ត្រាំ​ អះអាងថា អ៊ីរ៉ង់ នៅតែចង់បានអាវុធនុយក្លេអ៊ែរ

លក្ខខណ្ឌធំមួយដែលអ៊ីរ៉ង់មិនព្រមបោះបង់ក្នុងកិច្ចចរចាសន្តិភាពជាមួយអាមេរិក គឺកម្មវិធីនុយក្លេអ៊ែរ។ ​ឥឡូវប្រមុខសេតវិមាន ដូណាល់ ត្រាំ ក៏បញ្ជាក់យ៉ាងច្បាស់ដែរថា អ៊ីរ៉ង់នៅតែចង់បានអាវុធនុយក្លេអ៊ែរ។ នេះបើតាមការផ្សាយរបស់ BBC។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងនៅថ្ងៃចន្ទទី១៣ខែមេសាឆ្នាំ២០២៦ មេដឹកនាំអាមេរិកនិយាយថា អ៊ីរ៉ង់នៅតែចង់បានអាវុធនុយក្លេអ៊ែរ ហើយបានបង្ហាញពីបំណងនោះក្នុងអំឡុងជំនួបនៅទីក្រុង អ៊ីស្លាម៉ាបាដ។

លោកបានបញ្ជាក់ថា៖ «ពួកគេនៅតែចង់បានវា ហើយពួកគេបានបង្ហាញរឿងនេះយ៉ាងច្បាស់កាលពីយប់មិញ។ អ៊ីរ៉ង់នឹងមិនអាចមានអាវុធនុយក្លេអ៊ែរជាដាច់ខាត។ ការចរចាដោយផ្ទាល់ជាមួយអ៊ីរ៉ង់បានទទួលបរាជ័យ ដោយសារតែទីក្រុងតេហេរ៉ង់ គ្មានឆន្ទៈបោះបង់ចោលនូវមហិច្ឆតានុយក្លេអ៊ែររបស់ពួកគេឡើយ»។

ក្នុងជំនួបនៅប្រទេសប៉ាគីស្ថាន អាមេរិក-អ៊ីរ៉ង់ ចរចាគ្នាលើលក្ខខណ្ឌចំនួន១០ចំណុច ប៉ុន្តែបន្ទាប់ពីកិច្ចប្រជុំនោះ ក្រសួងការបរទេសអ៊ីរ៉ង់បានចេញសេចក្តីថ្លែងការណ៍ ដោយបញ្ជាក់យ៉ាងច្បាស់ថា លក្ខខណ្ឌចំនួន៣ជាមូលហេតុនាំឲ្យការចរចាបរាជ័យ ព្រោះតែភាគីទាំងសងខាងខ្វែងគំនិតគ្នា។

ក្រសួងបានបញ្ជាក់នៅថ្ងៃអាទិត្យទី១២ខែមេសាឆ្នាំ២០២៦ថា ភាគីទាំងពីរបានពិនិត្យឡើងវិញនូវសំណើ ១០ ចំណុចរបស់អ៊ីរ៉ង់ រួមជាមួយជំហររបស់សហរដ្ឋអាមេរិក ហើយបានឈានដល់ការយល់ឃើញរួមគ្នាលើចំណុចមួយចំនួន ប៉ុន្តែការខ្វែងគំនិតគ្នានៅតែបន្តកើតមានលើបញ្ហាធំៗចំនួន ៣ ដែលជាឧបសគ្គរារាំងមិនឲ្យមានកិច្ចព្រមព្រៀងចុងក្រោយបាន។

ដ្បិតអ៊ីរ៉ង់ មិនទម្លាយថា លក្ខខណ្ឌទាំង ៣ នោះគឺជាអ្វីខ្លះក៏ដោយ ប៉ុន្តែបើតាមគេដឹង មួយក្នុងចំណោមលក្ខខណ្ឌ៣នោះ គឺពាក់ព័ន្ធនឹងកម្មវិធីនុយក្លេអ៊ែររបស់ទីក្រុងតេហេរ៉ង់ ហើយសូម្បីរឿងនេះ ក៏ត្រូវបានអនុប្រធានាធិបតីអាមេរិក JD Vance ប្រកាសទទួលស្គាល់ ជាឧបសគ្គនាំឲ្យកិច្ចព្រមព្រៀងបរាជ័យផងដែរ។

ក្នុងសន្និសីទសារព័ត៌មាននៅទីក្រុងអ៊ីស្លាម៉ាបាដ លោក Vance បានបញ្ជាក់សារជាថ្មីនូវជំហររបស់សហរដ្ឋអាមេរិកថា៖ «យើងចាំបាច់ត្រូវតែឃើញនូវការប្តេជ្ញាចិត្តដោយបញ្ជាក់ច្បាស់លាស់ថា ពួកគេនឹងមិនស្វែងរកអាវុធនុយក្លេអ៊ែរ ហើយពួកគេនឹងមិនស្វែងរកឧបករណ៍ទាំងឡាយណា ដែលអាចឲ្យពួកគេសម្រេចបាននូវអាវុធនុយក្លេអ៊ែរយ៉ាងឆាប់រហ័សនោះឡើយ»៕

អត្ថបទ៖ សុខ សុវណ្ណ