តម្លៃខ្នុរវៀតណាម​ធ្លាក់ចុះខ្លាំង ​បង្ខំឱ្យ​កសិករខ្លះទុកឱ្យទុំស្អុយចោល​

​តម្លៃផ្លែខ្នុរវៀតណាមនៅតំបន់ដីសណ្តទន្លេមេគង្គ កំពុង​ធ្លាក់ចុះខ្លាំងយ៉ាងគំហុក ដោយ​បង្កការ​ខាតបង់ដល់កសិករ ដែលខ្លះបង្ខំចិត្តទុកចោលឱ្យទុំរលួយនៅចម្ការ ដោយ​សារតែតម្រូវការខ្សោយ។ នេះបើតាមការចុះផ្សាយរបស់កាសែត Tuoi Tre កាលពីពេលថ្មីៗនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅ​ខេត្ត Dong Thap ​កន្លែងជួញដូរខ្នុរដែលធ្លាប់តែមមាញឹក បានកាត់បន្ថយប្រតិបត្តិការ ឬបិទទាំងស្រុង។ កសិកររាយការណ៍ថា សូម្បីតែផ្លែខ្នុរ​គុណភាពល្អបំផុត ឥឡូវនេះលក់បាន​ត្រឹមតែ ៣ ០០០ ដុង(០,១១ ដុល្លារ)/គីឡូក្រាមប៉ុណ្ណោះ ដោយទាបជាងឆ្ងាយធៀបនឹង​តម្លៃផលិតកម្ម​ក្នុងរង្វង់ ៨ ០០០ ដុង។​

កសិករម្នាក់នៅឃុំ ប៊ិញភូ នៃខេត្ត Dong Thap បាននិយាយថា៖ «​​លក់ទៅក៏​ខាត ប៉ុន្តែ​បើទុកនៅលើដើម វាខ្ជះខ្ជាយ»។

ស្ថានភាពទីផ្សារបែបនេះ ក៏មាន​នៅខេត្តក្បែរខាង Vinh Long ឯណោះផងដែរ ដោយ​កសិករបាន​និយាយថា គ្មានឈ្មួញដើរទិញ​ ដែលធ្វើឱ្យ​ពួកគេទុកខ្នុរទុំឱ្យរលួយចោល។ ​

មែនទែនទៅ ការធ្លាក់ចុះថ្លៃឆ្នាំនេះ ធ្ងន់ធ្ងរធៀបនឹង​តម្លៃឆ្នាំមុន ដែលកសិករអាចលក់បាន​ចន្លោះពី ១៥ ០០០ – ២០ ០០០ ដុង/គីឡូក្រាម។ ពាណិជ្ជករបាន​និយាយថា ការធ្លាក់ចុះថ្លៃបែបនេះ គឺដោយសារតែការរំខានផ្នែកនាំចេញ ​រួមទាំងការពន្យារពេលដឹកជញ្ជូននៅច្រកព្រំដែន ដែលតម្រូវឱ្យមាន​ការដឹកជញ្ជូនមកចាក់លើទីផ្សារក្នុងស្រុកវិញ។ ​

ការផ្គត់ផ្គង់លើសកម្រិត រួមផ្សំជាមួយនឹងកម្សោយ​តម្រូវការក្នុងស្រុក​ បានធ្វើឱ្យតម្លៃធ្លាក់ចុះគំហុក។ លើសពីនោះ ការកើនឡើង​ថ្លៃដឹកជញ្ជូន និងការពន្យារពេលផ្នែកភស្តុភារ ធ្វើឱ្យអ្នកទិញកាន់តែខកចិត្ត៕