អង់គ្លេស ចេញមុខប្រកាសថា ខ្លួនអត់ចូលរួមជាមួយ ត្រាំ បិទខ្ទប់ច្រក Hormuz ទេ

បន្ទាប់ពីប្រធានាធិបតីអាមេរិក ដូណាល់ ត្រាំ ប្រកាសបញ្ជូនកងទ័ពជើងទឹក ទៅបិទច្រកសមុទ្រ Hormuz ស្រាប់តែអង់គ្លេសឯណោះ បានប្រញាប់ប្រញាល់ចេញមុខនិយាយពាក់ព័ន្ធរឿងនេះ ដោយបញ្ជាក់ថា ខ្លួននឹងមិនចូលរួមក្នុងប្រតិបត្តិការនេះឡើយ។

សារព័ត៌មាន BBC បានដកស្រង់សម្តីអ្នកនាំពាក្យរដ្ឋាភិបាលទីក្រុងឡុងដ៍ ដែលបញ្ជាក់យ៉ាងច្បាស់នៅថ្ងៃចន្ទទី១៣ខែមេសាឆ្នាំ២០២៦ថា៖ «ចក្រភពអង់គ្លេស នឹងមិនចូលរួមក្នុងប្រតិបត្តិការបិទខ្ទប់ផ្នែកយោធារបស់សហរដ្ឋអាមេរិកប្រឆាំងនឹងប្រទេសអុីរ៉ង់នោះទេ។ យើងបន្តគាំទ្រសេរីភាពនៃការធ្វើនាវាចរណ៍ និងការបើកឲ្យដំណើរការឡើងវិញនូវច្រកសមុទ្រ Hormuz ដែលជាតម្រូវការចាំបាច់ជាបន្ទាន់ ដើម្បីគាំទ្រដល់សេដ្ឋកិច្ចពិភពលោក និងតម្លៃនៃការរស់នៅ ក្នុងប្រទេសរបស់យើង»។

ទោះបីជាយ៉ាងណាក៏ដោយ ទីក្រុងឡុងដ៍អះអាងថា នាវាបោសសម្អាតមីន និងសមត្ថភាពប្រឆាំងដ្រូនរបស់ចក្រភពអង់គ្លេស នឹងបន្តប្រតិបត្តិការនៅក្នុងតំបន់នោះដដែល។

ការប្រកាសរបស់អង់គ្លេសកើតឡើង ក្រោយពេលប្រមុខរដ្ឋាភិបាលទីក្រុងវ៉ាស៊ីនតោន ដូណាល់ ត្រាំ ​ចេញបញ្ជាឲ្យបិទខ្ទប់ច្រក Hormuz ដែលចំណាត់ការនេះ រុញតម្លៃប្រេងសកលឲ្យហក់ឡើងសាជាថ្មី។

បង្ហោះសារលើបណ្តាញសង្គម Truth Social កាលពីថ្ងៃអាទិត្យទី១២ខែមេសាឆ្នាំ២០២៦ ប្រធានា​ធិបតីអាមេរិក សរសេរថា៖ កងទ័ពជើងទឹកអាមេរិក នឹងចាប់ផ្តើមដំណើរការបិទខ្ទប់ រាល់កប៉ាល់ ដែលព្យាយាមចូលឬចាកចេញពីច្រក Hormuz។ លោកណែនាំឲ្យកងទ័ពជើងទឹក ស្វែងរកនិងស្ទាក់ចាប់កប៉ាល់ទាំងឡាយណា នៅក្នុងដែនទឹកអន្តរជាតិ ដែលបានបង់ថ្លៃសេវាឆ្លងកាត់ឲ្យទៅអ៊ីរ៉ង់។

ក្នុងសារដដែលនោះ លោកព្រមានថា៖ «អាមេរិកនឹងចាប់ផ្តើមបំផ្លាញ រាល់គ្រាប់មីនដែលអ៊ីរ៉ង់ដាក់ពង្រាយនៅក្នុងច្រកសមុទ្រនោះ។ ជនជាតិអ៊ីរ៉ង់ណាដែលបាញ់មកលើពួកយើង ឬបាញ់លើកប៉ាល់សន្តិភាព នឹងត្រូវកម្ទេចឲ្យខ្ទេច។ ពួកយើងបានត្រៀមលក្ខណៈរួចរាល់ ១០០% ហើយ! យោធាមេរិក នឹងបញ្ចប់នូវអ្វីដែលនៅសេសសល់បន្តិចបន្តួចរបស់អ៊ីរ៉ង់!»៕

អត្ថបទ៖ សុខ សុវណ្ណ