគឺបានទទួលពីហ្វេសបុកប្រហែលមួយឆ្នាំមកហើយ។ យ៉ាងណាចំណូលពីហ្វេសបុកនេះគឺមិនទៀតទាត់នោះឡើយអាស្រ័យលើវីដេអូដែលធ្វើនោះមាន Views តិច ឬច្រើនតាមជាក់ស្ដែង។

ហ្វេសបុកផេក ចាន់ សំអាត

សិស្សគុនក្លឹបគុនខ្មែរដូនតាបន្តទៀតថា ដោយសារតែចំណូលពីប្រដាល់បានតិចតូច និងមិនសូវបានប្រកួតញឹកដូចកីឡាករល្បីៗទើបរូបគេឆ្លៀតធ្វើវីដេអូនេះដើម្បីបង្កើនប្រាក់ចូលជួយផ្គត់ផ្គងគ្រួសារ។ តាំងពីទទួលចំណូលពីការធ្វើវីដេអូនេះមកជីវភាពគ្រួសារហាក់ធូរស្រាលបានមួយកម្រិតផងដែរ។

បញ្ជាក់ដែរថា ចាន់ សំអាត ជាកីឡាករចាស់វស្សាមួយរូបក្នុងវិស័យប្រដាល់គុនខ្មែរ។ រូបគេចូលហ្វឹកហាត់ដំបូងអំឡុងឆ្នាំ២០០៩ ជាមួយលោក ឡោ វុទ្ធី នៃក្លឹបប្រដាល់កងពលធំអន្តរាគមន៍លេខ៣ ប្រាសាទព្រះវិហារ។ បច្ចុប្បន្ននេះរូបគេកំពុងហ្វឹកហាត់នៅក្លឹបប្រដាល់គុនខ្មែរដូនតាជាមួយលោក ឃឹម សុជាតិ។ ហ្វេសបុកដែលគេកំពុងធ្វើនេះមានដូចជា (SomArt Kunkhmer ខ្លាចាស់ភ្នំដងរែក) (ក្លឹបគុនខ្មែរដូនតា) (សាន្ត ឆេងហួង-Chheng Houng) និងយូធូបមួយ Channel ផងដែរ៕