មេ UN ​អំពាវនាវ​ឲ្យ​គ្រប់ភាគីគោរព​​លក្ខខណ្ឌ​បទ​ឈប់បាញ់ អ៊ីស្រាអែល-លីបង់

លោក Stephane Dujarric អ្នកនាំពាក្យរបស់មេ UN បាននិយាយថា អគ្គលេខាធិការអង្គការសហប្រជាជាតិ លោក Antonio Guterres ស្វាគមន៍បទឈប់បាញ់រវាងអ៊ីស្រាអែល និងលីបង់ ហើយអំពាវនាវឲ្យគ្រប់ភាគីទាំងអស់គោរពតាមបទប្បញ្ញត្តិរបស់ខ្លួន។ នេះបើយោងការចុះផ្សាយពីទីភ្នាក់ងារសារព័ត៌មាន tass។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

​​អ្នក​នាំពាក្យ​អគ្គលេខាធិការ​អង្គការ​សហប្រជាជាតិ បានសរសេរ​នៅក្នុងសេចក្តីថ្លែងការណ៍មួយថា អគ្គលេខាធិការស្វាគមន៍ចំពោះការប្រកាសបទឈប់បាញ់រយៈពេល ១០ថ្ងៃ រវាងអ៊ីស្រាអែល និងលីបង់ ហើយសរសើរតួនាទីរបស់សហរដ្ឋអាមេរិក ក្នុងការសម្របសម្រួលបទឈប់បាញ់។

អគ្គលេខាធិការសង្ឃឹមថា បទឈប់បាញ់នេះនឹងបើកផ្លូវសម្រាប់ការចរចា និងការអនុវត្តពេញលេញនៃសេចក្តីសម្រេចលេខ 1701 (2006) របស់ក្រុមប្រឹក្សាសន្តិសុខឆ្ពោះទៅរកដំណោះស្រាយរយៈពេលវែងចំពោះជម្លោះ។

លោក Dujarric បានបញ្ចាក់បន្ថែមថា លោកជំរុញឲ្យតួអង្គទាំងអស់គោរពបទឈប់បាញ់យ៉ាងពេញលេញ និងអនុវត្តតាមកាតព្វកិច្ចរបស់ពួកគេក្រោមច្បាប់អន្តរជាតិ រួមទាំងច្បាប់មនុស្សធម៌អន្តរជាតិគ្រប់ពេលវេលា។ លោកក៏សម្តែងក្តីសង្ឃឹមថា កិច្ចព្រមព្រៀងនេះនឹងបើកផ្លូវឆ្ពោះទៅរក «សន្តិភាពយូរអង្វែង និងទូលំទូលាយនៅក្នុងតំបន់»។

ប្រធានាធិបតីអាមេរិក លោក ដូណាល់ ត្រាំ បានប្រកាសកាលពីថ្ងៃព្រហស្បតិ៍ថា អ៊ីស្រាអែល និងលីបង់បានយល់ព្រមលើបទឈប់បាញ់។ ជាក់ស្ដែង មេដឹកនាំអាមេរិកបាននិយាយតាមទូរស័ព្ទជាមួយប្រធានាធិបតីលីបង់ លោក Joseph Aoun និងនាយករដ្ឋមន្ត្រីអ៊ីស្រាអែល លោក Benjamin Netanyahu ដោយមេដឹកនាំទាំងពីរនេះបានព្រមព្រៀងគ្នា ដើម្បីសម្រេចបានសន្តិភាពរវាងប្រទេសរបស់ពួកគេ ដែលនឹងចាប់ផ្តើមជាផ្លូវការនូវបទឈប់បាញ់រយៈពេល ១០ថ្ងៃ៕

អត្ថបទ៖ សាង ស្រីល័ក្ខ