កីឡា

ប្រសិនបើជោគជ័យ ៤ ប្រកួតនេះ ព្រះខ័នរាជស្វាយរៀង នឹងបង្កើតកំណត់ត្រាថ្មីពីរ

បានផុស

៤ សប្តាហ៍ មុន

នៅ

ថ្ងៃអង្គារ ៣១ មីនា ២០២៦

ដោយ

ព្រះខ័នរាជស្វាយរៀង នឹងបង្កើតកំណត់ត្រាថ្មីពីរសម្រាប់ប្រវត្តិសាស្ត្ររបស់ក្លិប ប្រសិនបើពួកគេអាចឆ្លងផុតការប្រកួតដ៏សំខាន់ចំនួន ៤ នេះក្នុងរយៈពេលត្រឹមតែពីរសប្តាហ៍ប៉ុណ្ណោះ។

ព្រះខ័នរាជស្វាយរៀង ត្រូវការតែ ៤ ពិន្ទុទៀតដើម្បីក្លាយជាម្ចាស់ជើងឯកលីគកំពូលកម្ពុជារដូវកាលនេះ។ នៅសប្តាហ៍ទី២៥ ថ្ងៃសៅរ៍ ទី៤ ខែមេសា ឆ្នាំ ២០២៦ ពួកគេ ត្រូវធ្វើដំណើរទៅជួប ភ្នំពេញក្រោន វេលាម៉ោង ៦ ល្ងាច នៅកីឡដ្ឋានភ្នំពេញក្រោន។ ប្រសិនបើពួកគេរក ៣ ពិន្ទុ ពីភ្នំពេញក្រោន ហើយការប្រកូតលីគបន្ទាប់ នៅថ្ងៃអាទិត្យ ទី១២ ខែមេសា ត្រូវការត្រឹមតែស្មើជាមួយ អឹមអូអាយ កំពង់ដេវ៉ា សម្រាប់ការប្រកួតសប្តាហ៍ ទី២៦ នោះ ពួកគេនឹងក្លាយជាជើងឯកតែម្តង។

ប្រការនេះមានន័យថា ព្រះខ័នរាជស្វាយរៀង នឹងបង្កើតកំណត់ត្រា ក្លាយជាក្លិបបាល់ទាត់កម្ពុជាទីមួយដែលបានឈ្នះជើងឯកលីគកំពូលកម្ពុជា ៣ រដូវកាលជាប់គ្នា ពីព្រោះរហូតដល់ពេលនេះមិនទាន់មានក្រុមណាឈ្នះជើងឯកលីគកំពូលកម្ពុជា ៣ រដូវកាលជាប់គ្នាឡើយ។

មុនពេលជួប អឹមអូអាយ កំពង់ដេវ៉ា នៅថ្ងៃអាទិត្យក្នុងលីគ ព្រះខ័នរាជស្វាយរៀង ត្រូវធ្វើការធ្ងន់មែនទែនដោយត្រូវទទួល ក្រុម Manila Digger នៅថ្ងៃព្រហស្បតិ៍ ទី៩ ខែមេសា ឆ្នាំ ២០២៦ នៅពហុកីឡដ្ឋានជាតិអូឡាំពិក ក្នុងជើងទី១ វគ្គពាក់កណ្តាលផ្តាច់ព្រ័ត្រ ពានរង្វាន់ AFC Challenge League ហើយជើងទី ២ ត្រូវធ្វើដំណើរទៅប្រទេសហ្វីលីពីន សម្រាប់ការប្រកូត នាថ្ងៃទី១៦ ខែមេសា ឆ្នាំ ២០២៦។

ប្រសិនបើទទួលបានជោគជ័យសម្រាប់ការប្រកួតវគ្គពាក់កណ្តាលផ្តាច់ព្រ័ត្រជាមួយក្រុម Manila Digger ព្រះខ័នរាជស្វាយរៀង នឹងបង្កើតកំណត់ត្រាថ្មីជាប្រវត្តិសាស្ត្រក្លិបបាល់ទាត់កម្ពុជា ក្នុងការឈានដល់វគ្គផ្តាច់ព្រ័ត្រ ជាលើកទី២ នៃពានរង្វាន់ AFC Challenge League បន្ទាប់ពីលើកទី ១ បានឡើងដល់វគ្គផ្តាច់ព្រ័ត្រ កាលពីរដូវកាលមុន។

មែនទែនទៅ ពានរង្វាន់ AFC Challenge League នេះពិតជាសំខាន់ណាស់ ពីព្រោះប្រសិនបើបរាជ័យ គឺអស់ឱកាសឡើងវគ្គបន្ត។ ចំណែកនៅលីគកំពូលកម្ពុជាវិញ ទោះបីជាមិនអាចរកបាន ៤ ពិន្ទុដើម្បីក្លាយជាជើងឯកឲ្យលឿន ក៏មិនជាបញ្ហាធ្ងន់ធ្ងរសម្រាប់ព្រះខ័នរាជស្វាយរៀងឡើយ ពីព្រោះនៅមានការប្រកួតច្រើនទៀត និងកំពុងនាំមុខក្រុមលេខ ២ ភ្នំពេញក្រោន ដល់ទៅ ១២ ពិន្ទុ។

សូមបញ្ជាក់ថា តាមកាលវិភាគប្រកួតដែលក្លិប ព្រះខ័នរាជស្វាយរៀង បានប្រកាសគឺគ្មានការប្រកួតណាមួយត្រូវបានលើកពេលឡើយ ហើយការប្រកួតនីមួយៗមានពេលវេលាចន្លោះគ្នាត្រឹមតែ ៣ ទៅ ៤ ថ្ងៃប៉ុណ្ណោះ ដូច្នេះព្រះខ័នរាជស្វាយរៀង ត្រូវធ្វើការលំបាកមែនទែននៅក្នុងដំណាក់កាលដ៏សំខាន់នេះ៕

កម្មវិធីប្រកួតសំខាន់