សម្តេច ហ៊ុន សែន ចង់ឱ្យកម្ពុជា និងអាស៊ែបៃហ្សង់ ពង្រីកទំនាក់ទំនងពាណិជ្ជកម្ម វិនិយោគ

ប្រមុខរដ្ឋស្ដីទី សម្ដេចតេជោ ហ៊ុន សែន បានជំរុញឱ្យរដ្ឋាភិបាលនៃប្រទេសកម្ពុជា និងអាស៊ែបៃហ្សង់ ពង្រីកបន្ថែមទៀតនូវទំនាក់ទំនងសេដ្ឋកិច្ច ពាណិជ្ជកម្ម និងវិនិយោគ ដោយចង់ឱ្យកម្ពុជានិងអាស៊ែបៃហ្សង់ បំពេញឱ្យគ្នាទៅវិញទៅមកក្នុងការធានានូវបានសន្តិសុខស្បៀង និងសន្តិសុខថាមពល ដែលជាសក្តានុពលនៃប្រទេសទាំងពីរ។

បំណងរបស់សម្ដេចតេជោ គឺបានបង្ហាញឡើងក្នុងពេលដែលសម្ដេចទទួលជួបពិភាក្សាការងារជាមួយលោក អែលឈីន អាមៀរបាយ៉ូវ (Elchin Amirbayov) តំណាងប្រធានាធិបតីអាស៊ែបៃហ្សង់ ទទួលបន្ទុកកិច្ចការពិសេស។ ក្នុងជំនួបកាលពីព្រឹកថ្ងៃទី១២ ខែឧសភា សម្ដេចតេជោថា លោកចង់ឃើញទំនាក់ទំនងរវាងកម្ពុជា និងអាស៊ែបៃហ្សង់ រីកចម្រើនទៅជាមួយគ្នា ហើយពង្រីកនូវទំនាក់ទំនងពាណិជ្ជកម្មសេដ្ឋកិច្ច និងការវិនិយោគឱ្យកាន់តែរីកចម្រើន។

ដោយមើលឃើញថា អាស៊ែបៃហ្សង់ជាប្រទេសដែលសម្បូរសន្តិសុខថាមពល ខណៈកម្ពុជាជាប្រទេសដែលមានសន្តិសុខស្បៀង សម្ដេចតេជោ បានជំរុញឱ្យប្រទេសទាំងពីរពិនិត្យលទ្ធភាពក្នុងការពង្រីកទំនាក់ទំនងគ្នាបន្ថែមក្នុងក្របខ័ណ្ឌនៃការបំពេញឱ្យគ្នាទៅវិញទៅមក គឺកម្ពុជាបំពេញស្បៀងដល់អាស៊ែបៃហ្សង់ រីឯអាស៊ែបៃហ្សង់អាចបំពេញនូវសន្តិសុខថាមពលដល់កម្ពុជា។ តាមរយៈនេះ សម្ដេច ចាត់ទុកថា ជាការបំពេញឱ្យគ្នាទៅវិញទៅមកផ្នែកពាណិជ្ជកម្ម។

ជាការកត់សម្គាល់ ការលើកឡើងរបស់សម្ដេចតេជោ ជាការឆ្លើយតបទៅនឹងការបំណងដូចគ្នានេះរបស់លោក Elchin Amirbayov ដែលលោកក៏សម្លឹងមើលពីការពង្រីកទំនាក់ទំនងលើវិស័យកសិកម្ម ដែលបម្រើដល់ក្របខ័ណ្ឌសេដ្ឋកិច្ច និងពាណិជ្ជកម្មរវាងកម្ពុជា និងអាស៊ែបៃហ្សង់។

លោក Elchin Amirbayov បានបញ្ជាក់ថា ទំនាក់ទំនងរវាងកម្ពុជា និងអាស៊ែបៃហ្សង់ មានភាពរីកចម្រើន និងមានភាពល្អប្រសើរ ខណៈនៅមានសក្តានុពលជាច្រើនទៀត ដែលប្រទេសទាំងពីរអាចធ្វើទៅជាមួយគ្នាបាន។ លោក ក៏បានសង្កត់ទៅលើកិច្ចសន្ទនានយោបាយ ដែលប្រទេសទាំងពីរមានជាមួយគ្នាដែលជាផ្នែកធ្វើឱ្យទំនាក់ទំនងនេះកាន់តែរឹងមាំបន្ថែមទៀតផងដែរ៕