វិសោធនកម្មច្បាប់បោះឆ្នោតព្រឹទ្ធសភា ចូលដល់ដៃក្រុមប្រឹក្សាធម្មនុញ្ញ ដើម្បីពិនិត្យធម្មនុញ្ញភាព

សេចក្ដីស្នើច្បាប់ស្តីពីវិសោធនកម្មច្បាប់ស្តីពីការបោះឆ្នោតជ្រើសតាំងសមាជិកព្រឹទ្ធសភា នឹងត្រូវពិនិត្យធម្មនុញ្ញភាពដោយក្រុមប្រឹក្សាធម្មនុញ្ញ ក្រោយទទួលបានការអនុម័តដោយសភាទាំងពីរថ្នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កិច្ចប្រជុំរបស់ក្រុមប្រឹក្សាធម្មនុញ្ញដើម្បីពិនិត្យធម្មនុញ្ញភាពច្បាប់ខាងលើ នឹងធ្វើឡើងនាព្រឹកថ្ងៃទី១០ ខែមេសា ឆ្នាំ២០២៦ ក្រោមវត្តមានដឹកនាំរបស់លោក ហ៊ី សោភា ប្រធានក្រុមប្រឹក្សាធម្មនុញ្ញ។ បើតាមអគ្គលេខាធិការដ្ឋានក្រុមប្រឹក្សាធម្មនុញ្ញ កិច្ចប្រជុំនេះ គឺធ្វើឡើងតបតាមសំណើរបស់សម្ដេច ឃួន​ សុដារី ប្រធានរដ្ឋសភា។

រដ្ឋសភាបានអនុម័តជាឯកច្ឆន្ទលើសេចក្ដីស្នើច្បាប់ស្តីពីវិសោធនកម្មច្បាប់ស្តីពីការបោះឆ្នោតជ្រើសតាំងសមាជិកព្រឹទ្ធសភា កាលពីថ្ងៃទី៣០ ខែមីនា ឆ្នាំ២០២៦ និងទទួលបាននូវការឯកភាពទាំងស្រុងពីព្រឹទ្ធសភា នៅក្នុងសម័យប្រជុំជាវិសាមញ្ញ កាលពីថ្ងៃទី៣ ខែមេសា។

សេចក្តីស្នើច្បាប់នេះ ត្រូវបានស្នើឡើងដោយក្រុមសមាជិកព្រឹទ្ធសភា ដែលនឹងត្រូវធ្វើវិសោធនកម្មទៅលើមាត្រាមួយចំនួន ដូចជាមាត្រា៨ថ្មី មាត្រា៩ មាត្រា១០ មាត្រា១៤ មាត្រា១៧ មាត្រា១៨ មាត្រា២៣ និងមាត្រា២៨ ដើម្បីធានានូវភាពសមស្រប គណនេយ្យភាព និងប្រសិទ្ធភាពក្នុងការអនុវត្តមុខងារតំណាងរបស់សមាជិកព្រឹទ្ធសភា។

ដោយហេតុថា ច្បាប់ស្តីពីការបោះឆ្នោតជ្រើសតាំងសមាជិកព្រឹទ្ធសភា ដែលបានប្រកាសឱ្យប្រើ កាលពីឆ្នាំ២០០៥ កន្លងទៅ បានកំណត់មណ្ឌលបោះឆ្នោតជាភូមិភាគ ដែលមានខេត្តច្រើនបញ្ចូលគ្នា បង្កើតជាឧបសគ្គសម្រាប់ទំនាក់ទំនងរវាងសមាជិកព្រឹទ្ធសភាជាមួយនឹងអង្គបោះឆ្នោត ទើបប្រធានព្រឹទ្ធសភា សម្ដេចតេជោ ហ៊ុន សែន បានផ្ដួចផ្ដើមឱ្យមានការធ្វើវិសោធនកម្មច្បាប់នេះ ដែលចំណុចសំខាន់ គឺការផ្លាស់ប្តូរមណ្ឌលបោះឆ្នោតពីភូមិភាគ មកជាមណ្ឌលបោះឆ្នោតរាជធានី-ខេត្ត ដូចនឹងរដ្ឋសភាដែរ។

តាមការបញ្ជាក់របស់លោក ធន់ វឌ្ឍនា អនុប្រធានទី២ព្រឹទ្ធសភា ការធ្វើវិសោធនកម្មច្បាប់នេះ នឹងជួយឱ្យព្រឹទ្ធសភាពង្រឹងប្រសិទ្ធភាពនៃការអនុវត្តមុខងារតំណាង បង្កើនគណនេយ្យភាព ព្រមទាំងបង្ខិតសមាជិកព្រឹទ្ធសភាឱ្យកាន់កៀក និងកាន់តែជិតស្និទ្ធជាមួយអង្គបោះឆ្នោត និងប្រជាពលរដ្ឋនៅមូលដ្ឋាន៕

ដោយ៖ ធឿន វ៉ាន់សុង