ក្រសួងប្រៃសណីយ៍ ប្រាប់ឱ្យប្រុងប្រយ័ត្នចំពោះសារបោកបន្លំជាក្រុមហ៊ុន Telegram

ក្រសួងប្រៃសណីយ៍ និងទូរគមនាគមន៍ ប្រាប់ឱ្យប្រុងប្រយ័ត្នចំពោះជនខិលខូចដែលបន្លំធ្វើជាក្រុមហ៊ុន Telegram ដើម្បីធ្វើឱ្យលោកអ្នកជឿថា ជាក្រុមហ៊ុនពិត ហើយតម្រូវឱ្យអ្នកចុចតំណភ្ជាប់ (Link) ភ្លាមៗ បើមិនដូច្នេះគណនី Telegram របស់អ្នកនឹងបាត់ក្នុងរយ:ពេលដ៏ខ្លី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមក្រសួង ជនខិលខូចទាំងនោះ បានប្រើឈ្មោះគណនីក្លែងក្លាយ teiegram ដែលជាឈ្មោះបន្លំ និងបោកប្រាស់តែប៉ុណ្ណោះ។ ដូច្នេះត្រូវពិនិត្យឈ្មោះគណនីឱ្យបានច្បាស់លាស់ជាមុនសិន។ ឈ្មោះគណនីផ្លូវការពិតប្រាកដ គឺ Telegram ព្រមទាំងមានសញ្ញាធីកនៅខាងចុងនៃឈ្មោះ។

ឈ្មោះគណនីទើបតែបង្កើតឡើងថ្មី មានន័យថា កាលបរិច្ឆេទនៃការបង្កើតគណនីទើបតែថ្មីៗ ដោយប្រើលេខទូរសព្ទមកពីប្រទេសដទៃ។ ការផ្ញើតំណភ្ជាប់ក្លែងក្លាយ ក្រសួងបញ្ជាក់ថា តំណភ្ជាប់ត្រឹមត្រូវផ្លូវការរបស់ Telegram មានដូចជា https://telegram.org, https://web.telegram.org, https://t.me/… ឬត្រូវមាន Domain: telegram.org ។

ជាមួយគ្នានេះ ជនខិលខូច អាចគម្រាម បំភ័យ និងទាមទារឱ្យអ្នកធ្វើសកម្មភាពភ្លាមៗ តាមរយៈសារដែលបានផ្ញើមក បញ្ជា្កក់ថាតេឡេក្រាមរបស់អ្នកនឹងត្រូវបានលុប ឬបង្កកជាអចិន្ត្រៃយ៍ ប្រសិនបើមិនធ្វើតាមការណែនាំរបស់ពួកគេរយៈពេល ៦-២៤ ម៉ោង។ ខ្លឹមសារទាំងនេះមើលទៅដូចជាការជូនដំណឹងអំពីសុវត្ថិភាពរបស់គណនីតេឡេក្រាមរបស់អ្នក ប៉ុន្តែគឺជាកុហកបោកប្រាស់តែប៉ុណ្ណោះ។ ដូច្នេះ ដើម្បីមានសុវត្ថិភាព សូមកុំធ្វើតាម ព្រោះអ្នកអាចនឹងបាត់បង់គណនីភ្លាមៗ ប្រសិនបើអ្នកចូលទៅកាន់តំណភ្ជាប់បោកប្រាស់នោះ ហើយធ្វើទៅតាមការណែនាំរបស់ពួកគេ និងពុំបានដាក់មុខងារការពារ 2FA ឬ MFA ទៅលើគណនីតេឡេក្រាមរបស់អ្នក។

ក្រសួងប្រៃសណីយ៍ ក៏បានណែនាំពីវិធីការពារសុវត្ថិភាព មួយចំនួននៅពេលតទួលសារពីគណនីឈ្មោះបន្លំពាក្យ Telegram ដោយមិនត្រូវចុចតំណភ្ជាប់នោះ ហើយត្រូវលុបសារនោះចោលភ្លាមៗ និងដាក់មុខងារបន្ថែម (មុខងារការពារផ្ទៀងផ្ទាត់ពីរកត្តា 2FA ឬមុខងារការពារផ្ទៀងផ្ទាត់ពហុកត្តា MFA។

ប្រសិនបើមានការសង្ស័យថា មានអ្វីមិនប្រក្រតី សូមហៅទៅកាន់លេខទូរសព្ទ ១២៣ ឬ៦៧៨៩ ឬផ្ញើសារចូលទៅទំព័រផ្លូវការរបស់ ក្រសួងប្រៃសណីយ៍ និងទូរគមនាគមន៍ ដើម្បីរាយការណ៍៕