កីឡា

អបអរសាទរ! ព្រះខ័នរាជស្វាយរៀង បង្កើតកំណត់ឡើងវគ្គផ្តាច់ព្រ័ត្រ AFC3 លើកទី២

បានផុស

១ សប្តាហ៍ មុន

នៅ

ថ្ងៃព្រហស្បតិ៍ ១៦ មេសា ២០២៦

ដោយ

ក្លិបបាល់ទាត់ ព្រះខ័នរាជស្វាយរៀង បានឡើងទៅកាន់វគ្គផ្តាច់ព្រ័ត្រ ពានរង្វាន់ AFC Challenge League រដូវកាល ២០២៥-២៦ បន្ទាប់ពីបានយកឈ្នះក្រុមម្ចាស់ផ្ទះ Manila Digger ដោយលទ្ធផល ៣-២ ក្នុងជើងទី២ វគ្គពាក់កណ្តាលផ្តាច់ព្រ័ត្រ។ សរុបទាំងពីរជើង ព្រះខ័នរាជស្វាយរៀង បានឈ្នះ ៤-១។

ព្រះខ័នរាជស្វាយរៀង បានចាប់ផ្តើមប្រកួតដោយទំនុកចិត្ត និងនៅតែជាក្រុមធ្វើការវាយសម្រុក និងដាក់សម្ពាធដដែល បើទោះបីជាលេងនៅក្រៅដី ខណៈក្រុម Manila Digger នៅតែរក្សាទម្រង់លេងការពារ និងវាយបកដូចពីជើងទី១ដដែល។ នៅវគ្គទី១ ព្រះខ័នរាជស្វាយរៀង រកបាន ២ គ្រាប់ដោយខ្សែការពារ សារ៉េត គ្រីយ៉ា នៅនាទី ១២ និងខ្សែប្រយុទ្ធ Kwame Peprah នៅនាទី៣៩ ដើម្បីនាំមុខ ២-០ នៅវគ្គទី១។

ចំពោះការប្រកួតនៅវគ្គទី២ ព្រះខ័នរាជស្វាយរៀង រកបាន ១ គ្រាប់ ដោយកីឡាករ Kwame Peprah ដែលបានក្លាយជាកីឡាកររកបានគ្រាប់បាល់ច្រើនជាងគេក្នុងពានរង្វាន់អាស៊ីនេះ។

ជ័យជម្នះនេះបានផ្តល់ឲ្យ ព្រះខ័នរាជស្វាយរៀង ឡើងទៅកាន់វគ្គផ្តាច់ព្រ័ត្រពានរង្វាន់ AFC Challenge League ជាលើកទី ២ ជាប់គ្នា ហើយបានក្លាយជាក្រុមកម្ពុជាតែមួយគត់ដែលបានឈានដល់វគ្គផ្តាច់ព្រ័ត្រពីរលើកជាប់គ្នា។ ជាមួយគ្នានេះ ព្រះខ័នរាជស្វាយរៀង បានបង្កើតកំណត់ត្រាមិនទាន់ចាញ់សោះសម្រាប់ការប្រកួតពានរង្វាន់អាស៊ីលំដាប់ទី២នៅក្នុងរដូវកាលនេះ៕