ខ្យងចំពុះទាជាង ៣ តោន តាំងបង្ហាញដល់ប្រជាពលរដ្ឋ និងអ្នកទេសចរបានភ្លក់រសជាតិ

ខ្យងចំពុះទាជាង ៣ តោន ស្ងោរហើយ យកមកតាំងបង្ហាញដើម្បីឱ្យពលរដ្ឋ និងអ្នកទេសចរបានភ្លក់រសជាតិនៅមុខអគារដ្ឋបាលខេត្តកោះកុង ក្នុងរយៈពេល ៣ ថ្ងៃ នៃពិធីបុណ្យចូលឆ្នាំថ្មី ប្រពៃណីជាតិខ្មែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឆ្នាំនេះ រដ្ឋបាលខេត្តកោះកុង និងរដ្ឋបាលស្រុកមណ្ឌលសីមា ចាប់យកផលិតផលមានជាខ្យងចំពុះទាប្រមាណជាង ៣ តោន ដែលស្ងោរហើយដឹកជញ្ជូនចេញតាមរថយន្តមកពីមូលដ្ឋានឃុំពាមក្រសោប យកមកតាំងបង្ហាញដល់ប្រជាពលរដ្ឋ និងអ្នកទេសចរបានភ្លក់រសជាតិនៅមុខអគារដ្ឋបាលខេត្តកោះកុង។

លោក សុខ ភិរម្យ អភិបាលស្រុកមណ្ឌលសីមា បានឲ្យដឹងនៅថ្ងៃទី ១៧ ខែមេសា ឆ្នាំ ២០២៦ ថា ខ្យងចំពុះទា ជាធនធានជលផលដ៏មានសក្តានុពលប្រភពចំណូលមួយសម្រាប់ប្រជាសហគមន៍ឃុំពាមក្រសោប ខេត្តកោះកុង និងទាក់ទាញជូនភ្ញៀវទស្សនាកម្សាន្តបែបធម្មជាតិ។

លោកអភិបាលស្រុកមណ្ឌលសីមា បន្ថែមទៀតថា ខ្យងចំពុះទា ជាអាហារមួយប្រចាំនៅខេត្តកោះកុងដែលស្ងោរជ្រលក់ជាមួយទឹកត្រីកោះកុងហូប ឆាក្រៀម ឆាកែងហឹរៗ និងច្នៃជាម្ហូបបានច្រើនមុខតាមចំណង់ចំណូលចិត្តអ្នកពិសារ។ ប្រជាអ្នកនេសាទប្រមូលផលខ្យងចំពុះទានៅសមុទ្រទឹករាក់គ្រប់គ្រងដោយសហគមន៍ព្រៃកោងកាងពាមក្រសោប។ រដូវទាញយកផលចំណេញពីទិន្នផលខ្យងចំពុះទាផ្តើមពីខែតុលា ដល់ខែឧសភា ជារៀងរាល់ឆ្នាំ។ ខ្យងចំពុះទាជាជីវៈចម្រុះកកើតឡើងវិញ គ្រាន់តែចំណោយថវិកាច្រើនបន្តិចដើម្បីទិញបង្គោលយកទៅដាំជម្រៅពី ៥ ម៉ែត្រ ទៅ ១០ ម៉ែត្រ ពីផ្ទៃទឹកសមុទ្រ ហើយរុំទៃសជុំវិញបង្គោលនីមួយៗ តាមរយៈការយកកូនខ្យងមកទុំព័ទ្ធរហូតដល់ពេលធំធាត់ប្រមូលផលតែម្តង។

លោក នូ ម៉ៅ ពលរដ្ឋមកពីខេត្តតាកែវ និងអ្នកស្រី ជៀម សុខុន ពលរដ្ឋមកពីខេត្តកំពត ដែលមកលេងកម្សាន្តទីតាំងសង្រ្កាន្តឆ្នាំថ្មីមុខសាលាខេត្ត យល់ថា ការដាក់ឱ្យភ្លក់រសជាតិអាហារ មានជាខ្យងចំពុះទា ពិតជាល្អប្រសើរ ដើម្បីផ្សព្វផ្សាយពីសក្តានុពលធនធានជលផលដែលកំពុងមាននៅក្នុងខេត្តឱ្យមហាជនបានស្គាល់។

ពលរដ្ឋជាអ្នកទេសចរក្នុងស្រុក បន្តថា ពួកគាត់ចង់ឱ្យអាជ្ញាធរ និងមន្រ្តីពាក់ព័ន្ធ បន្តផ្សព្វផ្សាយពីសក្តានុពលផលិតផលដែលជាអត្តសញ្ញាណរបស់ខេត្តបន្តទៀត ក្នុងគោលបំណងទាក់ទាញទីផ្សារលក់ចេញផលិតផលទាំងនោះបានកាន់តែច្រើន និងលើកកម្ពស់សេដ្ឋកិច្ចជីវភាពប្រជាពលរដ្ឋមូលដ្ឋាន៕
អត្ថបទ ៖ សិរីវឌ្ឍនៈ